Ախտանիշներ - Բուրսիտ

Եթե ունեք բուրսիտ, կարող եք նշել՝

• ախտահարված հոդի ցավ կամ կարկամություն
• ցավի սաստկացում տվյալ հոդը շարժելիս կամ սեղմելիս
• արտաքինից հոդի շրջանի այտուցվածություն և կարմրություն:

Տարբերում են սուր և քրոնիկ ընթացքով բուրսիտներ:

• Սուր բուրսիտն ավելի հաճախ առաջանում է հոդապարկի շրջանում վնասվածքից հետո կամ որպես որևէ այլ ներհոդային հիվանդության բարդություն և կարող է հայտնաբերվել որպես մաշկային կարմրություն և շճային հեղուկով լցված փափուկ առաձգական գոյացություն («բարձիկ»): Սուր բուրսիտը կարող է բերել հոդի շարժունակության սահմանափակման, իսկ երբեմն նաև՝ ջերմության բարձրացման և կարող է բարդանալ թարախային բորբոքմամբ և ֆլեգմոնայի զարգացմամբ:
• Քրոնիկ բուրսիտը զարգանում է հոդերի հարակից ձուսպապարկերի երկարատև մեխանիկական գրգռման հետևանքով: Քրոնիկ բուրսիտը հոդերի շարժունակության վրա չի ազդում, սակայն կարող է սրանալ՝ հանգեցնելով ժամանակավոր անաշխատունակության:

Բուրսիտների ամենահաճախ հանդիպող տեղակայումներն են՝

• բազուկ՝ սուբակրոմիալ բուրսիտ
• ազդր՝ տրոխեանտերիկ բուրսիտ
• ծունկ՝ պրեպատելար բուրսիտ
• արմունկ՝ օլեկրանոնային բուրսիտ
• աքիլեսյան ջիլ՝ ռետրոկալկանեալ բուրսիտ
• ոտնաթաթ:

Ե՞րբ դիմել բժշկին

Խորհրդակցեք ձեր բժշկի հետ, եթե ունեք՝

• մշտապես կամ խիստ անհանգստացնող հոդացավ
• հոդը շարժելու հանկարծակի անկարողություն
• ախտահարված շրջանի արտահայտված այտուց, կարմրություն, արյունազեղում (կապտուկ) կամ ցանավորում
• սուր կամ խոցող ցավ, հատկապես, երբ փորձում եք շարժել հոդը
• ջերմություն: