Բուրսիտ

Բուրսիտ
Անգլերեն անվանումը՝ Bursitis

Բուրսիտը հոդերի ձուսպապարկերի բորբոքումն է:

Ձեր մարմնի մկանները ոսկրերին միանում են սպիտակ պինդ շարակցահյուսվածային (ֆիբրոզ) լարերով, որոնք կոչվում են ջլեր: Երբ ջլերն անցնում են ոսկրերի և հոդերի միջով, առաջացնում են փոքր բարձիկներ, որոնք լցված են հեղուկով: Այս փոքր բարձիկները կոչվում ձուսպապարկեր («բուրսա»-ներ) և մեղմացնում են ոսկրերի հետ ջլերի շփումը:

Տարբեր պատճառներից ձուսպապարկը կարող է բորբոքվել և դառնալ ցավոտ: Այսպիսի վիճակը կոչվում է «բուրսիտ»՝ ձուսպապարկերի (բարձիկների) բորբոքում:

Տարբերում են սուր և քրոնիկ ընթացքով բուրսիտներ:

Սուր բուրսիտն ավելի հաճախ առաջանում է հոդապարկի շրջանում վնասվածքի հետևանքով կամ որպես որևէ այլ ներհոդային հիվանդության բարդություն: Զննմամբ բուրսիտը կարող է հայտնաբերվել որպես մաշկային կարմրություն և շճային հեղուկով լցված փափուկ առաձգական ուռածություն («բարձիկ»): Սուր բուրսիտը կարող է բերել հոդի շարժունակության սահմանափակման, երբեմն նաև մարմնի ջերմության բարձրացման: Սուր բուրսիտը կարող է բարդանալ թարախային բորբոքմամբ և ֆլեգմոնայի առաջացմամբ:

Քրոնիկ բուրսիտը զարգանում է հոդերի հարակից ձուսպապարկերի երկարատև մեխանիկական գրգռման հետևանքով: Քրոնիկ բուրսիտը հոդերի շարժունակության վրա չի ազդում, սակայն կարող է սրանալ՝ բերելով ժամանակավոր անաշխատունակության:

Բուրսիտների ամենահաճախ հանդիպող տեղակայումներն են՝

  • բազուկ՝ սուբակրոմիալ բուրսիտ
  • ազդր՝ տրոխեանտերիկ բուրսիտ
  • ծունկ՝ պրեպատելար բուրսիտ
  • արմունկ՝ օլեկրանոնային բուրսիտ
  • աքիլեսյան ջիլ՝ ռետրոկալկանեալ բուրստ
  • ոտնաթաթ:

Բուրսիտների բուժման ստանդարտ մոտեցումը համապատասխանում է անգլերեն RICE հապավմանը՝

  • հանգիստ (rest)
  • սառույց (ice)
  • ճնշում (compression)
  • բարձր դիրք (elevation):

Հակաբորբոքային դեղերը նույնպես կարող են օգտակար լինել: Բարձիթողի դեպքերում կարող է առաջանալ վիրահատական բուժման կարիք:

Բուրսիտների վերականգնման փուլում ձեր բժիշկը ֆիզիոթերապևտի հետ միասին կարող է առաջարկել նաև ձգող հատուկ վարժություններ:

Հոդվածը վերանայվել է՝ 12-05-2019