Ախտանիշներ - C. difficile

Որոշ մարդկանց աղիներում առկա C. difficile բակտերիաները կարող են որևէ գանգատ չառաջացնել:

Այնուամենայնիվ, նման մարդիկ համարվում են բակտերիա կրողներ և կարող են տարածել այդ վարակը:

C. difficile վարակի գանգատները և մյուս նշանները սովորաբար զարգանում են հակաբիոտիկային կուրսը սկսելուց 5-10 օրվա ընթացքում: Սակայն որոշ դեպքում վարակը կարող է դրսևորվել հակաբիոտիկային բուժման առաջին օրվանից մինչև երեք ամսվա ընթացքում:

Թույլից մինչև չափավոր վարակ

Թույլից մինչև չափավոր C. difficile վարակի ամենատարածված նշաններն են՝

• ավելի քան մեկ օր շարունակվող օրական 3 և ավելի անգամ ջրիկ լուծ
• թույլ որովայնային կծկանքներ և փքվածություն

Ծանր վարակ

Ծանր C. difficile վարակը կարող է արագ բերել ջրազրկման, որը պահանջում է հիվանդանոցային բուժում: Ծանր վարակը նաև կարող է բերել հաստ աղու սուր բորբոքման և երբեմն առաջացնել աղիքի լորձաթաղանքի վնասում՝ հանգեցնելով արյունահոսության կամ թարախային արտադրության:

Ծանր վարակի նշաններից են՝

• հաճախակի՝ օրական 10-15 անգամ ջրիկ լուծ
• որովայնային կծկանքներ և ցավ, որը կարող է ստանալ սաստիկ բնույթ
• սրտազարկի հաճախացում (տախիկարդիա)
• ջրազրկում
• բարձր ջերմություն կամ տենդ
• սրտխառնոց
• արյան սպիտակ բջիջների շատացում (լեյկոցիտոզ)
• երիկամային անբավարարություն
• ախորժակի կորուստ
• որովայնի փքվածություն
• քաշի կորուստ
• կղանքում արյուն կամ թարախ:

Սուր կամ հանկարծակի սկսված C. difficile վարակը հազվադեպ կարող է բերել աղիների բորբոքման՝ հանգեցնելով հաստ աղու լայնացման (նաև կոչվում է տոքսիկ մեգակոլոն) և սեպսիսի: Սեպսիսը կյանքին սպառնացող վիճակ է, երբ օրգանիզմը սկսում է պատասխան ռեակցիա դրսևորել սեփական հյուսվածքների նկատմամբ: Նման իրավիճակներում հայտնված մարդկանց բուժումը կազմակերպվում է անհետաձգելի բուժօգնության բաժանմունքներում:

Ե՞րբ դիմել բժշկին

Որոշ մարդկանց մոտ կարող է դիտվել կղանքի թուլացում հակաբիոտիկային բուժման ընթացքում կամ շատ չանցած, որը կարող է պայմանավորված լինել C. difficile վարակով: Այցելե՛ք ձեր բժշկին, եթե ունեք՝

• օրական երեք կամ ավելի անգամ ջրիկ լուծ
• ավելի քան 2 օր տևող ախտանիշներ
• նոր ի հայտ եկած ջերմության բարձրացում
• սուր որովայնացավեր կամ կծկանքներ
• արյուն կղանքում: