Պատճառներ - Կարդիոմիոպաթիա

Հաճախ կարդիոմիոպաթիայի պատճառն անհայտ է:

Սակայն, որոշ մարդկանց մոտ կարդիոմիոպաթիան մեկ այլ հիվանդության (ձեռքբերովի) կամ ծնողից փոխանցման (բնածին) արդյունք է:

Որոշակի հիվանդություններ, առողջական վիճակներ կամ վարքագծեր, որոնք կարող են հանգեցնել ձեռքբերովի կարդիոմիոպաթիայի, ներառում են՝

• երկարաժամկետ բարձր արյան ճնշում (հիպերտենզիա)
• սրտամկանի ինֆարկտից սրտի հյուսվածքի վնասում (օրինակ՝ կարդիոսկլերոզ)
• երկարաժամկետ արագ սրտազարկ (տախիկարդիա)
• սրտի փականային խնդիրներ
• COVID-19 վարակ
• որոշ վարակներ, հատկապես նրանք, որոնք առաջացնում են սրտի բորբոքում
• նյութափոխանակության (մետաբոլիկ) խանգարումներ, ինչպիսիք են գիրությունը, վահանաձև գեղձի հիվանդությունը կամ շաքարային դիաբետը
• սննդակարգում անհրաժեշտ վիտամինների կամ միներալների, օրինակ՝ թիամինի (վիտամին B1) պակաս
• հղիության բարդություններ
• սրտամկանում երկաթի կուտակում (հեմոքրոմատոզ)
• բորբոքային բջիջների (գրանուլոմա) փոքրիկ գոյացությունների աճ մարմնի ցանկացած մասում, ներառյալ սրտում և թոքերում (սարկոիդոզ)
• օրգաններում ոչ նորմալ սպիտակուցների կուտակում (ամիլոիդոզ)
• շարակցական հյուսվածքի խանգարումներ
• երկար տարիների ընթացքում չափից շատ ալկոհոլ օգտագործում
• կոկաինի, ամֆետամինների կամ անաբոլիկ ստերոիդների օգտագործում
• քաղցկեղի բուժման համար որոշ քիմիաթերապիայի դեղերի և ճառագայթման օգտագործում:

Կարդիոմիոպաթիայի տեսակները

Կարդիոմիոպաթիայի տեսակները ներառում են հետևյալը:

• Դիլատացիոն կարդիոմիոպաթիա. այս տեսակի կարդիոմիոպաթիայի դեպքում սրտի հիմնական պոմպային խոռոչը` ձախ փորոքը, մեծանում է (լայնանում է) և չի կարողանում արդյունավետորեն արյունն արտամղել սրտից: Թեև այս տեսակը կարող է ախտահարել բոլոր տարիքի մարդկանց, այն առավել հաճախ հանդիպում է միջին տարիքի մարդկանց մոտ և ավելի հավանական է, որ ախտահարի տղամարդկանց: Ամենատարածված պատճառը սրտի իշեմիկ հիվանդությունն է կամ սրտամկանի ինֆարկտը: Այնուամենայնիվ, դա կարող է առաջանալ նաև գենետիկ փոփոխություններով (մուտացիաներով):
• Հիպերտրոֆիկ կարդիոմիոպաթիա. այս տեսակը ներառում է սրտամկանի ոչ նորմալ հաստացումը (գերաճը), որը դժվարացնում է սրտի աշխատանքը: Այն հիմնականում ազդում է սրտի հիմնական պոմպային խոռոչի (ձախ փորոքի) մկանների վրա: Հիպերտրոֆիկ կարդիոմիոպաթիան կարող է զարգանալ ցանկացած տարիքում, սակայն վիճակն ավելի ծանր է, եթե առաջանում է մանկական տարիքում: Այս տեսակի կարդիոմիոպաթիա ունեցող մարդկանց մեծամասնությունն ունի հիվանդության ընտանեկան պատմություն (անամնեզ): Որոշ գենետիկ փոփոխություններ կապված են հիպերտրոֆիկ կարդիոմիոպաթիայի հետ:
• Ռեստրիկտիվ կարդիոմիոպաթիա. այս տեսակի դեպքում սրտամկանը դառնում են կարծր և պակաս առաձգական, ուստի այն չի կարող բավարար չափով ընդարձակվել և ձախ փորոքն արյունով լցնել սրտի կծկումների միջև: Կարդիոմիոպաթիայի այս ամենաքիչ տարածված տեսակը կարող է առաջանալ ցանկացած տարիքում, սակայն այն առավել հաճախ հանդիպում է տարեց մարդկանց մոտ: Ռեստրիկտիվ կարդիոմիոպաթիան կարող է առաջանալ առանց որևէ հայտնի պատճառի (իդիոպաթիկ), կամ օրգանիզմի որևէ այլ շրջանի՝ սրտի վրա ազդող հիվանդության հետևանքով, ինչպիսին է ամիլոիդոզը:
• Առիթմոգեն աջ փորոքային դիսպլազիա. կարդիոմիոպաթիայի այս հազվադեպ տեսակի ժամանակ սրտի ստորին աջ խոռոչի (աջ փորոքի) մկանը փոխարինվում է սպիական հյուսվածքով, որը կարող է հանգեցնել սրտի ռիթմի հետ կապված խնդիրների: Հաճախ դա պայմանավորված է գենետիկ փոփոխություններով:
• Չդասակարգված կարդիոմիոպաթիա. կարդիոմիոպաթիայի այլ տեսակները պատկանում են այս դասին:

Ռիսկի գործոններ

Կան մի շարք գործոններ, որոնք կարող են մեծացնել ձեր կարդիոմիոպաթիայի ռիսկը, ներառյալ՝

• կարդիոմիոպաթիայի, սրտային անբավարարության և հանկարծակի սրտի կանգի ընտանեկան պատմություն (անամնեզ)
• երկարաժամկետ բարձր արյան ճնշում (հիպերտենզիա)
• վիճակներ, որոնք ազդում են սրտի վրա, ներառյալ անցյալի սրտամկանի ինֆարկտը, սրտի իշեմիկ հիվանդությունը (իշեմիկ կարդիոմիոպաթիա) կամ սրտի վարակը
• գիրություն, որը ստիպում է սրտին ավելի ինտենսիվ աշխատել
• երկարաժամկետ ալկոհոլի չարաշահում
• ապօրինի թմրամիջոցների ապօրինի օգտագործում, ինչպիսիք են կոկաինը, ամֆետամինները և անաբոլիկ ստերոիդները
• քաղցկեղի բուժում քիմիաթերապիայի որոշ դեղամիջոցներով և ճառագայթմամբ:

Բազմաթիվ հիվանդություններ ևս բարձրացնում են կարդիոմիոպաթիայի ռիսկը, այդ թվում՝

• շաքարային դիաբետ
• վահանաձև գեղձի հիվանդություն
• օրգանիզմում ավելորդ երկաթի պահպանում (հեմոքրոմատոզ)
• ամիլոիդոզ
• սարկոիդոզ
• շարակցական հյուսվածքի խանգարումներ: