Բուժում - Մրսածություն և գրիպ

Սովորաբար, մեղմ ընթացքով սուր շնչառական վիրուսային վարակը (ՍՇՎՎ) և գրիպը մինչև 1 շաբաթվա ընթացքում ինքնուրույն լավանում են:

ՍՇՎՎ (ընդհանուր մրսածության) կամ գրիպի ախտանիշները զարգանալուց հետո 7-10 օրվա ընթացքում առանց որևէ բուժման, ինքնուրույն մեղմանում են:

Այսուամենայնիվ, այս ընթացքում կարող եք ինքներդ ձեռնարկել որոշ միջոցառումներ՝ ուղղված ձեր գանգատների և ախտանիշների մեղմացմանը, օրինակ՝

• ապահովեք հանգիստ պայմաններ և ցերեկվա ժամերի մեծ մասն անցկացնեք պառկած վիճակում (կիսաանկողնային ռեժիմ)
• խմեք շատ ջուր կամ ոչ ալկոհոլային հեղուկներ՝ ջրազրկումը կանխելու համար
• ձեզ տաք պահեք և խուսափեք միջանցիկ քամիներից
• ձեր սննդակարգը դարձնեք առողջ՝ բանջարեղեններով և մրգերով հարուստ
• հնարավոր բոլոր միջոցներով կանխեք ձեզ վրա ծխախոտի ծխի ազդեցությունը
• ինհալյացիա անեք տաք ջրի գոլորշիներով (օրինակ, բացեք տաք ցնցուղը (առանց ցնցուղի տակ մտնելու) և շնչեք առաջացած գոլորշին). սա կօգնի, որ ձեր փակ քիթը «բացվի»:

Իմացե՛ք ավելին մրսածության բուժման մասին:

Եթե ունեք կոկորդի ցավ, փորձեք՝

• ողողել ձեր ըմպանը գոլ թույլ աղաջրով, որից հետո թքեք այն
• խմել գոլ կամ սառույցով ջուր, չգազավորված ըմպելիքներ կամ հյութեր
• խմել (ոչ շատ) տաք ջուր՝ մեղրով և կիտրոնով:

Դեղատներում կան մրսածության և գրիպի դեմ դեղատոմս չպահանջող տարբեր դեղեր, որոնք կարող են մեղմացնել գանգատները և բարելավել ինքնազգացողությունը: Մինչև այդ դեղերն ընդունելը, ընթերցեք պիտակի հրահանգները և խորհրդակցեք բժշկի հետ:

Դուք պետք է դիմեք բժշկին, եթե մրսածության և գրիպի նշաններին ավելանում է թվարկված ախտանիշներից մեկնումեկը՝

• գանգատները շարունակվում են 10 օրից ավելի երկար
• հազը շարունակվում է 3 շաբաթից ավելի երկար
• չեք կարողանում կամ չեք ցանկանում ջուր կամ հեղուկներ խմել
• հաճախակի փսխում եք
• գանգատվում եք ուժեղ գլխացավերից
• մաշկը գունատված է
• ցերեկային ժամերին խիստ քնկոտ եք
• առկա են կրծքավանդակային ցավեր՝ հազալիս, շնչելիս կամ, առավել ևս, հանգիստ պայմաններում
• շնչառությունը դժվարացած է կամ հևում եք
• ունեք բարձր ջերմություն՝ տենդ, որն ուղեկցվում է ցանով
• անհանգստացած եք ձեր առողջական վիճակի վերաբերյալ։

Եթե ձեր մանկահասակ երեխան ունի ՍՇՎՎ կամ գրիպ, դիմեք բժշկին, եթե նա՝

• ունի որևէ քրոնիկ հիվանդություն
• ունի կայուն բարձր ջերմություն կամ տենդ
• հրաժարվում է սննդից (կամ կրծքի կաթից)
• ունի շնչարգելություն և հևոց
• առկա են ջրազրկման նշաններ:

Իմացե՛ք ավելին գրիպի բուժման մասին: