Skip to main content

Ախտանիշներ - Մրսածություն և գրիպ

Սուր շնչառական վիրուսային վարակների (ՍՇՎՎ) գանգատները հայտնի են շատերին:

ՍՇՎՎ (ընդհանուր մրսածության) ախտանիշները

ՍՇՎՎ ախտանիշներից են՝

  • կոկորդի ցավ
  • ջերմություն (38° C կամ ավելի բարձր)
  • փռշտոց
  • փակված կամ «հոսող» քիթ, քթի խոռոչի «լցվածություն» (հարբուխ)
  • հազ:

Եթե քթի լորձային արտադրությունը կանաչավուն կամ դեղնավուն է, սա ոչ թե հիվանդության ծանրացման կամ բակտերիալ վարակի նշան է, այլ հավանաբար վկայում է այն մասին, որ իմունային համակարգը պայքարում է վարակի դեմ: Սակայն, եթե գանգատները չեն բարելավվում 10 օրվա ընթացքում, պետք է դիմել բժշկին:

Իմացե՛ք ավելին մրսածության ախտանիշների մասին:

Գրիպի ախտանիշները

Գրիպի ախտանիշներից են՝

  • ջերմության կտրուկ բարձրացում՝ 38,5° C կամ ավելի բարձր
  • չոր, ամբողջ կրծքավանդակը ներառող հազ
  • գլխացավեր
  • հոգնածություն
  • դող և սարսուռ
  • մկանացավեր
  • վերջույթների կամ հոդերի ցավեր
  • փորլուծություն կամ ստամոքսի խանգարում
  • կոկորդի ցավ
  • փակված կամ «հոսող» քիթ, քթի խոռոչի «լցվածություն»
  • փռշտոցներ
  • ախորժակի կորուստ:

Գրիպն ունի ավելի բուռն և ավելի շատ գանգատներ ընդգրկող ընթացք, քան մրսածությունը:

Իմացե՛ք ավելին գրիպի ախտանիշների մասին:

Ե՞րբ դիմել բժշկին

Այցելեք ձեր բժշկին, եթե ՍՇՎՎ կամ գրիպի գանգատներին ավելանում են հետևյալ ախտանիշները՝

  • գանգատները շարունակվում են ավելի քան 10 օր
  • հազը շարունակվում է ավելի քան 3 շաբաթ
  • ի վիճակի չեք կամ չեք ցանկանում հեղուկներ խմել
  • առաջ են եկել հաճախակի փսխումներ
  • գլխացավերը դարձել են սոսկալի
  • գունատ եք և քնկոտ
  • ի հայտ են եկել կրծքավանդակային ցավեր
  • դժվարությամբ եք շնչում կամ ունեք հևոց
  • ունեք ցան և խիստ բարձր ջերմություն
  • անհանգստացած եք ձեր վիճակով:

Երեխաների դեպքում դիմեք նրա բժշկին, եթե մանկահասակ երեխայի մրսածության կամ գրիպի նշաններին ավելացել են սննդից (կամ կրծքի կաթից) հրաժարվելը, շնչարգելությունը (հևոցը) և ջրազրկման նշանները: Դիմեք մանկաբույժին նաև այն դեպքում, եթե երեխան ունի ուղեկցող որևէ քրոնիկ հիվանդություն:

Հոդվածը հրապարակվել է՝ 23-04-2018
Վերջին վերանայում՝ 06-04-2024