Ուղեղի ցնցում․ բարդություններ

Ուղեղի ցնցում․ բարդություններ

Մարդկանց մեծ մասը սովորաբար ուղեղի ցնցումից հետո ինքնուրույն և առանց որևէ բուժման լիարժեք վերականգնվում է։

Սակայն երբեմն ուղեղի ցնցումը կարող է բարդանալ տարբեր վիճակներով, և տիպիկ ախտանիշներին ավելանան նոր նշաններ կամ օրեր անց դրանք կրկին ի հայտ գան ավելի ծանր ընթացքով։

Ուղեղի ցնցման հավանական բարդությունները ներկայացվում են ստորև։

  • Հետտրավմատիկ գլխացավեր. որոշ մարդկանց մոտ գլխացավերը կարող են շարունակվել գլխի վնասվածքից շաբաթներ կամ նույնիսկ ամիսներ անց։
  • Հետտրավմատիկ վերտիգո. որոշ մարդկանց մոտ կարող են գլխապտույտը կամ վերտիգոն շարունակվել գլխի տրավմայից օրեր, շաբաթներ կամ նույնիսկ ամիսներ անց։ Վերտիգոն գլխապտույտի տեսակ է, որը նկարագրվում է որպես մարմնի կամ շրջապատող աշխարհի պտտողական շարժման զգացողություն, հատկապես, երբ դուք փոփոխում եք ձեր մարմնի դիրքը։
  • Հետցնցումային համախտանիշ․ որոշ մարդկանց մոտ գլխացավերը, գլխապտույտը և մտածողության դժվարացումը կարող են տևել ցնցումից հետո մի քանի օր։ Հազվադեպ այս ախտանիշները կարող են շարունակվել նաև շաբաթներ կամ ամիսներ։ Եթե դրանք շարունակվում են ավելի քան երեք ամիս, ապա նման վիճակը բնորոշվում է որպես հետցնցումային համախտանիշ:
  • Գլխուղեղի բազմակի վնասվածքների կուտակողական ազդեցություն. հավանական է, որ գլխուղեղի մեկ կամ մի քանի տրավմատիկ վնասվածքներ ստացած մարդիկ իրենց կյանքի ընթացքում ձեռք բերեն տևական, երբեմն նաև հարաճուն զարգացող գլխուղեղի գործունեության խանգարումներ, որոնք սահմանափակում են այդ մարդու առօրյա գործառույթները։ Ներկայումս այս խնդիրն ակտիվ հետազոտվում է։
  • Երկրորդ ազդեցության համախտանիշ. եթե ուղեղի ցնցումից լիարժեք չվերականգնված մարդը երկրորդ անգամ է ուղեղի ցնցում ստանում, ապա հազվադեպ կարող է զարգանալ արագ և սովորաբար մահվան ելքով ընթացող գլխուղեղի այտուց։ Ուղեղի ցնցումը գլխուղեղում առաջացնում է քիմիական նյութերի քանակական տեղաշարժեր և դրանց մակարդակների նորմալացումը տևում է շուրջ մեկ շաբաթ, թեև վերականգնման ժամանակաշրջանը կարող է տարբեր մարդկանց մոտ լինել տարբեր։ Կարևոր է, որ մարզիկները մինչև ուղեղի ցնցման նշանների լիակատար վերականգնումը չվերադառնան մարզումներին, առավել ևս՝ մրցամարտերին։

Հոդվածը վերանայվել է՝ 04-05-2021