Ախտորոշում - Ուղեղի ցնցում

Ձեր բժիշկը կգնահատի ձեր գանգատներն ու ախտանիշները, կուսումնասիրի ձեր հիվանդության պատմությունը (անամնեզ) և կանցկացնի նյարդաբանական քննություն:

Ուղեղի ցնցման գանգատներն ու ախտանիշները կարող են ի հայտ գալ վնասվածքից մի քանի ժամ կամ օրեր անց:

Հետազոտությունները, որոնք ձեր բժիշկը կարող է կատարել կամ առաջարկել, ներառում են նյարդաբանական քննություն, ճանաչողական (կոգնիտիվ) թեստավորում և պատկերային հետազոտություններ:

Նյարդաբանական քննություն

Գլխի վնասվածքի վերաբերյալ տարբեր հարցեր տալուց հետո բժիշկը կատարում է ձեր նյարդաբանական վիճակի գնահատում, որի ժամանակ ստուգում է ձեր՝

• տեսողությունը
• լսողությունը
• մկանային ուժը և զգացողությունները
• հավասարակշռությունը
• կորդինացիան
• ռեֆլեքսները:

Կոգնիտիվ գնահատում

Բժիշկը կարող է իրականացնել մի շարք թեստեր, որ գնահատի ձեր մտածողության (ճանաչողության) ու դատողության հմտությունները: Նման գնահատումը կարող է ներառել մի շարք գործոններ, այդ թվում ձեր՝

• հիշողությունը
• ուշադրության կենտրոնացումը
• տեղեկությունները վերհիշելու ունակությունը:

Պատկերային հետազոտություններ

Գլխուղեղի պատկերային հետազոտությունները կարող են առաջարկվել որոշ մարդկանց, ում մոտ ուղեղի ցնցումից հետո ի հայտ են եկել սուր գլխացավեր, ցնցումներ, կրկնակի փսխումներ կամ եթե գանգատներն ու ախտանիշները ժամանակի ընթացքում վատթարանում են: Այս հետազոտությունները թույլ են տալիս հասկանալ գլխուղեղի վնասման տեսակն ու բնույթը, հայտնաբերել հնարավոր ներուղեղային արյունահոսությունները կամ այտուցը: Նման դեպքերում բժիշկը կարող է նշանակել գլխի՝

• համակարգչային տոմոգրաֆիա (ԿՏ)
• մագնիսա-ռեզոնանսային տոմոգրաֆիա (ՄՌՏ):

Հսկողություն

Միջին ծանրության կամ ծանր ուղեղի ցնցումից հետո ձեր բժիշկը կարող է առաջարկել, որ մնաք հիվանդանոցային հսկողության ներքո: Նման դեպքում միաժամանակ կազմակերպվում է ձեր շուրջօրյա հսկողությունը և գործիքային հետազոտությունները:

Թեթև ցնցման հսկողությունը բժշկի և ձեր հայեցողությամբ կարող է կազմակերպվել տնային պայմաններում: