Պատճառներ - Սրտի իշեմիկ հիվանդություն

ՍԻՀ սկսվում է, երբ սրտամկանը սնուցող պսակային զարկերակների ներքին պատին սկսում են կուտակվել ճարպեր, խոլեստերիններ և այլ նյութեր: Այսպիսի կուտակումը կոչվում է վահանիկ: Վահանիկը կարող է բերել զարկերակների նեղացման, որի արդյունքում արգելափակվում է արյան հոսքը: Որոշ դեպքերում վահանիկը նաև կարող է պատռվել՝ առաջացնելով արյան մակարդուկ:

Ըստ համընդհանուր ընդունված տեսության, սրտի իշեմիկ հիվանդությունը (ՍԻՀ) սկսվում է սրտամկանը սնուցող պսակային զարկերակի ներքին թաղանթի ախտահարման կամ վնասման պատճառով, որի արդյունքում այդ զարկերակի լուսանցքը նեղանում է:

Բարձր խոլեստերինից բացի պսակային զարկերակը նաև կարող է ախտահարվել հետևյալ պատճառներից՝

• դիաբետ կամ ինսուլինակայունություն
• բարձր արյան ճնշում (հիպերտենզիա)
• անբավարար ֆիզիկական ակտիվություն («նստակյաց ապրելակերպ»)
• ծխախոտի օգտագործում:

Ռիսկի գործոններ

ՍԻՀ ռիսկի գործոնների մի մասը մեր վերահսկողությունից դուրս է, մինչդեռ մյուսների ազդեցությունը կարելի է մեղմացնել կամ վերացնել:

ՍԻՀ տարածված է: Տարիքը, ժառանգականությունը, այլ առողջական խնդիրները և ապրելակերպը կարող են ազդել սրտի զարկերակների առողջական վիճակի վրա:

ՍԻՀ ռիսկի գործոնները ներառում են հետևյալը:

• Տարիք. տարիքն առնելը բարձրացնում է զարկերակների ախտահարման և նեղացման ռիսկը:
• Սեռ. ընդհանուր առմամբ տղամարդիկ ենթարկվում են ՍԻՀ ավելի բարձր ռիսկի, քան կանայք: Այնուամենայնիվ, կանանց մոտ ռիսկը բարձրանում է դաշտանադադարից հետո:
• Ընտանեկան պատմություն. սրտային հիվանդության վերաբերյալ ընտանեկան պատմությունը կարող է բարձրացնել ՍԻՀ ռիսկը: Սա առանձնահատուկ նշանակություն է ստանում, երբ արյունակից հարազատի մոտ սրտային հիվանդությունը զարգացել է վաղ տարիքում: ՍԻՀ ռիսկն առավել բարձր է, եթե ձեր հայրը կամ եղբայրն ունեցել են սրտային հիվանդություն մինչև 55 տարեկանը կամ ձեր մայրը կամ քույրն ունեցել են նույն հիվանդությունը մինչև 65 տարեկանը:
• Ծխախոտի օգտագործում. եթե ծխող եք, օր առաջ դադարեցրեք այն: Ծխելը վատ է անդրադառնում սրտի և անոթների առողջական վիճակի վրա: Ծխող մարդկանց մոտ զգալիորեն բարձրանում է սրտային հիվանդության ռիսկը: Երկրորդային ծխի ազդեցությանը ենթարկվելը նույնպես բարձրացնում է ռիսկը:
• Բարձր արյան ճնշում (հիպերտենզիա). չվերահսկվող բարձր արյան ճնշումը կարող է առաջացնել զարկերակների պատի հաստացում և պնդացում՝ նեղացնելով անոթի լուսանցքը և դանդաղեցնելով արյան հոսքը:
• Բարձր խոլեստերին. արյան «վատ» խոլեստերինի բարձր մակարդակները կարող են բարձրացնել աթերոսկլերոզի ռիսկը: «Վատ» խոլեստերին է կոչվում ցածր խտության լիպոպրոտեիդների (ՑԽԼ) խոլեստերինը: Միևնույն ժամանակ, «լավ» խոլեստերինի՝ բարձր խտության լիպոպրոտեիդների (ԲԽԼ) խոլեստերինի անբավարար քանակները նույնպես կարող է նպաստել աթերոսկլերոզի զարգացմանը:
• Դիաբետ. դիաբետը բարձրացնում է ՍԻՀ ռիսկը: 2-րդ տիպի դիաբետը և ՍԻՀ ունեն համանման ռիսկի գործոններ, ինչպիսիք են գիրությունը և բարձր արյան ճնշումը:
• Ավելցուկային քաշ կամ գիրություն. ավելցուկային քաշը վատ է ընդհանուր առողջության համար: Գիրությունը կարող է հանգեցնել 2-րդ տիպի դիաբետի և բարձր արյան ճնշման: Հարցրեք բժշկից, թե որն է ձեր «առողջ» քաշը:
• Քրոնիկ երիկամային հիվանդություն. երկարաժամկետ երիկամային հիվանդություն ունենալը բարձրացնում է ՍԻՀ զարգացման ռիսկը:
• Անբավարար ֆիզիկական ակտիվություն. ֆիզիկապես ակտիվ լինելը կարևոր է լավ առողջության համար: Հակառակ դրան, անբավարար ֆիզիկական ակտիվությունը («նստակյաց ապրելակերպ») կապված է ՍԻՀ և վերջինիս որոշ ռիսկի գործոնների հետ:
• Բարձր սթրես. հուզական սթրեսը կարող է վնասել զարկերակները և վատթարացնել ՍԻՀ այլ ռիսկի գործոնները:
• Անառողջ սննդակարգ. մեծ քանակներով հագեցած ճարպեր, «տրանս» ճարպեր, աղ և շաքար պարունակող սննդամթերքների օգտագործումը կարող է բարձրացնել ՍԻՀ ռիսկը:
• Ալկոհոլի օգտագործում. ալկոհոլի վնասակար օգտագործումը կամ չարաշահումը կարող է բերել սրտամկանի ախտահարման: Այն նաև կարող է վատթարացնել ՍԻՀ այլ ռիսկի գործոնները:
• Քնի քանակ. խիստ քիչ կամ խիստ շատ քունը՝ երկուսն էլ կապված են սրտային հիվանդության ռիսկի բարձրացման հետ:

Ռիսկի գործոնները հաճախ հանդես են գալիս միասին: Դրանցից մեկը կարող է նպաստել մյուսի դրսևորմանը:

Միասին հանդես գալով, որոշ ռիսկի գործոններ էլ ավելի են բարձրացնում ՍԻՀ զարգացման ռիսկը: Օրինակ, բարձր արյան ճնշումը, բարձր տրիգլիցերիդները, ցածր ԲԽԼ կամ «լավ» խոլեստերինը, ինսուլինի բարձր մակարդակները և որովայնային տիպի ճարպակալումը միատեղող մետաբոլիկ համախտանիշը հստակորեն բարձրացնում է ՍԻՀ ռիսկը:

Երբեմն ՍԻՀ զարգանում է առանց որևէ «դասական» ռիսկի գործոնի: ՍԻՀ այլ հնարավոր ռիսկի գործոնները կարող են ներառել ստորև թվարկվածները:

• Քնի ընթացքում շնչառության դադարներ (քնի օբստրուկտիվ ապնոէ). այս հիվանդությունն ընթանում է քնած ժամանակ շնչառության կրկնվող կարճատև դադարներով, որոնց ընթացքում կտրուկ նվազում է արյան մեջ թթվածնի մակարդակը: Սիրտը ստիպված է ավելի լարված աշխատել: Արյան ճնշումը բարձրանում է:
• Բարձր զգայունության C-ռեակտիվ սպիտակուց (hs-CRP). այս սպիտակուցի քանակն աճում է, երբ օրգանիզմի որևէ շրջանում առկա է բորբոքում, այս սպիտակուցն ի հայտ է գալիս սովորականից ավելի բարձր քանակներով: Բարձր hs-CRP մակարդակները կարող են դառնալ սրտային հիվանդության ռիսկի գործոն: Համընդհանուր կարծիք կա, որ պսակային զարկերակների նեղացումն ուղեկցվում է արյան մեջ hs-CRP մակարդակի բարձրացմամբ:
• Բարձր տրիգլիցերիդներ. սա արյան ճարպի (լիպիդ) տեսակ է, որի բարձր մակարդակները կարող են բարձրացնել ՍԻՀ ռիսկը (մասնավորապես, կանանց շրջանում):
• Հոմոցիստեին. հոմոցիստեինը ամինաթթու է, որն օրգանիզմն օգտագործում է սպիտակուցների արտադրության և հյուսվածքների աճի և պահպանման համար: Սակայն հոմոցիստեինի բարձր մակարդակները կարող են բարձրացնել ՍԻՀ ռիսկը:
• Պրեէկլամպսիա. պրեէկլամպսիան հղիության բարդություն է, որն առաջացնելով բարձր արյան ճնշում և մեզում սպիտակուցի քանակի բարձրացում: Ծննդաբերությունից հետո, ավելի ուշ, սա կարող է բարձրացնել սրտային հիվանդության ռիսկը:
• Հղիության այլ բարդություններ. հղիության ընթացքում դիաբետը կամ բարձր արյան ճնշումը նույնպես ՍԻՀ հայտնի ռիսկի գործոններ են:
• Որոշ աուտոիմուն հիվանդություններ. ռևմատոիդ արթրիտ և համակարգային կարմիր գայլախտ (և այլ բորբոքային հիվանդություններ) ունեցող մարդիկ ենթարկվում են աթերոսկլերոզի ավելի բարձր ռիսկի: