Դեմենցիա. պատճառներ

Դեմենցիա. պատճառներ

Դեմենցիայի ժամանակ տեղի է ունենում ուղեղի նյարդային բջիջների վնասում, ընդ որում, նման ախտահարումը կարող է ընթանալ ուղեղի տարբեր շրջաններում։

Կախված նրանից, թե ուղեղի որ շրջանն է առավել ախտահարված, դեմենցիան դրսևորվում է համապատասխան ախտանիշներով։

Դեմենցիայի ռիսկի գործոնները

Դեմենցիայի զարգացմանը կարող են նպաստել բազմաթիվ գործոններ, որոնց մի մասը մեր վերահսկողությունից դուրս է։ Սակայն, կան նաև բուժման կամ ապրելակերպի բարելավման միջոցով փոփոխվող գործոններ, որոնց ազդեցությունը մեղմացնելով կարելի է կրճատել դեմենցիայի առաջացման հավանականությունը։

Չձևափոխվող ռիսկի գործոններ

  • Տարիք. դեմենցիայի ռիսկը բարձրանում է 65 տարեկան և ավելի բարձր տարիքում։ Սակայն սա չի նշանակում, որ ավելի երիտասարդ տարիքում դեմենցիա չի կարող զարգանալ։
  • Ընտանեկան պատմություն. ժառանգականությունը կարող է քիչ բարձրացնել դեմենցիայի ռիսկը։
  • Դաունի համախտանիշ. Դաունի հիվանդությամբ բազմաթիվ մարդկանց մոտ միջին տարիքում կարող է զարգանալ վաղ սկսվող Ալցհեյմերի հիվանդություն։
  • Կոգնիտիվ խանգարում. սա ներառում է հիշողության որոշակի խանգարումը, որը, սակայն առօրյա գործառույթների վրա չի ազդում։ Նման դեպքերը բերում են դեմենցիայի ռիսկի բարձրացման։

Ձևափոխելի ռիսկի գործոններ

Այս գործոնները կարող են ձեր կողմից վերահսկվել, որի շնորհիվ դեմենցիայի զարգացման ռիսկը որոշակիորեն նվազում է։

  • Ալկոհոլի չարաշահում. Եթե դուք ալկոհոլն օգտագործում եք մեծ քանակներով և հաճախակի, կարող է բարձրանալ դեմենցիայի զարգացման ռիսկը։ Սակայն, որոշ հետազոտություններ ապացուցել են, որ ալկոհոլի չափավոր օգտագործումն, ընդհակառակը, ունի որոշակի պաշտպանող ազդեցություն։
  • Սրտանոթային ռիսկի գործոններ. բարձր արյան ճնշումը (հիպերտենզիա), բարձր խոլեսթերինը, աթերոսկլերոզը և գիրությունը կարող են նպաստել դեմենցիայի զարգացման ռիսկի բարձրացմանը։
  • Դեպրեսիա. թեև լիարժեք ուսումնասիրված չլինելուն, սակայն որոշ տվյալներ կան այն մասին, որ կյանքի ուշ շրջաններում զարգացող դեպրեսիան մեծացնում է դեմենցիայի առաջացման ռիսկը։
  • Դիաբետ. եթե ունեք դիաբետ, ձեզ մոտ դեմենցիայի առաջացման ռիսկը բարձրացած է, հատկապես, եթե դիաբետը լավ չի վերահսկվում։
  • Ծխախոտի օգտագործում. ծխելը տարիների ընթացքում ախտահարում է արյունատար անոթները և կարող է բարձրացնել դեմենցիայի զարգացման ռիսկը։
  • Քնի ապնոէ. գիշերները խռմփացնող և քնի ապնոէի դրվագներով մարկանց մոտ կարող է զարգանալ հիշողության կորուստ։ Առողջ քունը վերականգնելիս հիշողությունն աստիճանաբար բարելավվում է։

Հոդվածը վերանայվել է՝ 25-04-2021