Դեմենցիա. ախտորոշում

Դեմենցիա. ախտորոշում

Դեմենցիայի ախտորոշումը և տեսակի ճշտումը կարող է լուրջ դժվարություն առաջացնել, քանի որ այս հիվանդությունների ժամանակ զարգացող նշանները և ախտանիշները կարող են դրսևորվել նաև այլ պատճառներով, այդ թվում՝ հոգեկան այլ հիվանդությունների ժամանակ։

Դեմենցիայի ախտորոշումը պահանջում է, որ հոգեկան գործունեության առնվազն երկու հիմնական տեսակ տուժած լինի (հիշողություն, խոսք, ուշադրության կենտրոնացում, պատճառաբանություն և խնդիրների լուծում, տեսողական ընկալում)։

Բժիշկն ուսումնասիրում է բժշկական բոլոր փաստաթղթերը, հետազոտում հիվանդության պատմությունը, զրուցում հիվանդի ընտանիքի անդամների հետ, անցկացնում նրա ֆիզիկական զննում և հոգեբանական վիճակի գնահատում։

Գոյություն չունի դեմենցիան ախտորոշող որևէ եզակի թեստ, ուստի, եթե բժիշկը ձեզ մոտ կասկածում է դեմենցիայի որևէ տեսակ, շատ հավանական է, որ նա ձեզ ուղեգրի մի շարք լրացուցիչ հետազոտությունների։

Կոգնիտիվ և նյարդահոգեբանական թեստեր

Բժիշկը գնահատում է ձեր մտածողության (կոգնիտիվ) գործունեությունը՝ հասկանալու ձեր մտածողության, կողմնորոշման, դատողության, լեզվի և ուշադրության տուժման աստիճանը:

Նյարդաբանական գնահատում

Բժիշկը գնահատում է ձեր հիշողությունը, խոսքը, տեսողական ընկալումը, ուշադրության կենտրոնացման ունակությունը, խնդիրներ լուծելու ունակությունը, շարժունակությունը, զգացողությունները, հավասարակշռությունը, ռեֆլեքսները և այլն:

Գլխուղեղի պատկերման թեստեր

Բժկիշկը կարող է նշանակել գլխի համակարգչային շերտագիր (ՀՏ կամ CT) կամ մագնիսա-ռեզոնանսային տոմոգրաֆիա (ՄՌՏ), որպեսզի ժխտի գլխուղեղի այլ օրգանական հիվանդությունների հավանական առկայությունը (օրինակ՝ ինսուլտ, ուռուցք կամ հիդրոցեֆալիա):

Ձեր գլխուղեղի ակտիվության առանձնահատկությունները գնահատելու կամ գլխուղեղում ամիլիոդ և Այլցեյմերի հիվանդությանը բնորոշ այլ սպիտակուցներ հայտնաբերելու համար հազվադեպ կարող է առաջարկվել նաև գլխուղեղի պոզիտրոնային էմիսիոն տոմոգրաֆիա (ՊԷՏ):

Լաբորատոր թեստեր

Սովորական արյան հետազոտությունները կարող են հայտնաբերել գլխուղեղի գործունեությունը խաթարող այլ պատճառներ, օրինակ՝ վիտամին B12-ի դեֆիցիտ, վահանաձև գեղձի թերգործունեություն: Որոշ դեպքերում ձեզ կարող են առաջարկել նաև ողնուղեղային հեղուկի հետազոտություն, օրինակ՝ վարակային բորբոքումների հարուցիչներ կամ որոշ դեգեներատիվ հիվանդությունների մարկերներ որոնելիս:

Հոգեկան գնահատում

Որոշ դեպքերում անհրաժեշտ է լինում ախտորոշման գործընթացում ներգրավել նաև հոգեբույժ, որպեսզի պարզվի, թե արդյոք ձեր ախտանիշների առաջնային պատճառը դեպրեսիան կամ հոգեկան այլ հիվանդությունն է:

Հոդվածը վերանայվել է՝ 10-06-2020