Գրադարան

Դաունի համախտանիշ. բարդություններ

Դաունի համախտանիշ. բարդություններ

Time Read 2 րոպե

Դաունի համախտանիշ ունեցող մարդիկ կարող են ունենալ բազմաթիվ տարբեր բարդություններ, որոնցից մի քանիսը տարիքի հետ դառնում են ավելի ցայտուն:

Այս բարդությունները կարող են ներառել հետևյալը:

  • Սրտի արատներ. Դաունի համախտանիշով երեխաների մոտ կեսը ծնվում է սրտի բնածին արատներով: Սրտային այս խնդիրները կարող են վտանգավոր լինել կյանքի համար և կարող են պահանջել վիրահատություն վաղ մանկության շրջանում:
  • Ստամոքս-աղիքային խողովակի արատներ. ստամոքս-աղիքային շեղումները հանդիպում են Դաունի համախտանիշով որոշ երեխաների մոտ և կարող են ներառել աղիների, կերակրափողի և հետանցքի անոմալիաներ: Մարսողական խնդիրների առաջացման ռիսկը, ինչպիսիք են ստամոքս-աղիքային խողովակի խցանումը, այրոցքը (գաստրոէզոֆագեալ ռեֆլյուքս) կամ ցելիական, կարող է մեծանալ:
  • Իմունային խանգարումներ. իմունային համակարգի շեղումների պատճառով Դաունի համախտանիշ ունեցող մարդկանց մոտ առկա է աուտոիմուն խանգարումների, քաղցկեղի որոշ ձևերի և վարակիչ հիվանդությունների, օրինակ՝ թոքաբորբի զարգացման ավելի բարձր ռիսկ:
  • Քնի ապնոէ. փափուկ հյուսվածքների և դեմքի ոսկրերի փոփոխությունների պատճառով, որոնք հանգեցնում են վերին շնչուղիների նեղացմանը կամ խցանմանը, Դաունի համախտանիշով երեխաներն ու չափահասները քնի օբստրուկտիվ ապնոէի ավելի մեծ ռիսկի տակ են:
  • Գիրություն. Դաունի համախտանիշով մարդիկ ավելի մեծ հակվածություն ունեն գիրանալու՝ համեմատած ընդհանուր բնակչության հետ։
  • Ողնաշարի խնդիրներ. Դաունի համախտանիշով որոշ մարդկանց մոտ կարող է առաջանալ պարանոցի վերին երկու ողերի սխալ դասավորություն (ատլանտոաքսիալ անկայունություն): Այս վիճակը պարանոցի գերլարվածության դեպքում նրանց ողնուղեղի ծանր վնասվածքի վտանգի տակ է դնում:
  • Լեյկոզ. Դաունի համախտանիշ ունեցող մանկահասակ երեխաների մոտ մեծանում է լեյկոզով հիվանդանալու ռիսկը:
  • Դեմենցիա (թուլամտություն). Դաունի համախտանիշով մարդկանց մոտ դեմենցիայի ռիսկը զգալիորեն մեծանում է: Գանգատներն ու ախտանշանները կարող են սկսվել մոտ 50 տարեկանում: Դաունի համախտանիշ ունենալը նաև մեծացնում է Ալցհեյմերի հիվանդության զարգացման ռիսկը:
  • Այլ խնդիրներ. Դաունի համախտանիշը նաև կարող է կապված լինել այլ առողջական վիճակների հետ, այդ թվում՝ ներզատական (էնդոկրին) խնդիրներ (օրինակ՝ թերակտիվ վահանաձև գեղձ, կյանքի առաջին տարիներինարտաքին սեռական օրգանների զարգացման հապաղում, որը կարգավորվում է սեռական հասունացման շրջանում), ատամնաշարի անոմալիաներ (օրինակ՝ կարիես և վաղաժամ ընկնելը, ատամների հայտնվելու հերթականության խախտում, որը հաճախ ուշանում է), ցնցումներ, ականջի վարակներ և լսողության և տեսողության հետ կապված խնդիրներ:

Դաունի համախտանիշ ունեցող մարդկանց համար սովորական բուժօգնություն ստանալը և անհրաժեշտության դեպքում առկա խնդիրների բուժումը առողջ ապրելակերպի հետ միասին կարող են օգտակար լինել:

Կյանքի տևողություն

Դաունի համախտանիշ ունեցող մարդկանց կյանքի տևողությունը զգալիորեն աճել է: Այսօր Դաունի համախտանիշ ունեցողը կարող է ակնկալել ապրելու ավելի քան 60 տարի՝ կախված ուղեկցող առողջական խնդիրների ծանրության աստիճանից:

Հոդվածը տեղադրվել է՝ 23-05-2023 վերանայվել է՝ 23-05-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով