Բուժում - Դիսֆագիա

Դիսֆագիայի բուժումը կախված է ձեր կուլ տալու խանգարման տեսակից կամ պատճառից:

Բերանըմպանային (օրոֆարինգեալ) դիսֆագիա

Բերանըմպանային դիսֆագիայի դեպքում ձեր բժիշկը կարող է ձեզ ուղղորդել խոսքի կամ կլման թերապևտի մոտ: Թերապիան կարող է ներառել հետևյալը:

• Վարժությունների սովորում. որոշ վարժություններ կարող են օգնել ձեր կուլ տալու մկանների համակարգմանը կամ այն նյարդերի վերականգնմանը, որոնք մասնակցում են կուլ տալու ռեֆլեքսին:
• Կուլ տալու տեխնիկայի սովորում. դուք նաև կարող եք սովորել, թե ինչպես ուտելիքը դնել ձեր բերանում կամ ինչ դիրքում պահել ձեր մարմինը և գլուխը, որ ձեր կուլ տալը հեշտանա: Վարժությունները և կուլ տալու նոր մեթոդները կարող են օգնել, եթե ձեր դիսֆագիան առաջացել է նյարդաբանական խնդիրներից, ինչպիսիք են Ալցհեյմերի հիվանդությունը կամ Պարկինսոնի հիվանդությունը:

Կերակրափողային (էզոֆագեալ) դիսֆագիա

Կերակրափողային դիսֆագիայի բուժման մոտեցումները կարող են ներառել հետևյալը:

• Կերակրափողի լայնացում. կերակրափողի սֆինտերի (ախալազիա) կամ կերակրափողի նեղացման դեպքում ձեր բժիշկը կարող է օգտագործել էնդոսկոպ, որին կցված է հատուկ փուչիկ, որ նրբորեն ձգի և ընդլայնի ձեր կերակրափողը կամ անցկացնի ճկուն խողովակ կամ խողովակներ՝ կերակրափողը ձգելու համար (լայնացում):
• Վիրահատություն. կերակրափողի ուռուցքի, ախալազիայի կամ ըմպանկերակրափողային (ֆարինգոէզոֆագալ) դիվերտիկուլի դեպքում ձեզ կարող է անհրաժեշտ լինել վիրահատություն՝ ձեր կերակրափողի անցանելիությունը վերականգնելու համար:
• Դեղորայք. գաստրոէզոֆագեալ ռեֆլյուքս հիվանդության (ԳԷՌՀ) հետ կապված կուլ տալու դժվարությունը կարող է բուժվել ձեր բժշկի նշանակած բերանային (օրալ) դեղամիջոցներով՝ ստամոքսի թթվայնությունը նվազեցնելու համար: Ձեզ կարող է անհրաժեշտ լինել երկար ժամանակ ընդունել այս դեղամիջոցները: Կորտիկոստերոիդները կարող են առաջարկվել էոզինոֆիլային էզոֆագիտի դեպքում: Կերակրափողի կծկանքի (սպազմի) դեպքում հարթ մկանները թուլացնող դեղամիջոցները (միոռելաքսանտներ) կարող են օգնել:
• Սննդակարգ. կախված դիսֆագիայի պատճառներից, ձեր բժիշկը կարող է նշանակել հատուկ սննդակարգ՝ ձեր ախտանիշների վերացման կամ մեղմացման համար: Եթե ​​ունեք էոզինոֆիլային էզոֆագիտ, որպես բուժում կարող եք օգտագործել հատուկ սննդակարգ:

Սուր դիսֆագիա

Եթե ​​կուլ տալու դժվարությունը խանգարում է ձեզ բավականաչափ ուտել և խմել, և բուժումը թույլ չի տալիս ապահով կուլ տալ, ձեր բժիշկը կարող է խորհուրդ տալ կերակրման խողովակ (զոնդ): Սնուցող խողովակն ապահովում է սննդանյութեր՝ առանց կուլ տալու անհրաժեշտության:

Վիրահատական բուժումներ

Վիրահատությունը կարող է անհրաժեշտ լինել կոկորդի նեղացման կամ խցանումների հետևանքով առաջացած դիսֆագիան վերացնելու կամ մեղմացնելու համար, ներառյալ ոսկրային աճը, ձայնալարերի կաթվածը, ըմպանկերակրափողային (ֆարինգոէզոֆագալ) դիվերտիկուլը, ԳԷՌԴ-ը և ախալազիան, կամ կերակրափողի քաղցկեղը բուժելու համար: Խոսքի և կուլ տալու թերապիան սովորաբար օգտակար է վիրահատությունից հետո:

Վիրահատական ​​բուժման տեսակը կախված է դիսֆագիայի պատճառներից։ Որոշ օրինակներ ներկայացված են ստորև:

• Հելլերի լապարոսկոպիկ միոտոմիա. սա ներառում է կերակրափողի ստորին ծայրի մկանների (սֆինտերի) կտրումը, երբ այն չի կարողանում բացվել և ախալազիա ունեցող մարդկանց սնունդը ստամոքս բաց թողնել:
• Պերօրալ էնդոսկոպիկ միոտոմիա (POEM). եթե ունեք ախալազիա, վիրաբույժը կամ գաստրոէնտերոլոգն օգտագործում են էնդոսկոպ, որը տեղադրվում է բերանի միջով և կոկորդով` կերակրափողի ներսում լորձաթաղանթի կտրվածք անելու համար: Այնուհետև, ինչպես Հելլերի միոտոմիայի դեպքում, վիրաբույժը կամ գաստրոէնտերոլոգը հատում են մկանը կերակրափողի սֆինկտերի ստորին ծայրում:
• Կերակրափողի լայնացում. բժիշկը լուսավորված խողովակ (էնդոսկոպ) է մտցնում կերակրափողի մեջ և փչում է կցված փուչիկը, որ այն ձգվի (լայնանա): Այս բուժումը կիրառվում է կերակրափողի վերջում գտնվող սֆինկտերային մկանների կծկանքի (ախալազիա), կերակրափողի նեղացման (կերակրափողի ստրիկտուրայի), կերակրափողի և ստամոքսի միացման տեղում գտնվող հյուսվածքի ոչ նորմալ օղակի (Շատցկիի օղակ) և շարժունակության խանգարումների համար։ Տարբեր տրամագծով երկար ճկուն խողովակները նույնպես կարող են բերանի միջով մտցվել կերակրափող՝ նեղացումները և օղակները բուժելու համար:
• Ստենտի տեղադրում. բժիշկը նաև կարող է տեղադրել մետաղական կամ պլաստիկ խողովակ (ստենտ) նեղացող կամ խցանված կերակրափողը բացելու համար: Որոշ ստենտներ մշտական ​​են, օրինակ՝ կերակրափողի քաղցկեղով հիվանդ մարդկանց համար, իսկ մյուսները հեռացվում են ավելի ուշ:
• ՕնաբոտուլինումտոքսինA. սա կարող է ներարկվել կերակրափողիվերջում գտնվող մկանների մեջ (սֆինտերի), որ այն թուլանա՝ բարելավելով ախալազիայի ժամանակ կուլ տալու գործընթացը: Այն ավելի քիչ ինվազիվ է, քան վիրահատությունը: Այնուամենայնիվ, այս մեթոդը կարող է պահանջել կրկնակի ներարկումներ: Բուժման այս մեթոդը դեռ ունեի ավելի շատ հետազոտության կարիք: