Ախտանիշներ - Էնդոկարդիտ

Էնդոկարդիտի ախտանիշները կարող են տարբեր անձանց մոտ լինել տարբեր:

Էնդոկարդիտը կարող է զարգանալ դանդաղորեն կամ հանկարծակի: Դա կախված է վարակի պատճառ հանդիսացող մանրէների տեսակից և նրանից, թե արդյոք կան սրտի այլ խնդիրներ:

Էնդոկարդիտի ընդհանուր ախտանիշները ներառում են՝

• հոդերի և մկանների ցավ
• կրծքավանդակի ցավ, երբ դուք շնչում եք
• հոգնածություն
• գրիպիանման ախտանիշներ, ինչպիսիք են ջերմությունը և դողը
• գիշերային քրտնարտադրություն
• շնչարգելություն և հևոց
• ոտնաթաթերի, ոտքերի կամ որովայնի այտուցվածություն
• սրտում նոր կամ փոփոխված խզզող հնչյուններ (սրտի աղմուկ):

Էնդոկարդիտի ավելի քիչ տարածված ախտանիշները կարող են ներառել`

• անբացատրելի քաշի կորուստ
• արյուն մեզի մեջ (հեմատուրիա)
• ձախ կողոսկրի տակ (փայծաղի) ցավոտություն
• անցավ կարմիր, մանուշակագույն կամ շագանակագույն հարթ բծեր ոտքերի ներքևի մասում կամ ձեռքերի ափերին (Ջեյնուեյի վնասվածքներ)
• ցավոտ կարմիր կամ մանուշակագույն բշտիկներ կամ մուգ մաշկի բծեր (հիպերպիգմենտացված) մատների կամ ոտքերի ծայրերին (Օսլերի հանգույցներ)
• մանուշակագույն, կարմիր կամ շագանակագույն կլոր բծեր մաշկի վրա (պետեխիա), աչքերի սպիտակուցներում կամ բերանի ներսում:

Ե՞րբ դիմել բժշկին

Եթե ​​ունեք էնդոկարդիտի ախտանիշներ, հնարավորինս շուտ դիմեք ձեր բժշկին, հատկապես, եթե ունեք սրտի բնածին արատ կամ էնդոկարդիտի պատմություն (անամնեզ): Ավելի պակաս ծանր վիճաները կարող են առաջացնել նմանատիպ գանգատներ և ախտանիշներ: Ախտորոշման համար անհրաժեշտ է բժշկի կողմից պատշաճ գնահատում:

Եթե ​​ձեզ մոտ էնդոկարդիտ է ախտորոշվել և ունեք հետևյալ ախտանիշներից որևէ մեկը, տեղեկացրեք ձեր բժշկին: Այս ախտանիշները կարող են նշանակել, որ վարակը վատթարանում է՝

• դող և սարսուռ
• ջերմություն
• գլխացավեր
• հոդացավեր
• շնչարգելություն և հևոց: