Բարդություններ - Էպիլեպսիա

Որոշ դեպքերում ցնցումային նոպան կարող է բերել մի իրավիճակի, որը վտանգ է ներկայացնում ինչպես ձեզ, այնպես էլ շրջապատի մարդկանց:

Էպիլեպսիայի ավելի հաճախ հանդիպող բարդությունները ներկայացված են ստորև:

• Վայր ընկնելը և վնասվածքներ. ցնցման սկզբում վայր ընկնելով էպիլեպսիայով մարդը կարող է վնասել իր գլուխը կամ ստանալ տարբեր կոտրվածքներ:
• Ջրախեղդություն. եթե ունեք էպիլեպսիա, լողի կամ լողանալու ժամանակ խեղդվելու հավանականությունը 13-19 անգամ ավելի մեծ է, քան մնացած բնակչությանը, քանի որ հնարավոր է ցնցում ունենալ ջրի մեջ:
• Ավտովթարներ և դժբախտ պատահարներ. ցնցումը, որն առաջացնում է գիտակցության կամ վերահսկողության կորուստ, կարող է վտանգավոր լինել, եթե դուք մեքենա եք վարում կամ աշխատում եք սարքավորումների վրա: Տարբեր երկրներում այս բարդությունը հաշվի առնելով էպիլեպսիայով անձին վարորդական իրավունքից ժամանակավորապես զրկում են՝ մինչև տևական ժամանակի ընթացքում կբացակայեն նոր ցնցումները:
• Հղիության բարդություններ. հղի կնոջ մոտ ցնցումները կարող են վտանգ ներկայացնել ինչպես կնոջ, այնպես էլ չծնված երեխայի համար: Որոշ հակաէպիլեպտիկ (հակացնցումային) դեղեր իրենց հերթին կարող են բարձրացնել բնածին արատների հավանականությունը: Ուստի, եթե ունեք էպիլեպսիա և ցանկանում եք հղիանալ, քննարկեք այս հարցը ձեր բուժող բժշկի հետ:
• Հուզական առողջության խնդիրներ. Էպիլեպսիա ունեցող մարդիկ ավելի հաճախ են ունենում հոգեբանական խնդիրներ, հատկապես դեպրեսիա, անհանգստություն, ինքնասպանության մտքեր ու վարքագծեր: Խնդիրները կարող են կապված լինել ինչպես բուն հիվանդությանը դիմակայելու դժվարությունների, այնպես էլ դեղերի կողմնակի ազդեցությունների հետ, սակայն նույնիսկ լավ վերահսկվող էպիլեպսիայով մարդիկ ավելի մեծ ռիսկի են ենթարկվում:

Էպիլեպսիայի կյանքին սպառնացող այլ բարդությունները հազվադեպ են:

• Էպիլեպտիկ վիճակ (status epilepticus). սա այն վիճակն է, երբ ցնցումները շարունակվում են 5 րոպեից երկար կամ առանց լիարժեք գիտակցության գալու ցնցումները հաճախակի հաջորդում են մեկը մյուսին (մեկ ժամվա ընթացքում՝ առնվազն երկու անգամ): Էպիլեպտիկ վիճակ ունեցող մարդկանց մոտ բարձրանում է ուղեղի անդառնալի վնասման և մահվան ռիսկը:
• Էպիլեպտիկ հանկարծամահություն (անգլերեն հավապումը՝ SUDEP). էպիլեպսիայով մարդկանց մոտ առկա է հանկարծամահության փոքր ռիսկ, որի հստակ պատճառը պարզ չէ, սակայն ըստ որոշ հետազոտությունների կարող են լինել սրտային կամ շնչառական հիվանդությունները: Հաճախակի տոնիկ-կլոնիկ ցնցումներով և բուժումից դուրս մնացած անձանց մոտ SUDEP-ի ռիսկը աճում է: Ընդհանուր առմամբ, էպիլեպսիայով անձանց մոտ 1 տոկոսը մահանում է այս բարդությունից: