Ուշագնացություն. ինքնօգնություն

1 րոպե

Այս խորհուրդները կօգնեն ձեզ ճիշտ կողմնորոշվել ուշագնացությանը նախորդող իրավիճակներում և դրանից հետո:

Ի՞նչ անել, եթե դուք եք ուշագնաց եղել

• Եթե ունեք ուշագնաց լինելու զգացողություն, պառկե՛ք. պառկեք այնպես, որ ձեր գլուխն ունենա ցածր, իսկ ոտքերը՝ բարձր դիրք, որը թույլ կտա ավելացնել ուղեղի արյան հոսքը: Պառկած դիրքը նաև թույլ է տալիս խուսափել ընկնելուց և վնասվածք ստանալուց:
• Եթե չեք կարող պառկել, նստե՛ք. եթե պառկելու հնարավորություն չկա, ապա նստեք և գլուխը առաջ թեքեք՝ դեպի ծնկները, որպեսզի բարձրացնեք գլխուղեղի արյան հոսքը:
• Մնացե՛ք պառկած կամ նստած այնքան ժամանակ, մինչև ուշագնացության զգացողություններն անհետանան. մի՛ փորձեք արագ վեր կենալ, քանի որ ուշագնացության դրվագը կարող է կրկնվել:

Ինչպե՞ս օգնել այլ մարդկանց

Եթե ձեր ներկայությամբ որևէ մեկն ուշագնաց է լինում, ապա ստուգեք ու համոզվեք, որ նա վնասվածքներ չի ստացել և կարողանում է շնչել: Եթե վնասվածքը բացառվում է, օգնեք նրան պառկելու մեջքի վրա և բարձրացրեք ոտքերը:

Եթե տվյալ անձը վնասվածներ ունի, չի վերականգնվում գիտակցությունը կամ չի շնչում, զանգեք 1-03 և կանչեք շտապբուժօգնություն: Մինչև բուժանձնակազմի ժամանելը մնացեք նրա կողքին և անհապաղ սկսեք քայլ առ քայլ իրականացնել սիրտ-թոքային վերակենդանացման միջոցառումները:

Ի՞նչ անել ուշագնացության դրվագից հետո

Ուշագնացության ոչ բոլոր դեպքերն են լուրջ, սակայն բոլոր դեպքերում պետք է այդ դրվագի մասին տեղեկացնել ձեր բժշկին: Եթե ցանկանում եք անմիջապես այցելել բժշկին, ապա խնդրեք, որ մեկ ուրիշը վարի ձեր մեքենան:

Որոշ դեպքերում ուշագնացությունը կարող է լինել որևէ լուրջ առողջական խնդրի ախտանիշներից մեկը: Անհապաղ զանգեք 1-03 և կանչեք շտապբուժօգնություն, եթե դուք՝

• ունեք կրկնվող ուշագնացության դրվագներ
• գիտակցությունը վերականգնվում է միայն մի քանի րոպե հետո
• ընկնելիս վնասվածք եք ստացել
• հղի եք
• ունեք դիաբետ
• ունեք սրտանոթային կամ այլ սրտային հիվանդություն
• մինչև ուշագնաց լինելը զգացել եք կրծքավանդակային ցավ կամ անսովոր սրտխփոց
• կորցրել եք միզապարկի կամ աղիների գործունեության վերահսկողությունը: