Ախտորոշում - Ուշագնացություն

Ուշագնացությունը կարճատև է, և ձեր գիտակցությունն ինքնուրույն վերականգնվում է, եթե չի առաջացել որևէ լուրջ հիվանդության պատճառով կամ ընկնելիս ծանր վնասվածք չեք ստացել:

Այնուամենայնիվ, ուշագնացության ձեր կարծիքով նույնիսկ անհետևանք դրվագների մասին պետք է տեղեկացնել ձեր բժշկին: Ուշագնացության պատճառի հայտնաբերումը կօգնի ձեզ, որ համապատասխան բուժման շնորհիվ կանխարգելեք նույն պատճառից մեկ այլ դրվագի առաջացումը:

Ֆիզիկական քննություն (բուժզննում) և անամնեզ

Բժիշկը լսելով ձեր հիվանդության պատմությունը (անամնեզ), հարցեր կտա ուշագնացության դրվագի, ինչպես նաև ձեր ընդհանուր առողջական վիճակի և առկա խնդիրների վերաբերյալ: Օրինակ, ձեր բժիշկը կարող է հարցնել, թե ինչ պայմաններում և հանգամանքներում եք կորցրել ձեր գիտակցությունը, ինչ զգացողություններ են նախորդել դրան, ունեք որևէ հիվանդություն և, եթե այո, ապա ինչ բուժում եք ստանում՝ ինչ դեղեր և ինչ դեղաչափերով, արդյոք վերջերս փոփոխել եք դեղերը կամ դրանց դեղաչափերը:

Ձեր բժիշկը նաև կանցկացնի մանրակրկիտ ֆիզիկական քննություն (բուժզննում), այդ թվում՝ ստետոսկոպով ձեր սրտի լսում, անոթազարկի (պուլսի) շոշափում, արյան ճնշման չափում (ամենայն հավանականությամբ՝ մի քանի անգամ, ձեր տարբեր դիրքերում՝ պառկած, նստած, կանգնած և այլն):

Հետազոտություններ

Ուշագնացության պատճառի փնտրտուքներում ձեր բժիշկը կարող է նաև առաջարկել տարբեր հետազոտություններ:

• Էլեկտրասրտագրություն (ԷՍԳ). ԷՍԳ-ն չափում է ձեր սրտի ռիթմը և էլեկտրական ակտիվությունը՝ օգտագործելով կրծքավանդակի առաջային մակերևույթին և երբեմն վերջույթներին տեղադրված էլեկտրոդներ: Որոշ դեպքերում բժիշկը կարող է խորհուրդ տալ հոլտեր մոնիթորինգ, որը թույլ է տալիս գրանցել 24 ժամյա կամ ավելի երկար տևողության ԷՍԳ:
• Լաբորատոր թեստեր. արյան անալիզները կարող են օգնել մի շարք հիվանդությունների ախտորոշմանը, օրինակ՝ շաքարային դիաբետ (շաքարախտ), սակավարյունություն (օրինակ՝ երկաթ-դեֆիցիտային անեմիա) կամ սրտամկանի ինֆարկտ, որոնք կարող են ընթանալ ուշագնացության դրվագներով կամ բարձրացնել դրանց առաջացման ռիսկը:
• Թեք սեղանի թեստ. եթե ձեզ մոտ ուշագնացության հանգեցնող ցածր արյան ճնշում առաջանում է ոտքի կանգնելիս (կոչվում է օրթոստատիկ կամ դիրքային հիպոտենզիա), թեք սեղանի թեստը կարող է գնահատել, թե ինչպես է ձեր օրգանիզմն արձագանքում ձեր մարմնի դիրքի կտրուկ փոփոխությանը: Այս թեստի ժամանակ դուք պառկում եք հատուկ սեղանի վրա, որից հետո ձեր գլխային ծայրը կտրուկ բարձրացվում է՝ նմանակելով հորիզոնական դիրքից ուղղահայաց դիրքի կտրուկ փոփոխությունը, որից հետո համեմատվում են մինչև սեղանի թեքելը և դրանից հետո ձեր արյան ճնշումները:
• Քնային ծոցի մերսում. բժիշկը կարող է նուրբ մերսել ձեր քնային զարկերակը, որն անցնում է ձեր պարանոցով, որ ստուգի, թե արդյոք դա բերում է ուշագնացության ախտանիշների առաջացման:
• Սթրես-թեստ. այս հետազոտությունը թույլ է տալիս գնահատել, թե ինչպես է ձեր սիրտը արձագանքում ֆիզիկական ծանրաբեռնվածությանը: Սթրեստ-թեստի ժամանակ դուք քայլում եք տրեդմիլ կոչվող քայլուղու վրա կամ պտտում եք անշարժ հեծանիվի ոտնակները, այլ կերպ ասած՝ կատարում կառավարելի ծանրաբեռվածության վարժանք: Այս ընթացքում բժիշկը հսկում է ձեր արյան ճնշումը և ԷՍԳ գրանցումները, որոնց շնորհիվ, ինչպես նաև հաշվի առնելով վարժանքի ընթացքում ձեր գանգատների ի հայտ գալը և ընդհանուր վիճակը, եզրակացնում է կրծքահեղձուկի արհեստական նոպայի առկայության մասին:
• Էխոսրտագրություն. էխոսրտագրությունը կամ «սրտի էխոն» գերձայնային հետազոտություն է, որն օգտագործում է ձայնային ալիքներ՝ ձեր սրտի մանրակրկիտ կառուցվածքի պատկերներ ստանալու համար և դիտվում սրտի խոռոչների ու փականների գործունեությունը ռեալ ժամանակի մեջ: Էխոսրտագրության շնորհիվ բժիշկը կարող է հայտնաբերել սրտի տարբեր խնդիրներ: Հետազոտությունը կարող է իրականացվել նաև սթրես-թեստի հետ զուգակցված:
• Էլեկտրոֆիզիոլոգիա. այս հետազոտության ժամանակ փոքր էլեկտրոդներ են տեղադրվում ձեր երակների ուղղությամբ և սրտի մեջ, որով գնահատվում է ձեր սրտի էլեկտրական ակտիվությունը և հաղորդականությունը: Էլեկտրոֆիզիոլոգիան թույլ է տալիս հայտնաբերել սրտի ռիթմի և հաղորդականության տարաբնույթ շեղումներ, որոնք կարող են առաջացնել ուշագնացություն կամ բարձրացնել վերջինիս առաջացման ռիսկը:
• Պատկերային հետազոտություններ. որոշ դեպքերում բժիշկը նաև կարող է առաջարկել համակարգչային տոմոգրաֆիա (ԿՏ) կամ մագնիսա-ռեզոնանսային տոմոգրաֆիա (ՄՌՏ), որոնցից առաջինն օգտագործում է ռենտգենյան ճառագայթներ, իսկ երկրորդը՝ հզոր մագնիսական դաշտեր, որ ստացվեն ձեր օրգանների եռաչափ պատկերները: Այս հետազոտությունները հաճախ նշանակվում են գլխուղեղի արյունատար անոթները զննելու համար, եթե կասկածվում է ուշագնացության նյարդաբանական պատճառի առկայություն: