Ախտանիշներ - Ուշագնացություն

Մինչև գիտակցության կորուստը դուք կարող եք զգալ մի շարք նշաններ, որոնք նախազգուշացնում են մոտալուտ ուշագնացության մասին:

Ուշագնացությանը նախորդող նման վիճակը կոչվում է նախաուշագնացություն (պրեսինկոպե):

Նախաուշագնացության գանգատները և ախտանիշները կարող են ներառել՝

• գլխապտույտի և ընկնելու զգացողություններ
• մաշկի սառնություն կամ սառը «կպչուն» քրտինք
• մկանային թուլություն և հավասարակշռության խախտում (մարմնի ճոճում կամ երերում)
• գլխացավ
• սրտխառնոց
• տեսողության փոփոխություններ, օրինակ՝ մշուշոտ տեսողություն, թունելային տեսողություն (երբ վատանում է կողային տեսողությունը և սեղմվում է տեսադաշտը) կամ աչքերում առկայծումներ
• աղմուկ ականջներում (զնգոց կամ տինիտուս)
• հորանջում կամ հոգնածության զգացում
• աչքերի առաջ սևանալու զգացողություն:

Ի տարբերություն ուշագնացությանը, նախաուշագնացության ժաանակ գիտակցությունը և մկանային ուժը ամբողջությամբ կորած չեն:

Ուշագնացության տարբեր տեսակների ախտանիշները

Ռեֆլեկտոր (նյարդային միջնորդավորված) ուշագնացությանը հաճախ նախորդում են հետևյալ նախազգուշացնող ախտանիշները՝

• ընկնելու զգացողություն
• սրտխառնոց
• տաք ներհոսի զգացողություն
• թունելային (նեղացած) տեսողություն
• տեսողական առկայծումներ կամ մշուշոտ տեսողություն:

Սրտային ուշագնացությանը բնորոշ են հետևյալ ախտանիշները՝

• ուշագնացությանը նախորդող կրծքավանդակային ցավեր կամ սրտխփոցի զգացողություն
• ուշագնացության դրվագը կապված է ֆիզիկական ծանրաբեռնվածության հետ
• ուշագնացության դրվագի առաջացումը պառկած վիճակում:

Оրթոստատիկ ուշագնացությունը նաև կարող է զարգանալ հանկարծակի՝ առանց նախազգուշացնող գանգատների:

Ուղեղանոթային ուշագնացության ժամանակ կարող են զարգանալ հետևյալ ախտանիշները՝

• գլխապտույտ կամ ընկնելու զգացողություն
• գլխացավ
• չկորդինացված շարժումներ
• լսողության դժվարացում
• շփոթվածություն կամ շշմածություն:

Ե՞րբ դիմել բժշկին

Դիմեք ձեր բժշկին բոլոր այն դեպքերում, եթե կարծու եք, որ ունեք նախաուշագնացության վիճակ: Նախաուշագնացությունը բուժվում է այնպես, ինչպես ուշագնացությունը, և բուժումը հիմնված է պատճառի հայտնաբերման և վերացման վրա:

Անհապաղ զանգեք 1-03 և կանչեք շտապ օգնություն, եթե ձեր ներկայությամբ ինչ-որ մեկի մոտ նկատում եք նախաուշագնացության նշաններ կամ ուշագնացություն: