Գրադարան
Պարբերական հիվանդություն․ բարդություններ
1 րոպե
Բարդություններ կարող են առաջանալ, եթե պարբերական հիվանդությունը (ՊՀ) կամ ընտանեկան միջերկրածովյան տենդը չբուժվի:
Բորբոքումը կարող է հանգեցնել տարբեր բարդությունների:
- Ամիլոիդոզ. ՊՀ-ի նոպաների կամ կրիզների ժամանակ ձեր օրգանիզմը կարող է արտադրել ամիլոիդ A կոչվող սպիտակուց, որը սովորաբար չի հայտնաբերվում մարմնում: Այս սպիտակուցի կուտակումն առաջացնում է բորբոքում, որը կարող է հանգեցնել օրգանների վնասմանը:
- Երիկամների վնասում. ամիլոիդոզը կարող է վնասել երիկամները՝ առաջացնելով նեֆրոտիկ համախտանիշ։ Նեֆրոտիկ համախտանիշը տեղի է ունենում, երբ ձեր երիկամների զտիչ համակարգերը (կծիկները) վնասված են: Նեֆրոտիկ համախտանիշ ունեցող մարդիկ կարող են մեզով կորցնել մեծ քանակությամբ սպիտակուց: Նեֆրոտիկ համախտանիշը կարող է հանգեցնել ձեր երիկամներում արյան մակարդման (երիկամային երակային թրոմբոզ) կամ երիկամային անբավարարության:
- Հոդացավ. հոդացավը տարածված է ՊՀ ունեցող մարդկանց մոտ: Ամենահաճախ ախտահարվող հոդերն են ծնկան, սրունք-թաթային (կոճեր) և կոնք-ազդրային հոդերը:
- Անպտղություն. ՊՀ-ով պայմանավորված և չբուժված բորբոքումը կարող է ազդել վերարտադրողական օրգանների վրա (օրինակ՝ առաջացնել արգանդափողերի կպումներ)՝ առաջացնելով անպտղություն:
- Այլ բարդություններ. դրանք կարող են ներառել սրտի, թոքերի, փայծաղի, գլխուղեղի և մակերեսային երակների բորբոքումները:
Հոդվածը տեղադրվել է՝ 22-04-2019 վերանայվել է՝ 02-04-2023
Հեղինակ
Հեղինակային բոլոր իրավունքները պատկանում են Մեդեքսին։
Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:
