Կանանց սեռական դիսֆունկցիա. բուժում

4 րոպե

Հիշեք, որ սեռական դիսֆունկցիան խնդիր է միայն այն դեպքում, եթե ձեզ անհանգստացնում է:

Եթե դա ձեզ չի անհանգստացնում, բուժման անհրաժեշտություն չկա:

Կանացի սեռական դիսֆունկցիան ունի բազմաթիվ հնարավոր ախտանիշներ և պատճառներ, ուստի բուժումը տարբերվում է: Շատ կարևոր է, որ ձեզ զուգընկերոջը հայտնեք ձեր մտահոգությունները, ինչպես նաև հասկանաք ձեր մարմինը և նրա նորմալ սեռական պատասխանը: Բացի այդ, ձեր սեռական կյանքի վերաբերյալ ձեր նպատակները կարևոր են բուժման տարբերակն ընտրելու և արդյունքները գնահատելու համար:

Սեռական մտահոգություններ ունեցող կանայք ավելի հաճախ օգտվում են համակցված բուժման մոտեցումից, որն անդրադառնում է բժշկական, ինչպես նաև փոխհարաբերությունների և հուզական խնդիրներին:

Ոչ դեղորայքային բուժման մեթոդներ (թերապիաներ)

Սեռական դիսֆունկցիան բուժելու համար ձեր բժիշկը կարող է խորհուրդ տալ սկսել հետևյալ մոտեցումներից:

• Խոսեք և լսեք. ձեր զուգընկերոջ հետ բաց շփումը անփոխարինելի նշանակություն ունի ձեր սեռական բավարարվածության համար: Նույնիսկ եթե սովոր չեք անկողնում խոսել այն մասին, թե ինչն է ձեզ դուր գալիս և ինչը ձեր դուրը չի գալիս, արեք դա և պահեք հանդարտ հետադարձ կապը, որը ձեզ երկուսիդ էլ կտա ավելի մեծ մտերմության հիմքեր:
• Կիրառեք առողջ ապրելակերպի սովորույթները. սահմանափակեք ալկոհոլը, քանի որ չափից շատ խմելը կարող է թուլացնել ձեր սեռական պատասխանը: Եղեք ֆիզիկապես ակտիվ, քանի որ կանոնավոր ֆիզիկական ակտիվությունը կարող է բարձրացնել ձեր տոկունությունը և բարձրացնել ձեր տրամադրությունը՝ ուժեղացնելով ռոմանտիկ զգացմունքները: Սովորեք սթրեսը նվազեցնելու ուղիներ, որ կարողանաք կենտրոնանալ և վայելել ձեր սեռական գործունեությունը:
• Դիմեք և ստացեք խորհրդատվություն. զրուցեք խորհրդատուի կամ թերապևտի հետ, ով մասնագիտացած է սեռական և փոխհարաբերությունների խնդիրների մեջ: Թերապիան հաճախ ներառում է ձեր մարմնի սեռական պատասխանը բարելավելու վերաբերյալ գիտելիքներ ստանալը, ձեր զուգընկերոջ հետ սեռական մտերմությունն ամրապնդելու ուղիներ գտնելը, զույգերի վարժանքները և այլն:
• Օգտագործեք քսանյութ (լուբրիկանտ). հեշտոցային քսանյութը կարող է օգտակար լինել սեռական հարաբերության ժամանակ, եթե ունեք հեշտոցային չորություն կամ սեռական հարաբերությանն ուղեկցող ցավ:
• Փորձեք որևէ սարք. գրգռումը կարող է ուժեղանալ ծլիկի (կլիտոր) խթանմամբ: Ծլիկային խթանման համար փորձեք օգտագործել վիբրատոր:

Դեղորայքային բուժման մեթոդներ

Սեռական դիսֆունկցիայի արդյունավետ բուժումը հաճախ պահանջում է պատճառ հանդիսացող հիվանդության կամ հորմոնաային փոփոխության խնդրի լուծում: Ձեր բժիշկը կարող է առաջարկել, որ փոխեք ձեր ընդունած դեղամիջոցը կամ նշանակել նորը:

Կանացի սեռական դիսֆունկցիայի բուժման հնարավոր միջոցները կարող են ներառել հետևյալը:

• Էստրոգենային բուժում. տեղային էստրոգենային բուժման միջոցներն արտադրվում են հեշտոցային օղակի, նրբաքսուքի (կրեմ) կամ դեղահատի տեսքով: Այս բուժումը նպաստում է սեռական գործունեությանը՝ բարելավելով հեշտոցի տոնուսը և առաձգականությունը, մեծացնելով հեշտոցի արյան հոսքը և ուժեղացնելով հեշտոցի բնական օծումը (լուբրիկացիա): Հորմոնային բուժման ռիսկերը կարող են տարբեր լինել՝ կախված ձեր տարիքից, առողջական այլ խնդիրների ռիսկից, ինչպիսիք են սրտի և արյունատար անոթների հիվանդությունները և քաղցկեղը, հորմոնի դեղաչափից և տեսակից, ինչպես նաև՝ էստրոգենի առանձին կամ պրոգեստինի հետ միասին օգտագործելուց: Խոսեք ձեր բժշկի հետ օգուտների և ռիսկերի մասին: Որոշ դեպքերում հորմոնային բուժումը կարող է պահանջել ձեր բժշկի կողմից ուշադիր վերահսկում:
• Օսպեմիֆեն (Օսֆենա). այս դեղամիջոցը էստրոգենային ընկալիչների ընտրողական մոդուլատոր է: Այն օգնում է վուլվովագինային ատրոֆիա ունեցող կանանց մոտ սեռական հարաբերությանն ուղեկցող ցավի մեղմացմանը:
• Անդրոգենային բուժում. անդրոգեններն արական սեռական հորմոններ են, որոնցից է տեստոստերոնը: Տեստոստերոնը դեր է խաղում կանանց, ինչպես նաև տղամարդկանց առողջ սեռական գործունեության մեջ, թեև կանայք տեստոստերոնի շատ ավելի ցածր մակարդակ ունեն: Սեռական դիսֆունկցիայի համար անդրոգենային բուժումը հակասական է: Որոշ ուսումնասիրություններ ցույց են տալիս օգուտ այն կանանց համար, ովքեր ունեն ցածր տեստոստերոնի մակարդակ և ունեն սեռական դիսֆունկցիա: այլ ուսումնասիրություններ ցույց են տալիս քիչ կամ ոչ մի օգուտ:
• Ֆլիբանսերին (Էդդի). ի սկզբանե որպես հակադեպրեսանտ ստեղծված Ֆլիբանսերինը հաստատված է ԱՄՆ Սննդի և դեղերի գործակալության (FDA) կողմից որպես նախադաշտանադադարի շրջանում գտնվող կանանց ցածր սեռական ցանկության բուժման դեղամիջոց: Էդդի–ի ամենօրյա հաբերը կարող են խթանել սեռական ցանկությունն այն կանանց մոտ, ովքեր ցածր սեռական ցանկություն ունեն և դա անհանգստացնող են համարում: Հնարավոր լուրջ կողմնակի ազդեցությունները ներառում են՝ ցածր արյան ճնշում, քնկոտություն, սրտխառնոց, հոգնածություն, գլխապտույտ և ուշագնացություն, հատկապես, եթե դեղամիջոցը խառնվում է ալկոհոլի հետ: Մասնագետները խորհուրդ են տալիս դադարեցնել դեղամիջոցի ընդունումը, եթե ութ շաբաթից հետո չնկատեք սեռական ցանկությունների բարելավում:
• Բրեմելանոտիդ (Վիլեեսի). Բրեմելանոտիդը FDA-ի կողմից հաստատված և նախադաշտանադադարում գտնվող կանանց ցածր սեռական ցանկության բուժման մեկ այլ դեղամիջոց է: Բրեմելանոտիդը լուծույթ է, որը ինքներդ ձեզ ներարկում եք որովայնի կամ ազդրի շրջանում ձեր մաշկի տակ, նախքան ակնկալվող սեռական ակտիվությունը: Որոշ կանայք ունենում են սրտխառնոց, որն ավելի հաճախ դրսևորվում է առաջին ներարկումից հետո, բայց հակված է մեղմանալ կամ անհետանալ երկրորդ ներարկումից հետո: Այլ կողմնակի ազդեցությունները ներառում են՝ փսխում, կարմրություն, գլխացավ և ներարկման տեղում մաշկային ռեակցիա: