Ախտանիշներ - Սննդային ալերգիա

Որոշ մարդկանց համար որոշակի սննդի նկատմամբ ալերգիկ ռեակցիան կարող է լինել անհարմարավետ, բայց ոչ՝ սուր:

Այլ մարդկանց համար սննդային ալերգիկ ռեակցիան կարող է լինել վախեցնող և նույնիսկ կյանքին սպառնացող: Սննդային ալերգիայի ախտանիշները սովորաբար զարգանում են ալերգիա առաջացնող մթերքն ուտելուց մի քանի րոպեից մինչև 2 ժամ հետո: Հազվադեպ, ախտանիշները կարող են հետաձգվել մի քանի ժամով:

Սննդային ալերգիայի ամենատարածված գանգատներն ու ախտանիշները ներառում են՝

• բերանում ծակծկոցների կամ քորի առաջացում
• մաշկի եղնջացան, քոր կամ էկզեմա
• շրթունքների, դեմքի, լեզվի և կոկորդի կամ մարմնի այլ մասերի այտուցվածություն
• խզզոցներ, քթի փակվածություն կամ դժվարաշնչություն
• որովայնի ցավ, փորլուծություն, սրտխառնոց կամ փսխում
• գլխապտույտ, ուշագնացության զգացում (նախաուշագնացություն) կամ ուշագնացություն:

Անաֆիլաքսիա

Որոշ մարդկանց մոտ սննդային ալերգիան կարող է առաջացնել ծանր ալերգիկ ռեակցիա, որը կոչվում է անաֆիլաքսիա: Սա կարող է առաջացնել կյանքին սպառնացող գանգատներ և ախտանիշներ, այդ թվում՝

• շնչուղիների նեղացում և կծկանք (սպազմ)
• այտուցված կոկորդ կամ կոկորդում գոյացության զգացում, որը դժվարացնում է շնչելը
• շոկ՝ արյան ճնշման կտրուկ անկմամբ
• արագացած կամ թելանման անոթազարկ (պուլս)
• գլխապտույտ, ուշագնացության զգացում (նախաուշագնացություն) կամ գիտակցության կորուստ:

Անհետաձգելի բուժումը չափազանց կարևոր է անաֆիլաքսիայի համար: Չբուժված անաֆիլաքսիան կարող է հանգեցնել կոմայի կամ նույնիսկ մահվան:

Իմացե՛ք ավելին անաֆիլաքսիայի մասին:

Ե՞րբ դիմել բժշկին

Այցելեք ձեր բժշկին կամ ալերգոլոգին, եթե ուտելուց անմիջապես հետո ունեք սննդային ալերգիայի ախտանիշներ: Հնարավորության դեպքում այցելեք ձեր բժշկին, երբ ալերգիկ ռեակցիա է զարգանում: Սա կօգնի ձեր բժշկին ձեր վիճակն ախտորոշելիս:

Զանգեք 1-03 և կանչեք շտապ օգնություն կամ այլ կերպ փնտրեք անհետաձգելի բուժօգնություն, եթե ձեզ մոտ ի հայտ է գլաիս անաֆիլաքսիայի որևէ նշան կամ ախտանիշ, ինչպիսիք են՝

• շնչուղիների նեղացում, որը դժվարացնում է շնչելը
• շոկ՝ արյան ճնշման կտրուկ անկմամբ
• արագացած կամ թելանման անոթազարկ (պուլս)
• գլխապտույտ կամ ուշագնացության զգացում (նախաուշագնացություն):