Ախտանիշներ - Գանգրենա

Գանգրենայի ախտանիշները մեծամասամբ կախված են մեռուկացած հյուսվածքի տեսակից և ախտահարման չափից:

Եթե գանգրենան ազդում է մաշկի վրա, գանգատներն ու ախտանիշները կարող են ներառել`

• մաշկի գույնի փոփոխություններ՝ գունատ-մոխրագույնից մինչև կապույտ, մանուշակագույն, սև, բրոնզե կամ կարմիր
• այտուցվածություն
• բշտիկներ
• հանկարծակի, ուժեղ ցավ, որին հաջորդում է թմրածության զգացումը
• առաջացած խոցից տհաճ հոտով արտադրություն
• բարակ, փայլուն մաշկ կամ մազաթափված մաշկ
• մաշկ, որը թվում է սառը կամ հպվելիս սառն է:

Եթե գանգրենան ազդում է ձեր մաշկի տակ գտնվող հյուսվածքների վրա, օրինակ, գազային գանգրենայի կամ ներքին գանգրենայի դեպքում, դուք նաև կարող եք ունենալ ցածր աստիճանի ջերմություն և ընդհանուր առմամբ վատառողջ զգալ:

Եթե գանգրենա պատճառած մանրէները տարածվում են օրգանիզմում, կարող է առաջանալ մի վիճակ, որը կոչվում է սեպտիկ շոկ: Սեպտիկ շոկի գանգատներն ու ախտանիշները ներառում են՝

• ցածր արյան ճնշում (հիպոտենզիա)
• ջերմություն, թեև որոշ մարդկանց մարմնի ջերմաստիճանը կարող է 37° C-ից (98,6 F) ցածր լինել
• արագացած սրտազարկ
• գլխապտույտ կամ ուշագնաց լինելու զգացում
• շնչարգելություն
• շփոթվածություն:

Իմացե՛ք ավելին սեպսիսի մասին:

Ե՞րբ դիմել բժշկին

Գանգրենան ծանր վիճակ է և շտապ բուժման կարիք ունի: Անհապաղ զանգահարեք ձեր բժշկին, եթե ձեր մարմնի որևէ հատվածում մշտական, անբացատրելի ցավ ունեք՝ հետևյալ գագնատներից և ախտանիշներից մեկի կամ մի քանիսի հետ միասին՝

• մշտական ջերմություն կամ տենդ
• մաշկային փոփոխություններ, ներառյալ գունաթափումը, տեղային ջերմությունը, այտուցը, բշտիկները կամ մաշկի ամբողջականության խախտումները, որոնք չեն անհետանում
• տհաճ արտահոսքով մաշկի խոց
• հանկարծակի ցավ վերջերս կատարված վիրահատության կամ վնասվածքի տեղում
• մաշկ, որը գունատ է, կոշտացած, սառը և թմրած: