Գաստրիտը միշտ չէ, որ առաջացնում է գանգատներ և ախտանիշներ:
Այնուամենայնիվ, գաստրիտ ունեցող որոշ մարդիկ կարող են նշել՝
- որովայնի վերին հատվածում (վերորովայն) մրմռոց, այրոց կամ ցավեր (ստամոքսի խանգարում), որը կարող է կապված լինել, ուժգնանալ կամ թուլանալ ուտելուց հետո
- սրտխառնոց
- փսխում
- ուտելուց հետո որովայնի վերին հատվածում լցվածության կամ ծանրության զգացում, երբեմն՝ նաև գղտոց։
Ե՞րբ դիմել բժշկին
Գրեթե բոլորի մոտ եղել են ստամոքսի խանգարման կամ գրգռվածության դրվագներ: Ստամոքսի խանգարման դեպքերի մեծ մասը կարճատև է և բուժօգնություն չի պահանջում: Այցելեք ձեր ընտանեկան բժշկին, եթե ունեք մեկ շաբաթ կամ ավելի երկար շարունակվող գանգատներ ու ախտանիշներ:
Անհապաղ դիմեք ձեր բժշկին, եթե ունեք ուժեղ ցավ, փսխում և չեք կարողանում պահել սնունդը կամ զգում եք ուշագնացություն կամ գլխապտույտ: Տեղեկացրեք բժշկին, եթե ձեր ստամոքսի անհանգստությունն առաջանում է ցանկացած դեղամիջոց, հատկապես՝ Ասպիրին կամ այլ ցավազրկողներ ընդունելուց հետո:
Եթե արյուն եք փսխում, ձեր կղանքում արյուն կա կամ ունեք սև (ձութանման) կղանք, անմիջապես դիմեք ձեր բժշկին՝ պատճառը պարզելու համար կամ զանգեք 1-03 և կանչեք շտապ օգնություն:
Հոդվածը հրապարակվել է՝ 17-06-2018
Վերջին վերանայում՝ 30-05-2024