Բուժում - Գաստրիտ

Գաստրիտի բուժումը կախված է կոնկրետ պատճառից։

Ոչ ստերոիդային հակաբորբոքային դեղամիջոցների (ՈՍՀԲԴ) կամ ալկոհոլի հետևանքով առաջացած սուր գաստրիտը կարող է թեթևանալ՝ դադարեցնելով այդ նյութերի օգտագործումը:

Գաստրիտի բուժման համար օգտագործվող դեղամիջոցները ներառում են հետևյալը:

• Հելիոբակտեր պիլորին (H. pylori) ոչնչացնող հակաբիոտիկներ. ձեր մարսողական խողովակում H. pylori-ի առկայության դեպքում այդ բակտերիաները ոչնչացնելու համար ձեր բժիշկը կարող է խորհուրդ տալ հակաբիոտիկների համակցում, ինչպիսիք են Կլարիթրոմիցինը (Բիաքին XL) և Ամոքսիցիլինը (Ամոքսիլ, Աուգմենտին և այլն) կամ Մետրոնիդազոլը (Ֆլագիլ): Անպայման անցնեք հակաբիոտիկային բուժման ամբողջ կուրսը՝ սովորաբար 7-ից 14 օր, թթվի արտադրությունն արգելակող դեղամիջոցների հետ միասին: Բուժվելուց հետո ձեր բժիշկը կվերստուգի ձեզ H. pylori-ի համար՝ համոզվելու, որ այն ոչնչացվել է:
• Թթվի արտադրությունն արգելակող և լավացմանը նպաստող դեղամիջոցներ. պրոտոնային պոմպի արգելակիչները (ինհիբիտորներ) նվազեցնում են թթուն՝ արգելափակելով թթու արտադրող բջիջների գործունեությունը։ Դրանց օրինակներից են՝ Օմեպրազոլ (Պրիլոզեկ), Լանսոպրազոլ (Պրեվացիդ), Ռաբեպրազոլ (Ացիֆեքս), Պանտոպրազոլ (Պրոտոնիքս) և այլն: Պրոտոնային պոմպի արգելակիչների երկարատև օգտագործումը, հատկապես բարձր չափաբաժիններով, կարող է մեծացնել ազդրի, դաստակի և ողնաշարի կոտրվածքների ռիսկը: Հարցրեք ձեր բժշկին, թե արդյոք կալցիումի հավելումը կարող է նվազեցնել այս ռիսկը:
• Թթվի արտադրությունը նվազեցնող դեղամիջոցներ. թթվի պաշարիչները (բլոկատորներ), որոնք նաև կոչվում են հիստամինային (H2) պաշարիչներ, նվազեցնում են ձեր մարսողական խողովակում արտազատվող թթվի քանակը, որը թեթևացնում է գաստրիտի ցավը և օժանդակում բուժմանը: Դեղատոմս պահանջող կամ չպահանջող թթվային պաշարիչներից են՝ Ֆամոտիդին (Պեպսիդ), Ցիմետիդին (Տագամետ HB) և Նիզատիդին (Աքսիդ AR):
• Ստամոքսի թթուն չեզոքացնող դեղամիջոցներ (անտացիդներ). բժիշկը կարող է ձեր դեղորայքային բուժման մեջ ներառել որևէ անտացիդ: Անտացիդները չեզոքացնում են ստամոքսում առկա թթուն և կարող են արագորեն մեղմացնել ցավը: Կախված հիմնական բաղադրիչներից՝ հնարավոր կողմնակի ազդեցություններից են փորկապությունը կամ փորլուծությունը: Անտացիդներն օգնում են ախտանշանների արագ թեթևացմանը, սակայն սովորաբար չեն օգտագործվում որպես առաջնային բուժում: Պրոտոնային պոմպի արգելակիչները և թթվային պաշարիչներն ավելի արդյունավետ են և ունեն ավելի քիչ կողմնակի ազդեցություններ: