Բուժում - Գաստրոպարեզ

Գաստրոպարեզի բուժումը սկսվում է հիմքում ընկած հիվանդության կամ վիճակի բացահայտմամբ և բուժմամբ:

Եթե գաստրոպարեզը զարգացել է որպես դիաբետի բարդություն, ձեր բժիշկը կարող է աշխատել ձեզ հետ՝ օգնելու ձեզ վերահսկել դիաբետը:

Սննդակարգի փոփոխություններ

Գաստրոպարեզի բուժման կարևորագույն նպատակը համարժեք սնուցման պահպանումն է: Բազմաթիվ մարդիկ կարող են կառավարել գաստրոպարեզը սննդակարգի փոփոխությունների օգնությամբ: Բժիշկը կարող է ձեզ ուղղորդել դիետոլոգի մոտ, ով կարող է ձեզ օգնել, որ միասին ընտրեք ձեզ համար ավելի հեշտ մարսվող մթերքներ: Սա կարող է օգնել, որ ձեր կերած սննդից բավարար քանակության կալորիաներ և սննդանյութեր ստանաք:

Օրինակ, դիետոլոգը կարող է առաջարկել, որ դուք փորձեք՝

• ուտել հաճախակի՝ ավելի փոքր քանակներով
• սնունդը մանրակրկիտ ծամել
• ուտել լավ եփած, այլ ոչ թե հում մրգեր և բանջարեղեններ
• խուսափել բջջանքով հարուստ մրգերից ու բանջարեղեններից, ինչպիսիք են նարինջը և բրոկոլիըն, որոնք կարող են բեզոարներ (ստամոքսային քարեր) առաջացնել
• ընտրել հիմնականում ցածր յուղայնությամբ մթերքներ, եթե գիտեք, որ դրանք դժվարացնում են ձեր մարսողությունը
• փորձել ապուրներ և մթերքների պյուրեներ, եթե հեղուկները ձեզ համար ավելի հեշտ է կուլ տալու
• խմել օրական 1-1,5 լիտր ջուր
• ուտելուց հետո թեթև վարժանքներ անել, օրինակ՝ զբոսնել
• խուսափել գազավորված ըմպելիքներից, ալկոհոլից և ծխախոտից
• խուսափել ուտելուց հետո 2 ժամ պառկելուց
• ամեն օր մուլտիվիտամին ընդունել:

Հարցրեք դիետոլոգին գաստրոպարեզի ժամանակ խորհուրդ տրվող մթերքների ամբողջական ցանկը: Ահա մի համառոտ ցուցակ:

Օսլաներ

• սպիտակ հաց և բուլկիներ և ամբողջահատիկ ցորենի հաց՝ առանց ընկույզի կամ սերմերի
• սովորական կամ հավկիթային թխվածքաբլիթներ
• անգլիական կեքսեր
• ալյուրի կամ եգիպտացորենի տորտիլաներ
• բլիթներ
• փքված ցորենի կամ բրնձի փքափաթիլներ
• ցորենի կամ բրնձի կրեմներ
• սպիտակ կրեկեր
• սպիտակ կամ քաղցր կարտոֆիլ (առանց կեղևի)
• տապակած կարտոֆիլի ֆրի
• բրինձ
• մակարոնեղեն։

Սպիտակուց (պրոտեին)

• անյուղ տավարի, հորթի և խոզի միս (ոչ տապակած)
• հավի կամ հնդկահավի միս (առանց կաշվի և ոչ տապակած)
• ծովախեցգետին, օմար, կակղամորթ, խեցգետին, ոստրե և այլն
• թունա (փաթեթավորված ջրի մեջ)
• կաթնաշոռ
• ձու
• տոֆու
• հարած մսով մանկական սնունդ։

Մրգեր եւ բանջարեղեններ

• տրորած բանջարեղեններ և մրգեր (նման մանկական պյուրեներին)
• տոմատի սոուս, մածուկ, խյուս, հյութ
• գազար (եփած)
• բազուկ (եփած)
• սունկ (եփած)
• բանջարեղենային հյութ
• բանջարեղենային արգանակ (բուլյոն)
• մրգային հյութեր և խմիչքներ
• խնձորի պյուրե
• բանան
• դեղձ և տանձ (պահածոյացված):

Կաթնամթերք

• կաթ (եթե լավ եք տանում)
• յոգուրտ (առանց մրգի կտորների) կամ մածուն
• եփած կրեմ և պուդինգ
• սառեցված յոգուրտ:

Դեղամիջոցներ

Գաստրոպարեզի բուժման դեղամիջոցները կարող են ներառել հետևյալ խմբերը:

• Ստամոքսի մկանները խթանող դեղամիջոցներ. այս դեղամիջոցներից են՝ Մետոկլոպրամիդ (Ռեգլան) և Էրիթրոմիցին: Մետոկլոպրամիդն ունի լուրջ կողմնակի ազդեցությունների ռիսկ: Էրիթրոմիցինը ժամանակի ընթացքում կարող է կորցնել իր արդյունավետությունը և կարող է առաջացնել կողմնակի ազդեցություններ, ինչպիսին է փորլուծությունը: Նորագույն դեղամիջոցներից է Դոմպերիդոնը, որն ունի ավելի սակավաթիվ կողմնակի ազդեցություններ:
• Սրտառնոցը և փսխումը վերահսկող դեղամիջոցներ. սրտխառնոցի և փսխումների թեթևացմանն օգնող դեղամիջոցներից են՝ Դիֆենհիդրամին (Բենադրիլ և այլն) և Օնդանսետրոն (Զոֆրան): Պրոքլորպերազինը (Կոմպրո) օգտագործվում է, եթե սրտխառնոցն ու փսխումը շարունակվում են:

Վիրահատական բուժում

Գաստրոպարեզ ունեցող որոշ մարդիկ կարող են ի վիճակի չլինել տանելու որևէ մթերք կամ հեղուկ: Այս իրավիճակներում բժիշկները կարող են խորհուրդ տալ բարակ աղիքում սնուցող խողովակի տեղադրում (յեյունոստոմիկ խողովակ): Կամ բժիշկները կարող են խորհուրդ տալ ստամոքսի օդափոխիչ խողովակի տեղադրում, որը կօգնի նվազեցնելու ստամոքսի պարունակության ճնշումը:

Սնուցող խողովակները (զոնդեր) կարող են տեղադրվել ձեր քթով կամ բերանով կամ ուղղակիորեն ձեր մաշկի միջով բարակ աղիներ: Խողովակը սովորաբար ժամանակավոր է և օգտագործվում է միայն այն դեպքում, երբ գաստրոպարեզը ծանր է կամ երբ արյան շաքարի մակարդակը չի կարող վերահսկվել որևէ այլ մեթոդով: Որոշ մարդկանց կարող է պահանջվել ներերակային (պարէնտերալ) սնուցման կաթետեր, որն ուղղակիորեն տեղադրվում է կրծքավանդակի (ենթաանրակային) երակի մեջ:

Ստամոքսի էլեկտրական խթանում և փեյսինգ

Ստամոքսի էլեկտրական խթանման համար վիրահատական միջոցով ներդրվում է սարք, որն էլեկտրական ազդանիշներ է ուղարկում դեպի ստամոքսի մկաններ և օգնում ստամոքսին, որ կծկվի և սնունդն առաջ մղի ավելի արդյունավետ կերպով: Հետազոտության տվյալները հակասական են, սակայն դիաբետիկ գաստրոպարեզով մարդկանց համար ստամոքսի այսպիսի արհեստական խթանիչը կարող է խիստ օգտակար դառնալ: