Գրադարան

Սեռական հերպես. ախտանիշներ

Սեռական հերպես. ախտանիշներ

Time Read 3 րոպե

Գենիտալ հերպեսի վիրուսով (հասարակ հերպեսի վիրուս, HSV) վարակված մարդկանց մեծ մասը չգիտի, որ որ ունի այն:

Նրանք կարող են չունենալ ախտանիշներ կամ նշել շատ մեղմ ախտանիշներ:

Ախտանիշները սկսվում են վիրուսի հետ շփումից մոտ 2-12 օր հետո: Դրանք կարող են ներառել հետևյալը:

  • սեռական օրգանների շրջանում ցավ, ցավոտություն կամ քոր
  • սեռական օրգանների, հետանցքի (անուս) կամ բերանի շուրջ փոքրիկ կարմիր հանգույցիկներ կամ մանր սպիտակ բշտիկներ, որոնք կարող են հայտնվել վարակվելուց հետո մի քանի օրվանից մինչև մի քանի շաբաթվա ընթացքում
  • ցավոտ խոցեր, որոնք առաջանում են, երբ բշտիկները պատռվում են և հոսում կամ արյունահոսում (մեծաքանակ լինելից դրանք կարող են նմանվել մաշկի խոցոտված ցանի)
  • կեղևներ, որոնք առաջանում են խոցերի ապաքինման ժամանակ
  • ցավոտ միզարձակում, որի հիմնական պատճառը խոցերն են
  • արտահոսք միզուկից՝ այն խողովակից, որով մեզը հեռանում է օրգանիզմից
  • արտահոսք հեշտոցից:

Առաջին բռնկման ժամանակ դուք հաճախ կարող եք ունենալ գրիպանման ախտանիշներ, ինչպիսիք են՝

  • ջերմություն
  • գլխացավ
  • մարմնի (մկանային) ցավեր
  • այտուցված ավշային հանգույցներ աճուկում:

Ախտանիշների տեղակայման տարբերությունները

Խոցերը հայտնվում են այնտեղ, որտեղից վարակը թափանցում է օրգանիզմ: Դուք կարող եք վարակը տարածել՝ դիպչելով խոցին, ապա քսելով կամ քերծելով ձեր մարմնի մեկ այլ հատված: Դա ներառում է ձեր մատները կամ աչքերը:

Տղամարդկանց և կանանց մոտ խոցեր կարող են առաջանալ հետևյալ շրջաններում՝

  • հետույք
  • ազդրեր
  • հետանցք
  • բերան
  • միզուկ:

Կանանց մոտ խոցեր կարող են զարգանալ նաև հետևյալ շրջաններում՝

  • արտաքին սեռական օրգաններ՝ ամոթույք (վուլվա)
  • հեշտոց (վագինա)
  • արգանդի վզիկ:

Տղամարդկանց մոտ խոցեր կարող են զարգանալ նաև հետևյալ շրջաններում՝

  • առնանդամ
  • փոշտ:

Կրկնակի բռնկումներ

Սեռական հերպեսի առաջին բռնկումից հետո ախտանիշները հաճախ կրկին հայտնվում են։ Դրանք կոչվում են կրկնակի բռնկումներ կամ կրկնակի դրվագներ (ախտադարձ կամ ռեցեդիվ):

Թե որքան հաճախ են լինում կրկնակի բռնկումները, շատ տարբեր է: Որոշ մարդկանց մոտ նման սրացումներն ու ախտադադարները կրկնվում են տարվա մեջ բազմաթիվ անգամ: Դուք սովորաբար ամենաշատ բռնկումները կունենաք վարակվելուց հետո առաջին տարին: Դրանք կարող են ժամանակի ընթացքում ավելի քիչ հաճախ հայտնվել: Ձեր ախտանիշները կրկնակի բռնկումների ժամանակ (կոչվում է նաև երկրորդային հերպես) սովորաբար այնքան երկար չեն տևում և այնքան սուր չեն, որքան առաջինը (կոչվում է նաև առաջնային հերպես):

Դուք կարող եք նոր բռնկման սկսվելուց մի քանի ժամ կամ օր առաջ ունենալ նախազգուշացնող նշաններ: Դրանք կոչվում են պրոդրոմալ ախտանիշներ և ներառում են՝

  • սեռական օրգանների ցավ
  • ոտքերում, ազդրերում կամ հետույքի շրջանում ծակող ցավեր:

Ե՞րբ դիմել բժշկին

Եթե կասկածում եք, որ ունեք սեռական հերպես կամ որևէ այլ սեռավարակ, դիմեք ձեր բժշկին:

Հոդվածը տեղադրվել է՝ 21-04-2018 վերանայվել է՝ 26-07-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով