Պատճառներ - Թթվային ռեֆլյուքս

Գաստրոէզոֆագեալ ռեֆլյուքս հիվանդությունը (ԳԷՌՀ) առաջանում է հաճախակի թթվային ռեֆլյուքսից կամ ստամոքսից ոչ թթվային պարունակության ռեֆլյուքսից:

Երբ կուլ եք տալիս, կերակրափողի ստորին մասում գտնվող մկանների օղաձև գոտին (ստորին կերակրափողային սֆինկտեր կամ սեղման) թուլանում է, որ սնունդն ու հեղուկը հոսեն ստամոքս: Հետո սֆինկտերը նորից կծկվում և փակվում է՝ թույլ չտալով, որ ստամոքսի պարունակությունը ետ հոսի դեպի կերակրափող:

Երբ այս սֆինկտերը չի թուլանում այնպես, ինչպես պետք է կամ կորցնում է իր ուժը, ստամոքսի թթուն կարող է ետ հոսել ձեր կերակրափող: Թթվային այս մշտական հետադարձ հոսքը գրգռում է ձեր կերակրափողի լորձաթաղանթը` հաճախ պատճառելով բորբոքում:

Ռիսկի գործոններ

Հիվանդությունները կամ առողջական վիճակները, որոնք կարող են մեծացնել ԳԷՌՀ-ի ձեր ռիսկը, ներառում են՝

• գիրություն
• ստոծանիական (կերակրափողային բացվածքի) ճողվածք, երբ ստամոքսի վերին մասը ստոծանու բացվածքով սահում է դեպի վեր՝ միջնորմ
• հղություն, որը հանգեցնում է ներորովայնային ճնշման բարձրացման և սֆինկտերը թուլացնող հորմոնային տեղաշարժեր
• շարակցական հյուսվածքի խանգարումներ, ինչպիսին է սկլերոդերման
• ստամոքսի հետաձգված դատարկում, որը կոչվում է գաստրոպարեզ և հաճախ հանդիպում է դիաբետով մարդկանց շրջանում:

Թթվային ռեֆլյուքսը ծանրացնող գործոններից են՝

• ծխելը, որը թուլացնում է ստորին կերակրափողային սֆինկտերը
• սննդի մեծ չափաբաժին ուտելը կամ ուշ գիշերն ուտելը
• որոշակի մթերքներ ուտելը (հրահրիչներ կամ տրիգերներ), ինչպիսիք են ճարպային կամ տապակած մթերքները, որոնք ստամոքսում մարսվելու համար ավելի երկար ժամանակ և թթու ստամոքսահյութի ավելի մեծ քանակ են պահանջում
• ալկոհոլը կամ սուրճը, որոնք թուլացնում են սֆինկտերը
• որոշ դեղամիջոցների ընդունումը, օրինակ՝ Ասպիրին:

ԳԷՌՀ-ի առաջացմանը նաև նպաստում են ուտելիս հեղուկների, հատկապես՝ գազավորված ըմպելիքների օգտագործումը, ներորովայնային ճնշումը բարձրացնող գործոնները (ամուր կապած գոտի, ֆիզիկական աշխատանք), կծու, թթու, աղի սնունդը, նստակյաց ապրելակերպը, արագ ուտելը և սնունդ ստանալուց անմիջապես հետո պառկելը։