ԳԷՌՀ (ռեֆլյուքս). ախտանիշներ

ԳԷՌՀ (ռեֆլյուքս). ախտանիշներ

Ռեֆլյուքսի ամենահաճախ հանդիպող ախտանիշներից են այրոցքը, ռեգուրգիտացիան, կլման դժվարությունը և կլման ակտին ուղեկցող հետկրծոսկրային ցավը։

Այրոցք

Այրոցքը գաստրոէզոֆագեալ ռեֆլյուքս-հիվանդության (ԳԷՌՀ) հիմնական ախտանիշն է։ Այն դրսևորվում է որպես հետկրծոսկրային այրոցի կամ անհարմարավետության զգացում (դիսկոմֆորտ), որը կարող է տարածվել ստամոքսից դեպի վեր։ Այրոցքը հաճախ սասատկանում է «ծանր» սնունդ ընդունելուց հետո, պառկելիս կամ մարմինն առաջ թեքելիս։

Այրոցք, թե՞ սրտամկանի ինֆարկտ

Հետկրծոսկրային ցավը մարդկանց հիվանդանոցների անհետաձգելի բաժանմունքներ դիմելու հիմնական պատճառներից մեկն է։ Սակայն, իրականում հետկրծոսկրային ցավը կամ այրոցի զգացումը կարող են լինել ոչ թե սրտամկանի ինֆարկտի, այլ ռեֆլյուքսի պատճառով։ Որոշ դեպքերում շատ դժվար է «սրտային» այրոցի զգացումը տարբերակել «մարսողական» այրոցքից։

Բոլոր դեպքերում, երբ ձեզ մոտ հետկրծոսկրային ցավերն ու այրոցի զգացումը սկսվում են հանկարծակի և ուղեկցվում սրտային պատահարին բնորոշ այլ նշաններով (օդի պակասի զգացում, խուճապ, առատ սառը քրտնարտադրություն, գունատություն և այլն), անհապաղ զանգեք 1-03 և կանչեք շտապբուժօգնություն։

Ռեգուրգիտացիա

Ռեգուրգիտացիան ստամոքսահյութի և ստամոքսի այլ թթվային պարունակության ռեֆլյուքսն է և հայտնվելը ձեր ըմպանում և բերանում, որն ուղեկցվում է բերանում տհաճ, թթու համի զգացողությամբ։

Կլման ակտի դժվարություն

ԳԷՌՀ-ով մարդկանց շուրջ մեկ երրորդը նշում է կլման ակտի հետ կապված դժվարություններ (դիսֆագիա)` հատկապես պինդ կերակրատեսակներ ընդունելիս (միս, հաց կամ թխվածքներ):

Ռեֆլյուքսի այլ ախտանիշները

ԳԷՌՀ-ն կարող է առաջացնել այլ նշաններ ևս, օրինակ՝

  • ինքնազգացողության վատացում
  • կայուն հազ, որը կարող է սաստկանալ գիշերները
  • կրծքավանդակի, մասնավորապես՝ հետկրծոսկրային ցավեր
  • ատամների քայքայում և լնդային հիվանդություն
  • լարինգիտ (կոկորդի բորբոքում), որն ուղեկցվում է ցավով և ձայնի խռպոտությամբ
  • «վատ» շնչառություն և բերանից տհաճ հոտ
  • գղտոցներ և վքնածություն (ստամոքսի փքվածության զգացում):

Որոշ մարդկանց մոտ կարող են նաև ի հայտ գալ կլման ակտին և կերակրափողով տաք կամ սառը պինդ սննդի և հեղուկների անցմանն ուղեկցող ցավեր (օդինոֆագիա), որը կարող է վկայել կերակրափողի լորձաթաղանթի էրոզիաների առկայության մասին։

Եթե դուք ունեք ասթմա և ԳԷՌՀ, ասթմայի ախտանիշները կարող են վատթարանալ։

Ե՞րբ դիմել բժշկին

Եթե այոցքի զգացումը հազվադեպ է, օրինակ՝ հայտնվում է ամսական մեկ կամ երկու անգամ, հավանաբար բժշկական օգնության կարիք չկա։ Նման դեպքերում ապրելակերպի փոփոխությունները, մասնավորապես, սննդակարգի առողջացումը բավարար կլինի, որ գանգատներն անհետանան։

Կապ հաստատեք ձեր բժշկի հետ, եթե՝

  • ռեֆլյուքսի ախտանիշները խիստ անհանգստացնող են կամ դրսևորվում են հաճախակի, որի կապակցությամբ դուք գրեթե ամեն շաբաթ ստիպված եք ընդունել դեղատոմս չպահանջող դեղեր
  • կլման ակտն ուղկեցվում է ցավերով
  • կլման ակտը դժվարացած է (դիսֆագիա)
  • դուք նկատել եք մարմնի կշռի կորուստ
  • ռեֆլյուքսի գանգատներն ուղեկցվում են կրկնակի կամ արյունային փսխումներով
  • դուք ընդունում եք դեղեր, որոնք կարող են առաջացնել այրոցք (օրինակ՝ Ասպիրին կամ այլ հակաբորբոքային հաբեր)
  • դուք նկատել եք, որ ֆիզիկական ակտիվության ժամանակ ձեր գանգատները սրանում են (ինչը կարող է լինել սրտային հիվանդության նշան)։

Հոդվածը վերանայվել է՝ 02-02-2021