ԳԷՌՀ (ռեֆլյուքս). ինքնօգնություն

ԳԷՌՀ (ռեֆլյուքս). ինքնօգնություն

Ապրելակերպի փոփոխությունները կարող են օգնել թթվային ռեֆլյուքսի հաճախականության կրճատմանը։

Եթե ունեք Գաստրոէզոֆագեալ ռեֆլյուքս-հիվանդության (ԳԷՌՀ), բժիշկը հավանաբար ձեզ խորհուրդ կտա հետևյալ քայլերը։

  • Պահպանե՛ք առողջ քաշ. ավելցուկային կիլոգրամները և որովայնային գիրությունը բարձրացնում են ներորովայնային ճնշումը, սեղմում ձեր ստամոքսը և նպաստում ստամոքսի պարունակության դեպի կերակրափող ռեֆլյուքսին: Քաշի կարգավորումը և կանոնավոր վարժանքները կարող են օգնել ռեֆլյուքսի ախտանիշների կանխարգելմանը։ Ամենօրյա զբոսանքը կնպաստի մարսողության բարելավմանը և քաշի նորմալացմանը։
  • Դադարեցրե՛ք ծխախոտի օգտագործումը. ծխելը թուլացնում է ստորին կերակրափողային սեղմանի պատշաճ գործունեությունը և նպաստում ռեֆլյուքսի առաջացմանը:
  • Բարձրացրե՛ք ձեր անկողնու գլխային ծայրը. եթե անկողին մտնելիս ի հայտ են գալիս այրոցքներ, տարբեր միջոցներով բարձրացրեք ձեր գլխի դիրքը: Նման դեպքերում լրացուցիչ բարձ օգտագործելն արդյունավետ չէ:
  • Սնունդ ընդունելուց անմիջապես հետո մի՛ պառկեք. վերջին սնունդ ընդունելուց հետո համբերեք առնվազն 3 ժամ՝ մինչև անկողին մտնելն ու հորիզոնական դիրք ընդունելը:
  • Սնունդը կերեք դանդաղորեն՝ լավ ծամելով. սննդի ընդունումը դարձրեք ոչ հապշտապ, այլ հակառակը՝ ճաշելը վերածեք հանգիստ ժամանցի։ Սնունդը ծամեք և կուլ տվեք ավելի դանդաղ՝ գդալը և պատառաքաղը բերանին մոտեցնելով միայն նախորդ բաժինը լիարժեք ծամելուց և կուլ տալուց հետո:
  • Խուսափե՛ք այնպիսի սննդամթերքներից և ըմպելիքներից, որոնք կարող են խթանել ռեֆլյուքսի առաջացումը. ռեֆլյուքսի տարածված «խթանող» սննդամթերքներից կամ տրիգերներից են՝ տապակած մթերքներ, ճարպոտ կամ կծու սննդատեսակներ (օրինակ՝ կծու բիբար կամ ծիծակ), տոմատի մածուկ, ալկոհոլ, գազավորված ըմպելիքներ, ցիտրուսային մրգահյութեր, շոկոլադ, անանուխ, սխտոր, սոխ և կոֆեին: Փորձեք խուսափել նաև հետևյալ սննդատեսակներից՝ ծեծած միս, հրուշակեղեն, կրեմով տորթեր և թխվածքաբլիթներ, համբուրգեր, պիցցա և այլն: Փոխարինեք «խնդրահարույց» մթերքներն ու ըմպելիքներն առողջ սննդատեսակներով՝ բջջանքով հարուստ սննդամթերք (ամբողջահատիկ ալյուրից պատրաստված հաց, շագանակագույն բրինձ, մրգեր և բանջարեղեններ, լոբազգիներ և վարսակ), առատ ջուր և այլ «ճիշտ» ըմպելիքներ՝ կաթ կամ բուսական թեյեր և այլն:
  • Խուսափե՛ք շատ ուտելուց և ուշ երեկոյան կամ գիշերները սնունդ ընդունելուց. «ծանրաբեռնված» ստամոքսը և սնունդ օգտագործելուց հետո անմիջապես պառկած դիրք ընդունելը նպաստում են ռեֆլյուքսի առաջացմանը:
  • Խուսափե՛ք որովայնը սեղմող կիպ հագուստից. ձեր իրանը կիպ գրկող կամ սեղմող հագուստը ճնշում է որովայնը և բարձրացնում ստորին կերակրափողային սեղմանի (սֆինկտեր) վրա ստամոքսի ճնշումը:

Այլընտրանքային միջոցներ

ԳԷՌՀ-ը բուժող կամ կերակրափողի վնասումը hետզարգացնող որևէ այլընտրանքային բժշկության միջոց գոյություն չունի, սակայն որոշ օժանդակող և այլընտրանքային թերապիաները կարող են օգնել, որ բժշկի նշանակումները և խորհուրդները դառնան ավելի արդյունավետ:

  • Բուսական միջոցներ. ԳԷՌՀ-ի ախտանիշները մեղմացնելու համար երբեմն օգտագործվում են մատուտակ (солодка) և երիցուկ (ромашка): Նկատի ունեցեք, որ բուսական միջոցները բնավ անվտանգ չեն և կարող են վտանգավոր փոխազդեցություն դրսևորել ձեր ընդունած դեղերի հետ: Քննարկեք այս հարցը մինչև որևէ բուսական ծագման միջոց օգտագործելը:
  • Ռելաքսացիոն թերապիաներ. սթրեսն ու անհանգստությունը թուլացնող հնարքները կարող են մեղմացնել ԳԷՌՀ-ի ախտանիշները: Հարցրեք ձեր բժշկից այս մեթոդների և դրանց ճիշտ կիրառման մասին, օրինակ՝ հարաճուն մկանային թուլացում կամ ուղղորդված երևակայություն:

Հոդվածը վերանայվել է՝ 23-04-2021