Պոդագրա

Պոդագրան հոդերի ցավոտ բորբոքումն է, որի զարգացման մեջ կարևորվում է միզաթթվական աղերի ներ- և հարհոդային կուտակումը։

Թեև պոդագրայի ժամանակ ավելի հաճախ ախտահարվում է ոտնաթաթի բութ մատը (նախագարշապար-մատնոսկրային հոդ), սակայն հիվանդության մեջ կարող են ներգրավվել նաև ձեռքերը, դաստակը, ծունկը, արմուկները և մյուս հոդերը։

Պոդագրան համարվում է նյութափոխանակության խարգարման հիվանդություն, որի ժամանակ «միզաթթու» կոչվող նյութի ավելցուկը բյուրեղների տեսքով կուտակվում և ախտահարում է որոշ հոդեր։

Նորմայում միզաթթուն առաջանում է բջիջների, ԴՆԹ-ի քայքայման արդյունքում կամ ստացվում է մեր ամենօրյա սննդով և ըմպելիքներով։ Դրա որոշ քանակներ հայտնաբերվում են արյան մեջ։ Միզաթթվի հիմնական մասն օրգանիզմից հեռանում է երիկամների միջոցով։

Միզաթթվի ավելցուկային քանակներն արյան մեջ կուտակվում են երկու հիմնական պատճառով, երբ այս նյութի արտադրությունն ուժեղանում է կամ մեզի միջոցով արտաթորումը՝ դանդաղում։ Միզաթթուն հոդերում կուտակվում է աղերի՝ «ուրատների» տեսքով, որոնք էլ առաջացնում են հոդերի սուր և ծանր բորբոքում։

Պոդագրան կարող է զարգանալ բոլոր մարդկանց մոտ, սակայն ավելի հաճախ հանդիպում է բարձր տարիքով տղամարդկանց մոտ։ Երբեմն պոդագրա կարող է զարգանալ նաև կանանց մոտ՝ դաշտանադադարից առաջ։

Սեռից և տարիքից բացի, պոդագրայի առաջացմանը կարող են նպաստել նաև հետևյալ գործոնները՝

• երիկամներով ջրի հեռացումը խթանող դեղերի ընդունում (միզամուղներ կամ դիուրետիկներ)
• մարմնի ավելցուկային զանգված կամ գիրություն
• երիկամային հիվանդություններ, արյան բարձր ճնշում (հիպերտոնիա), դիաբետ (շաքարախտ), արյան մեջ ճարպերի և խոլեսթերինի բարձր ցուցանիշներ
• պուրինով հարուստ սննդամթերքներ՝ «կարմիր» միս, ճարպոտ ծովամթերք կամ քաղցրահամ ըմպելիքներ
• ոգելից խմիչքների, հատկապես գարեջրի, պորտվեյնի կամ թունդ խմիչքների օգագործում։

Պոդագրան կարող է ուղեկցել նաև արյան որոշ հիվանդություններին (լեյկոզ և լիմֆոմա) և քաղցկեղին։

Պոդագրայի վաղ բուժումը կարող է մեղմացնել հոդերի բորբոքումը և ցավերը։

Հաճախ պոդագրայի «նոպաները» կարող են առաջացնել հոդի և մոտակա ոսկրերի անդառնալի վնասում։