Ախտանիշներ - Գրանդ մալ

Տոնիկ-կլոնիկ կամ գեներալիզացված ցնցումներն ունեն երկու փուլ:

• Տոնիկ փուլ. առաջանում է գիտակցության կորուստ: Կմախքային մկանները հանկարծակի կծկվում և «քարանում» են, որի հետևանքով անձը վայր է ընկնում: Այս փուլը հակված է տևելու մոտ 10-20 վայրկյան:
• Կլոնիկ փուլ. մկանները սկսում են ռիթմիկ կծկվել: Դրանք հաջորդաբար կծկվում և թուլանում են: Մկանային ցնցումները (կոնվուլսիաներ) սովորաբար տևում են 1-2 րոպե կամ ավելի պակաս:

Հետևյալ ախտանիշները հանդիպում են տոնիկ-կլոնիկ ցնցումներով որոշ, բայց ոչ՝ բոլոր մարդկանց մոտ:

• Ճչոց. որոշ մարդիկ ցնցման սկզբում կարող են ճիչ արձակել:
• Աղիների և միզապարկի վերահսկողության կորուստ. ակամա կղարձակում կամ միզարձակում կարող է տեղի ունենալ ցնցման ժամանակ կամ դրանից հետո:
• Ցնցումից հետո արձագանքի բացակայություն. ցնցումների ավարտից հետո անձը կարող է մի քանի րոպե մնալ անգիտակից վիճակում:
• Շփոթվածություն. տոնիկ-կլոնիկ ցնցումից հետո անձը հաճախ ապակողմնորոշված է: Սա կոչվում է պոստիկտալ շփոթվածություն:
• Հոգնածություն. տոնիկ-կլոնիկ ցնցումներից հետո քնկոտությունը տարածված վիճակ է:
• Ուժեղ գլխացավ. տոնիկ-կլոնիկ ցնցումներից հետո կարող են առաջանալ գլխացավեր:

Ե՞րբ դիմել բժշկին

Զանգեք 1-03 և կանչեք շտապ օգնություն կամ դիմեք անհետաձգելի բուժօգնության, եթե՝

• ցնցումը տևում է ավելի, քան հինգ րոպե
• ցնցումների դադարումից հետո շնչառությունը կամ գիտակցությունը չեն վերականգնվում
• անմիջապես հաջորդում է երկրորդ ցնցումը
• ունեք բարձր ջերմություն
• ենթարկվել եք ջերմահարության
• հղի եք
• ունեք շաքարային դիաբետ
• ցնցման ընթացքում կամ վայր ընկնելիս վնասվածք եք ստացել:

Խոսեք ձեր բժշկի հետ, եթե կյանքում առաջին անգամ ցնցում եք տարել:

Նաև հանդիպեք ձեր կամ ձեր երեխայի բժշկին, եթե՝

• առանց որևէ ակնհայտ պատճառի առկա ցնցումները հաճախացել են
• նկատել եք ցնցման նոր ախտանիշներ: