Գրադարան

Գրեյվսի հիվանդություն. ինքնօգնություն

Գրեյվսի հիվանդություն. ինքնօգնություն

Time Read 2 րոպե

Եթե ունեք Գրեյվսի հիվանդություն, առաջնահերթություն դարձրեք ձեր հոգեկան և ֆիզիկական բարեկեցությունը.

  • Ճիշտ սննվելը և վարժանքները կարող են օգնել բուժման ընթացքում որոշ ախտանիշների և ձեր ընդհանուր ինքնազգացողության բարելավմանը: Օրինակ, քանի որ ձեր վահանաձև գեղձը վերահսկում է ձեր նյութափոխանակությունը, դուք կարող եք հակված լինել քաշ հավաքելու, երբ շտկվի թիրեոտոքսիկոզը: Գրեյվսի հիվանդությունը կարող է նաև առաջացնել ոսկրերի փխրունացում, ուստի քաշային ծանրաբեռնվածությամբ վարժանքները կարող են օգնել պահպանելու ոսկրերի խտությունը:
  • Սթրեսի թուլացումը կարող է օգտակար լինել, քանի որ սթրեսը կարող է նպաստել կամ վատթարացնել Գրեյվսի հիվանդությունը: Երաժշտություն լսելը, տաք լոգանք ընդունելը կամ զբոսնելը կարող են օգնել ձեր հոգեկան լարվածության թուլացմանը։ Ձեր բժշկի հետ միասին մշակեք ծրագիր, որը ձեր առօրյայի մեջ կներառի լավ սնուցումը, վարժանքները և ռելաքսացիան:

Գրեյվսի օֆթալմոպաթիայի ինքնօգնություն

Այս քայլերը կարող են օգնել ձեր աչքերի հետ կապված գանգատների և ախտանիշների մեղմացմանը:

  • Աչքերին դրեք սառը թրջոցներ. ավելացված խոնավությունը կարող է հանգստացնել ձեր աչքերը և մեղմացնել աչքերում տհաճ զգացողությունները:
  • Դրեք արևային ակնոց. ակնակապիճներից դուրս տեղաշարժված աչքերն ավելի խոցելի են ուլտրամանուշակագույն ճառագայթների և ավելի զգայուն են պայծառ լույսի նկատմամբ: Աչքերը կողքերից գրկող արևային ակնոցը նաև կթուլացնի քամուց ձեր աչքերի գրգռվածությունը:
  • Օգտագործեք աչքերն օծող կաթիլներ. աչքի կաթիլները կարող են թեթևացնել աչքերի մակերեսի չորության և քերծվածքի զգացումը: Եթե ձեր աչքերը լիարժեք չեն փակվում, գիշերը կարելի է կիրառել պարաֆինի վրա հիմնված գել:
  • Բարձրացրեք ձեր մահճակալի գլուխը. գլուխը մարմնի մնացած մասից բարձր պահելը նվազեցնում է հեղուկի կուտակումը գլխում և կարող է թուլացնել ճնշումը ձեր աչքերի վրա՝ մեղմացնելով այտուցը:
  • Մի՛ ծխեք. ծխելը վատթարացնում է Գրեյվսի օֆթալմոպաթիան:

Գրեյվսի դերմոպաթիայի ինքնօգնություն

Եթե հիվանդությունն ազդում է ձեր մաշկի վրա (Գրեյվսի դերմոպաթիա), օգտագործեք հիդրոկորտիզոն պարունակող նրբաքսուքներ (կրեմ) կամ քսուքներ՝ այտուցը և կարմրությունը թեթևացնելու համար: Բացի այդ, ձեր ոտքերի վրա սեղմող ծածկույթների օգտագործումը կարող է օգնել:

Բուժում      

Հոդվածը տեղադրվել է՝ 08-05-2021 վերանայվել է՝ 09-03-2023

Հեղինակ

Հեղինակային բոլոր իրավունքները պատկանում են Մեդեքսին։

Մեդեքս-հեղինակների մասին
Մեր կայքի հոդվածները պատրաստվում են տարբեր ոլորտների փորձառու բժիշկների և առողջապահության մասնագետների կողմից՝ օգտագործելով բժշկագիտության վերջին տվյալները և լավագույն փորձը:

Նույն այս թեմայով