Ալերգիկ ռինիտ. կանխարգելում

Ալերգիկ ռինիտի կանխարգելումը հիմնված է ձեր հիվանդությունը պատճառող կամ սրացնող ալերգենի հետ շփումը բացառելու վրա:

Մինչ այդ, բնականաբար, պետք է հայտնաբերել, թե կոնկրետ որ ալերգենը կամ դրանց խումբն է հանդիսանում ձեր ալերգիկ ռինիտի պատճառը:

Եթե ձեր ալերգենը ծաղկափոշին է

• Փորձեք հետաձգել բնության գիրկ գնալը (հատկապես շոգ կամ քամոտ օրերին, ծառերի ծաղկման շրջանում), ծայրահեղ դեպքում կրեք թղթե դիմակ:
• Խուսափեք խոտածածկ տարածքներում քայլելուց կամ խաղալուց, խոտերին ձեռք տալուց, կտրտելուց կամ խոտերի վրա պառկելուց:
• Եթե դուք պետք է դրսում ժամանակ անցկացնեք (այգի և այլն), կրեք աչքերը լավ ծածկող պաշտպանական ակնոցներ:
• Դրսից տուն վերադառնալուց հետո փոխեք ձեր շորերը, ընդունեք ցնցուղ և փոխեք ձեր սպիտակեղենը:
• Տան և ավտոմեքենայի պատուհանները փակ պահեք: Ավտոմեքենայում կարող եք միացնել օդորակիչ՝ ռեցիրկուլատոր ռեժիմով:
• Քամոտ և փոշոտ օրերին աշխատեք տունը մնալ:
• Հնարավորության դեպքում խուսափեք լվացած շորերը դրսում չորացնելուց:

Ալերգենների կանխարգելման այլ քայլեր

• Մաքուր պահեք ձեր տունը՝ հատակը, կահույքը և գույքը: Տան մաքրության մեջ օգտագործեք միայն խոնավ շորեր և խոզանակներ: Նույնը վերաբերվում է ձեր ավտոմեքենային:
• Աշխատեք տանը չունենալ կամ չպահել փոշի կլանող գույք և պարագաներ (օրինակ՝ գորգ, վարագույր և այլն):
• Եթե տնային կենդանի եք պահում, հանձնեք այն ուրիշին:
• Մի ծխեք և խուսափեք այլ մարդկանց ծխախոտի ծուխը շնչելուց. ծխախոտի ծուխն ինքը կարող է հանդիսանալ ալերգեն, միևնույն ժամանակ՝ գրգռել ձեր աչքերը, վերին շնուղիները և սրացնել ռինիտի նշանները:
• Եթե ձեր ռինիտի պատճառը աշխատավայրում առկա ալերգեններն են, ձեր պայմանների հնարավոր փոփոխման հարցերով զրուցեք ձեր ղեկավարի հետ: