Ալերգիկ ռինիտ

Ալերգիկ ռինիտ
Անգլերեն անվանումը՝ Hay Fever, Allergic Rhinitis

Ալերգիկ ռինիտը կամ հարդային տենդը սովորաբար տարվա որոշ սեզոններին սրացող ալերգիկ ռեակցիա է, որի գլխավոր ախտանիշը հարբուխն է։

Ի՞նչ է ալերգիկ ռինիտը

Ալերգիկ ռինիտը (ալերգիկ քթաբորբ) ալերգիկ ռեակցիա է, որն առաջանում է ալերգիա առաջացնող տարբեր պատճառներից: Ալերգիկ ռինիտի մյուս անվանումն է հարդային (կամ սեզոնային) տենդ։

Ալերգիկ ռինիտի ժամանակ որպես անմիջական պատճառներ (ալերգեններ) կարող են հանդես գալ ինչպես տան ներսում, այնպես էլ արտաքին միջավայրում առկա փոշին, փոշու տիզը, սնկային սպորները, կենդանիների մորթիները, ծառերի, խոտաբույսերի և մոլախոտերի ծաղկափոշին և այլն։ Որոշ մարդկանց համար ալերգեն կարող է դառնալ նաև իրենց աշխատավայրին բնորոշ գործոնները։

Հայտնվելով մարդու վերին շնչուղիներում և աչքերում, այս ալերգեններն առաջացնում են քթի, հարքթային ծոցերի (սինուսներ), աչքերի, կոկորդի լորձաթաղանթի գրգռում, բորբոքում և այտուց։ Արդյունքում, ի հայտ են գալիս ալերգիկ ռինիտին բնորոշ ախտանիշներ՝

  • փռշտոց
  • քթահոսություն («վազող քիթ») և (կամ) քթի փակվածություն
  • աչքերի քոր։

Ալերգիկ ռինիտը սովորաբար սկսվում է մանկական կամ դեռահաս տարիքում, սակայն կարող է առաջին անգամ ի հայտ գալ տարիքային բոլոր խմբերում։ Ալերգիկ ռինիտի նկատմամբ ավելի «ռիսկային» են այն մարդիկ, ում ընտանեկան պատմության մեջ առկա է ալերգիկ բնույթի որևէ հիվանդություն (օրինակ՝ ասթմա կամ էկզեմա)։ Իրականում, ալերգիկ ռինիտը և ասթման ունեն ռիսկի և պատճառային, ինչպես նաև ժառանգական ընդհանուր գործոններ։

Մարդկանց մեծ մասի մոտ ալերգիկ ռինիտը ենթարկվում է բուժման։ Բուժումն այս դեպքում գուցե լիարժեք արդյունք չտա, սակայն զգալի կերպով մեղմացնում է սրացած գանգատները։

Զրուցեք ձեր բժշկի հետ, եթե ձեզ մոտ նկատել եք ալերգիկ ռինիտի նշաններ։

Հոդվածը վերանայվել է՝ 06-05-2019