Ինքնօգնություն - Ալերգիկ ռինիտ

Իրականում հնարավոր չէ ամբողջությամբ խուսափել ալերգեններից, բայց դուք կարող եք նվազեցնել ձեր ախտանիշները՝ սահմանափակելով ձեր նկատմամբ այս նյութերի ​ազդեցությունը:

Եթե գիտեք, թե ինչից եք ալերգիկ, կարող եք խուսափել ձեր հրահրող գործոններից: Դիտարկենք այս խորհուրդներից մի քանիսը:

Ծաղկափոշի և բորբոսասնկիկների սպորներ

Ծաղկափոշին և բորբոսասնկիկների սպորները փոշու մանր մասնիկներ են, որոնք բույսերն օգտագործում են փոշոտման ժամանակ: Դրանք լողում են քամու մեջ և կարող են մտնել ձեր քիթն ու աչքերը:

• Փակեք դռներն ու պատուհանները ծաղկափոշու սեզոնի ժամանակ:
• Լվացքը դրսում մի՛ կախեք. ծաղկափոշին կարող է կպչել սավաններին և սրբիչներին:
• Օգտագործեք օդորակիչ (կոնդիցիոներ) ձեր տանը և մեքենայում:
• Օգտագործեք ալերգենների զտիչ (ֆիլտր) ձեր տան օդափոխության համակարգում և պարբերաբար փոխեք այն:
• Խուսափեք բացօթյա զբոսանքից վաղ առավոտյան, երբ ծաղկափոշու քանակը ամենաբարձրն է, ինչպես նաև ծաղկափոշու բարձր քանակի օրերին:
• Չոր, քամոտ օրերին մնացեք տանը:
• Օգտագործեք չորացուցիչ ներսի տարածքների խոնավությունը նվազեցնելու համար:
• Օգտագործեք բարձարդյունավետ օդային զտիչ (HEPA) ձեր ննջասենյակում և այլ սենյակներում, որտեղ շատ ժամանակ եք անցկացնում:
• Խուսափեք սիզամարգ հնձելուց կամ տերևներ փոցխելուց:
• Կրեք փոշու դիմակ, եթե զբաղված եք տան կամ այգու մաքրության գործերով:
• Դրսում կրեք պաշտպանիչ կամ արևային ակնոց, որ սահմանափակեք ծաղկափոշու ներթափանցումը ձեր աչքեր:

Փոշու տիզեր

Փոշու տիզերը մանր միջատների նմանվող վնասատուներ են, որոնք տարածված են փոշու մեջ: Դրանք ապրում են անկողնային պարագաներում, գորգերում, կահույքի պաստառներում և փափուկ խաղալիքներում։ Փոշու տիզերը սիրում են տաք և խոնավ տարածքներ:

• Օգտագործեք հակաալերգիկ ծածկոցներ ներքնակների և բարձերի վրա:
• Լվացեք սավանները, վերմակները և փափուկ խաղալիքներն առնվազն շաբաթը մեկ անգամ՝ առնվազն 54° C տաք ջրով:
• Ներսի տարածքների խոնավությունը նվազեցնելու համար օգտագործեք չորացուցիչ կամ օդորակիչ:
• Ամեն շաբաթ փոշեծծեք գորգերն այնպիսի փոշեկուլով, որն ունի փոքր մասնիկների կամ HEPA ֆիլտր:
• Եթե շատ զգայուն եք փոշու տիզերի նկատմամբ, մտածեք գորգերը հեռացնելու մասին, հատկապես այն վայրերից, որտեղ քնում եք:
• Օգտագործեք խոնավ շվաբր և փոշու շոր, որ խուսափեք փոշին օդ բարձրացնելուց:

Ուտիճներ (տառականներ)

Ուտիճները թողնում են մանրագույն արտաթորանքներ, որոնք կարող են հայտնվել օդում: Ազատվելով միջատներից՝ խուսափում եք դրանց արտաթորանքների մասնիկներից։

• Փակեք բոլոր ճաքերն ու ճեղքերը, որտեղ կարող են մտնել ուտիճները:
• Ամրացրեք (հերմետիկացրեք) և վերանորոգեք հոսացող ծորակները և խողովակները:
• Ամեն օր լվացեք սպասքը և դատարկեք կենցաղային աղբը:
• Մաքրեք սննդի փշրանքները սեղաններից և հատակից:
• Պահպանեք սնունդը, ներառյալ տնային կենդանիների սնունդը փակ ամաններում:
• Մտածեք վնասատուների մասնագիտական ոչնչացման մասին:

Տնային կենդանիների թեփ

Կենդանիների թեփը մաշկի մանր մասնիկներ են, որոնք թափվում են կատուների, շների և մորթի կամ փետուրն ունեցող այլ կենդանիների կողմից: Տնային կենդանիների մեզը և թուքը նույնպես կարող են պարունակել ալերգեններ:

• Հնարավորության դեպքում տնային կենդանիներին պահեք ձեր տնից դուրս:
• Հնարավորության դեպքում շներին լողացրեք շաբաթը երկու անգամ: Կատուներին լողացնալու օգուտն ապացուցված չէ:
• Կենդանիներին հեռու պահեք ձեր ննջասենյակից և կահույքից:
• Հաճախակի փոշեծծեք գորգերն այնպիսի փոշեկուլով, որն ունի փոքր մասնիկների կամ HEPA ֆիլտր:
• Լվացեք ձեռքերը տնային կամ ընտանի կենդանուն շոյելուց հետո։
• Լվացեք հագուստը տնային կամ ընտանի կենդանու հետ շփվելուց հետո:
• Խնդրեք ալերգիա չունեցող անձին, որ հոգ տանի տնային կենդանիների տարածքների խնամքի և մաքրման մասին:
• Եթե խիստ զգայուն եք կենդանիների թեփի նկատմամբ, մտածեք գորգերի հեռացման մասին, հատկապես այն վայրերից, որտեղ դուք քնում եք:
• Օգտագործեք խոնավ շվաբր և փոշու կտոր, որ խուսափեք տնային կենդանիների թեփն օդ բարձրացնելուց: