Ախտանիշներ - Հեմոֆիլիա

Հեմոֆիլիայի գանգատներն ու ախտանիշները տարբեր են՝ կախված մակարդելիության գործոնների մակարդակից:

Եթե ​​ձեր մակարդելիության գործոնի մակարդակը թեթև նվազել է, դուք կարող եք արյունահոսել միայն վիրահատությունից կամ վնասվածքից հետո: Եթե ​​ձեր մակարդելիության գործոնի անբավարարությունը ծանր է, դուք կարող եք հեշտությամբ արյունահոսել առանց տեսանելի պատճառի:

Ինքնաբուխ արյունահոսության գանգատներն ու ախտանիշները ներառում են հետևյալը՝

• անբացատրելի և չափազանց առատ արյունահոսություն կտրվածքներից կամ վնասվածքներից, վիրահատությունից կամ ատամնաբուժական միջամտություններից հետո
• շատ խոշոր կամ խորը արյունազեղումներ (կապտուկներ)
• պատվաստումներից հետո անսովոր արյունահոսություն
• ձեր հոդերում ցավ, այտուց կամ կարկամություն
• արյուն ձեր մեզի կամ կղանքի մեջ
• քթից արյունահոսություն՝ առանց հայտնի պատճառի
• նորածինների մոտ՝ անբացատրելի գրգռվածություն:

Ներուղեղային արյունահոսություններ

Ծանր հեմոֆիլիա ունեցող որոշ մարդկանց մոտ գլխի նույնիսկ թեթև հարվածը կարող է արյունահոսություն առաջացնել գլխուղեղի մեջ: Սա հազվադեպ է պատահում, սակայն հնարավոր ամենածանր բարդություններից մեկն է: Գանգատներն ու ախտանիշները ներառում են՝

• ուժեղ, երկարատև գլխացավ
• կրկնվող փսխումներ
• քնկոտություն կամ անտարբերություն
• երկտեսություն (դիպլոպիա)
• հանկարծակի թուլություն կամ անհաջող շարժումներ
• ջղաձգումներ (կոնվուլսիա) կամ ցնցումներ:

Ե՞րբ դիմել բժշկին

Դիմեք անհետաձգելի բուժօգնության, եթե& դուք կամ ձեր երեխան ունեք՝

• ներուղեղային արյունահոսության գանգատներ կամ ախտանիշներ
• վնասվածք, որի դեպքում արյունահոսությունը չի դադարում
• այտուցված հոդե, որոնք հպվելիս տաք են և վիրակապելիս՝ ցավոտ: