Հեմոֆիլիա. բուժում

Հեմոֆիլիայի ախտանիշների կառավարումը դժվար գործ է, սակայն կարող է արդյունավետ կերպով վերահսկվել համարժեք բուժման և խնամքի պայմաններում:

Հեմոֆիլիայի տարբեր տեսակները կապված են տարբեր մակարդելիության գործոնների պակասի կամ բացակայության հետ: Ուստի, ծանր հեմոֆիլիայի հիմնական բուժումը քչացած կամ բացակայող գործոնների փոխարինող բուժումն է, որոնք սովորաբար ներմուծվում են ներերակային կաթետերով:

Այսպիսի փոխարինող բուժում կարող է նշանակվել, որ դադարեցվի ընթացիկ արյունահոսության դրվագները: Բուժումը նաև կարող է տրվել հատուկ մշակված օրացույցով, որ կանխարգելվեն արյունահոսության դրվագները: Որոշ մարդիկ կարիք ունեն ստանալու շարունակական փոխարինող բուժում:

Անհրաժեշտ մակարդելիության գործոնը կարող է ստացվել դոնորական արյունից: Նմանատիպ նյութերը, որոնք կոչվում են «ռեկոմբինանտ մակարդելիության գործոններ», կարող են ստացվել լաբորատորիաներում և չպարունակել մարդկային արյուն:

Բուժման այլ մեթոդներից են՝

• Դեսմոպրեսին. թեթև հեմոֆիլիայի որոշ ձևերի ժամանակ այս հորմոնը կարող է խթանել օրգանիզմի կողմից մակարդելիության գործոնների արտադրությունը: Դեղամիջոցը կարող է դանդաղորեն ներարկվել երակի մեջ կամ նշանակվել որպես քթային սփրեյ:
• Մակարդուկ-պրեզերվացնող դեղեր. այս դեղերը օգնում են, որ ձևավորված մակարդուկը չքայքայվի: Ֆիբրինը հերմետիկացնողներն առանձնահատուկ օգտակար են ատամնաբուժական միջամտություններ կատարելիս:
• Ֆիզիոթերապիա. ֆիզիոթերապևտիկ միջոցառումները կարող են թեթևացնել ներհոդային արյունազեղումներով (հեմարթրոզ) պատճառված հոդացավերը և հոդաբորբը (հեմարթրիտ): Այնուամենայնիվ, հոդերի անդառնալի ձևափոխության կամ անշարժացման (անկիլոզ) դեպքում ձեզ կարող է առաջարկվել նաև վիրահատական միջամտություն.
• Փոքր կտրվածքների առաջին օգնություն. ճնշող վիրակապերը կամ կպչուն սպեղանիները կարող են օգնել փոքր կտրվածքներից շարունակվող թեթև արյունահոսության դադարեցմանը: Դուք կարող եք օգտագործել նաև սառցապարկ: Սառցե խորանարդիկները կարող են օգտակար լինել բերանի խոռոչում առաջացած ատամներից կամ լնդերից արյունահոսությունների ժամանակ:
• Պատվաստում. թեև մեր օրերում արյան փոխներարկումը դարձել է խիստ անվտանգ, այնուամենայնիվ, դուք կարող եք ձեր բժշկի հետ քննարկել հեպատիտ B-ի դեմ պատվաստում ստանալու նպատակահարմարության մասին:

Առատ արյունահոսությունից խուսափելուն և ձեր հոդերը պաշտպանելուն կարող են օգնել նաև այս պարզ մոտեցումները՝

• կանոնավոր մարզվեք, որը կարող է ամրապնդել ձեր մկաններն ու պաշտպանել հոդերը, սակայն խուսափեք կոնտակտային մարզաձևերից (ֆուտբոլ, հոկեյ և այլն)
• խուսափեք որոշ դեղերից, որոնք կարող են նպաստել արյունահոսության առատացմանը (օրինակ՝ Ասպիրինի կամ Իբուպրոֆենի փոխարեն օգտագործեք Պարացետամոլ, սակայն՝ միայն հույժ անհրաժեշտ դեպքերում)
• խուսափեք նաև արյունը «ջրիկացնող» դեղերից, այդ թվում՝ Հեպարին, Վարֆարին, Կլոպիդոգրել, Պրասուգրել, Տիկագրելոր, Ռիվարոքաբան, Ապիքսաբան, Էդոքսաբան, Դաբիգատրան և այլն
• հետևեք ատամների խնամքին, որի շնորհիվ կկանխարգելվի ատամի հեռացման անհրաժեշտությունը
• պաշտպանեք երեխային վնասվածքներից՝ օգտագործելով հոդերի պաշտպանական միջոցներ, տանը հնարավորինս խուսափելով սրածայր կամ սուր եզրով կահույքից և այլն: