Ծանր հեմոֆիլիայի հիմնական բուժումը ներառում է երակային կաթետերով ձեզ անհրաժեշտ մակարդելիության գործոնի փոխարինումը:
Այս փոխարինող բուժումը կարող է տրվել ընթացքի մեջ գտնվող արյունահոսության դրվագը բուժելու համար: Այն կարող է տրվել նաև տանը կանոնավոր ժամանակացույցով, որը կարող է օգնել արյունահոսության դրվագների կանխարգելմանը: Որոշ մարդիկ ստանում են շարունակական փոխարինող թերապիա:
Փոխարինող մակարդելիության գործոնը կարող է ստացվել դոնորական արյունից: Նմանատիպ արտադրանքները, որոնք կոչվում են ռեկոմբինանտ մակարդելիության գործոններ, պատրաստվում են լաբորատորիայում, այլ ոչ թե մարդու արյունից:
Այլ բուժումները ներառում են հետևյալը:
- Դեսմոպրեսին. թեթև հեմոֆիլիայի որոշ ձևերի դեպքում այս հորմոնը կարող է խթանել օրգանիզմի կողմից ավելի շատ մակարդելիության գործոնների ազատումը: Այն կարող է դանդաղ ներարկվել երակի մեջ կամ օգտագործել որպես քթային սփրեյ:
- Էմիցիզումաբ (Հեմլիբրա). սա ավելի նոր դեղամիջոց է, որը չի ներառում մակարդելիության գործոններ: Այս դեղամիջոցը կարող է օգնել կանխելու արյունահոսության դրվագները հեմոֆիլիա A ունեցող մարդկանց մոտ:
- Մակարդուկը (թրոմբը) պահպանող դեղեր. այս դեղամիջոցները, որոնք նաև հայտնի են որպես հակաֆիբրինոլիտիկներ, օգնում են կանխելու արյան մակարդուկի (թրոմբի) քայքայումը:
- Ֆիբրինային հերմետիկներ. դրանք կարող են ուղղակիորեն կիրառվել վերքերի վրա՝ մակարդմանը և ապաքինմանը նպաստելու համար: Ֆիբրինային հերմետիկները հատկապես օգտակար են ատամնաբուժական միջամտություններ համար:
- Ֆիզիոթերապիա. սա կարող է թեթևացնել գանգատներն ու ախտանիշները, եթե ներքին արյունահոսությունը վնասել է ձեր հոդերը (հեմարթրիտ): Ծանր կամ անդառնալի վնասը, ինչպիսիք են հոդի ձևափոխությունը (դեֆորմացիա) կամ անշարժացումը (անկիլոզ), կարող է պահանջել վիրահատություն:
- Փոքր կտրվածքների առաջին օգնություն. ճնշող վիրակապերը կամ կպչուն սպեղանիները կարող են օգնել փոքր կտրվածքներից շարունակվող թեթև արյունահոսության դադարեցմանը: Մաշկի տակ արյունահոսության փոքր հատվածների դեպքում օգտագործեք սառցե պարկ: Սառցե խորանարդիկները կարող են օգտակար լինել բերանի խոռոչի արյունահոսությունների ժամանակ:
Հոդվածը հրապարակվել է՝ 23-05-2020
Վերջին վերանայում՝ 23-04-2024