Թութք. պատճառներ

Թութքը զարգանում է հետանցքի ներսի պաշտպանիչ հյուսվածքների թուլացման պատճառով:

Որոշակի գործոնների ազդեցությամբ ենթարկվելով լրացուցիչ ճնշման՝ հետանցքի շրջանի արյունատար անոթները արյունալեցվում և լայնանում են՝ առաջացնելով հանգույցներ (հեմորոիդներ): Այս գործոններից են՝

• բարձր տարիք
• մարմնի ավելցուկային քաշ
• երկար ձգձգվող փորկապություն կամ փորլուծություն
• հղիություն
• զուգարանում կքանստած կամ զուգարանակոնքին նստած վիճակում երկար ժամանակ անցկացնելը
• հաճախակի ծանր բեռներ բարձրացնելը:

Փորկապությունը հանդիսանում է թութքի առաջացման կարևոր գործոն, քանի որ զուգարանում աղիները դատարկելիս (կղելիս) դուք ստիպված գործադրում եք լրացուցիչ ջանքեր և լարում եք որովայնի պատը, որը բերում է հետանցքի ներսի անոթների արյունալեցման և լայնացման, իսկ ժամանակի ընթացքում՝ նաև հետանքցի պատերի թուլացման:

Թութքը հաճախ ուղեկցում է նաև հղիությանը, քանի որ մի կողմից հղի կանանց մոտ փորկապությունն ավելի հաճախ է հանդիպում, և մյուս կողմից՝

• աճող և մեծացող պտուղը բարձրացնում է ներորովայնային ճնշումը
• մեծանում է շրջանառող արյան ծավալը
• հղիության ընթացքում արտադրվող որոշ հորմոններ թուլացնում են արյունատար անոթների պատը:

Թութքը կարող է նաև ունենալ ժառանգական նախատրամադրվածություն և ավելի հաճախ հանդիպել որոշ ընտանիքներում:

Թութքը հաճախ առանց որևէ բուժման ինքնուրույն լավանում է, սակայն, եթե դուք աղիները դատարկելիս նկատել եք արյուն կամ թութքային ցավերը խիստ ուժեղ են, դիմեք ձեր բժշկին: