Թութք. բուժում

Թութք. բուժում

Թութքը համ հեմորոիդ հանգույցները սովորաբար առանց որևէ բուժման ինքնուրույն անհետանում են:

Որոշ դեպքերում բժիշկը կարող է առաջարկել հնարավոր փորկապությունը մեղմացնող, հետևաբար՝ թութքի լավացմանն օգնող միջոցառումներ, այդ թվում՝

  • սննդում մեծ քանակով բջջանք պարունակող սննդամթերքների օգտագործում
  • ամեն օր խմելու ջրի մեծ քանակների ընդունում
  • ըստ անհրաժեշտության, մեղմ լուծաղականների ընդունում, որոնք կփափկացնեն հաստ աղիների պարունակությունը
  • այնպիսի դեղերից խուսափում, որոնք կարող են առաջացնել փորկապություն (օրինակ՝ կոդեին պարունակող պատրաստուկներ):

Դեղորայքային բուժում

Որոշ դեպքերում, հատկապես երբ թութքի ախտանիշները սուր են, կարող է առաջանալ որոշ դեղեր ընդունելու անհրաժեշտություն: Օրինակ, հետանցքի շրջանի ուժեղ ցավերի և բորբոքման ժամանակ հաճախ օգտագործվում են դեղատոմս չպահանջող որոշ հեմորոիդային դեղեր, որոնք դուրս են գրվում կամ արտադրվում են հետանցքային (անալ) օգտագործման քսուքների, յուղերի կամ մոմիկների ձևով:

Եթե հետանցքի շրջանի բորբոքումն արտահայտված է, բժիշկը նաև կարող է նշանակել որևէ կորտիկոստերոիդային քսուք (հետանցքի շուրջը օծելու համար):

Այլ բուժումներ

Որոշ դեպքերում կարող են առաջարկվել նաև բուժման այլ տարբերակներ, օրինակ սկլերոթերապիա, երբ թութքային հանգույցի մեջ ներարկվում են որոշ քիմիական նյութեր, որոնք հանում են ցավը, դադարեցնում արյունահոսությունը և «ներսից» ազդելով այդ հանգույցների վրա՝ փոքրացնում դրանք:

Շատ հազվադեպ, երբ դեղերով բուժումը կամ սննդակարգի փոփոխությունները որևէ զգալի արդյունք չեն տալիս կամ թութքը ստանում է բարդացած ընթացք, կարող է առաջարկվել վիրահատական բուժում (հեմորոիդէկտոմիա):

Բուժման մեթոդների և դրանց արդյունավետության վերաբերյալ ձեզ լրացուցիչ տեղեկություններ կարող է տրամադրել ձեր բժիշկը:

Իմացե՛ք ավելին թութքի հեռացման վիրահատության (հեմորոիդէկտոմիա) մասին:

Հոդվածը վերանայվել է՝ 01-06-2021