Ինքնօգնություն - Հեմորոյ

Թութքը կամ հեմորոյը քրոնիկ հիվանդություն է, որի դեպքում շատ կարևոր է, որ դուք ինքներդ հոգ տանեք ձեր առողջական վիճակի մասին:

Թութքային հանգույցները հաճախ առանց որևէ բուժման ինքնուրույն ետ են քաշվում: Նման դեպքերը սովորաբար ուղեկցվում են հանգույցների առաջացմանը նախորդող և ուղեկցող գանգատների մեղմացմամբ՝ հետանցքի շրջանում քոր, անհարմարության զգացում (դիսկոմֆորտ) կամ ցավ, ինչպես նաև կղազատելիս երբեմն թարմ արյան հետքեր:

Տեղային միջոցներ

Թութքի պատճառած ցավերը կամ այլ գանգատները կարելի է մեղմացնել հետանցքային օգտագործման որոշ նրբաքսուքների կամ մոմիկների միջոցով, որոնք օժտված են ոչ միայն ցավազրկող, այլև հակաբորբոքային և որոշ բուժական ազդեցություններով:

Սննդակարգ

Անցնելով առողջ սննդակարգի, այսինքն ձեր սննդում առաջնային տեղ հատկացնելով մեծ քանակությամբ բջջանք (բջջանյութ) պարունակող և շաքարից ու ճարպերից աղքատ մթերքներին, կարող եք խուսափել փորկապությունից, որը համարվում է թութքի (հեմորոյ) գլխավոր ռիսկի գործոնը:

Մեծ քանակությամբ բջջանք ուտելը զգալիորեն նպաստում է թութքի կանխարգելմանը, քանի որ այն ձեր աղիքների պարունակությունը (և կղանքը) պահում է փափուկ վիճակում և հեշտացնում է կղազատումը՝ այսպիսով կրճատելով զուգարանում ձեր գործադրած ջանքերը և անցկացրած ժամանակը:

Բջջանքով հարուստ են հետևյալ սննդամթերքները՝

• թարմ մրգեր և բանջարեղեններ
• ամբողջահատիկ ցորենից՝ չթեփազերծված հաց և փաթիլներ (хлопья)
• ընկույզներ և սերմեր
• լոբազգիներ (լոբի, սիսեռ, ոսպ):

Դուք նաև կարող եք օգտագործել բջջանքով հարուստ հավելանյութեր, սակայն նախապատվությունը պետք է տալ բնական սննդամթերքներին:

Եթե որոշել եք ձեր սննդում շատացնել բջջանքի քանակը, ճիշտ կլինի դա անել աստիճանաբար, որ ձեր մարսողական համակարգը հասցնի հարմարվել սննդակարգի փոփոխությանը: Կարևոր է նաև, որ բջջանքի քանակի մեծացմանը զուգահեռ ավելացնեք նաև խմելու ջրի կամ հեղուկների քանակը, որովհետև բջջանքը սպունգի նման ներծծում է աղիներում առկա ջուրը:

Փորձեք խմել շատ ջուր: Կրճատելով քաղցրահամ ըմպելիքները՝ դուք կրճատում եք նաև դրանց միջոցով ձեր ստացած կալորիաները, որոնց ավելցուկը կարող է նպաստել ձեր քաշի ավելացմանը:

Այլ խորհուրդներ

Թութքի առաջացրած տհաճ գանգատները մեղմացնելու համար դուք նաև կարող եք հետևել այս խորհուրդներին՝

• զուգարանում մի՛ խիստ լարվեք կամ մի՛ փորձեք շունչը պահած չձգել փորը՝ արագացնելու կղազատումը
• խուսափեք զուգարանակոնքին երկար նստած մնալուց, որը կարող է բերել աղիների դատարկման գալարակծկանքների ուժեղացման
• զուգարան մտնելուց ձեզ հետ մի՛ վերցրեք ձեր սմարթֆոն կամ ընթերցելու գիրք կամ ամսաթերթ (տե՛ս վերևում)
• խուսափեք աղիները դատարկելուց հետո զուգարանի թղթով ձեր հետանցքի շրջանը սրբելուց, դրա փոխարեն օգտվեք թաց անձեռոցիկից, որով ոչ թե պետք է այս շրջանը քսելով սրբել, այլ՝ նուրբ դիպչելով մաքրել
• նաև օգտակար կարող է լինել որևէ թղթի կամ անձեռոցիկի փոխարեն ձեր հետանցքի շրջանը գոլ կամ սառը ջրով լվանալը
• չմոռանաք զուգարանից օգտվելուց հետո ձեռքերն օճառաջրով լավ լվանալու մասին:

Բոլոր դեպքերում, եթե ձեր թութքային հանգույցները խիստ ցավոտ են կամ առատ արյունահոսում են, դիմեք ձեր բժշկին կամ այցելեք մոտակա վիրաբուժական կենտրոն: