Փոքր ճողվածքները կարող են որևէ գանգատ չառաջացնել, սակայն, կախված ճողվածքապարկի պարունակությունից և դրա սեղմվածության աստիճանից, ավելի հաճախ զարգանում են որոշ նշաններ:
Ճողվածքներին բնորոշ ախտանիշներն են՝
- որովայնի կամ աճուկի շրջանում փքվածություն կամ արտացցում
- ցավ, այրոցի, կծկանքի, ծանրության կամ անհարմարավետության զգացում, հատկապես հազալիս, ծանրություն բարձրացնելիս կամ զուգարանում որովայնը ձգելիս
- արտացցման շրջանում ձգող-քաշող զգացողություն
- աճուկի շրջանում թուլության կամ ձգվածության զգացողություն
- ամորձիների շրջանում այտուցվածության կամ ցավ:
Ստոծանիական ճողվածքի դեպքում կարող են առաջանալ ետկրծոսկրային ցավեր, որոնք երբեմն նմանվում են սրտամկանի ինֆարկտի նշաններին:
Օղակված ճողվածքի գանգատներն ու ախտանիշները
Երբեմն ճողվածքապարկի մեջ հայտնված աղիները կամ ճարպոնը կարող են խիստ ճնշվել կամ սեղմվել, որի պատճառով դրանց արյան հոսքը նվազի կամ դադարի՝ հանգեցնելով աղիքային անանցանելիության և սուր պերիտոնիտի։ Նման դեպքերում ասում են, որ ճողվածքն օղակվել և դարձել է չներուղղվող։
Օղակված ճողվածքի ժամանակ կարող են զարգանալ հետևյալ լրացուցիչ ախտանիշները՝
- ճողվածքային փքված շրջանի կարմրություն և լարվածություն
- ջերմության բարձրացում
- սրտխառնոց
- կրկնակի փսխումներ
- հանկարծակի սկսվող, հարաճուն ուժգնացող և ողջ որովայնով տարածվող ցավեր
- աղիների գործունեության ընդհատում (աղիքային անանցանելիություն):
Ե՞րբ դիմել բժշկին
Եթե կարծում եք, որ ձեզ մոտ առաջացել է ճողվածք, խոսեք ձեր բժշկի հետ ձեր հետագա քայլերի և բուժման հնարավորությունների մասին:
Եթե ձեզ մոտ զարգացել են օղակված ճողվածք ենթադրող ախտանիշներից մեկը կամ մի քանիսը, առանց ուշացնելու տեղեկացրեք ձեր բժշկին կամ այցելեք մոտակա վիրաբուժական բաժանմունք, քանի որ, ամենայն հավանականությամբ, առաջացել է շտապ կամ անհետաձգելի վիրահատության անհրաժեշտություն:
Հոդվածը հրապարակվել է՝ 26-05-2018
Վերջին վերանայում՝ 23-04-2024