Ախտորոշում - ՙՄիջողնային ճողվածք

Ֆիզիկական քննության (բուժզննման) ընթացքում ձեր բժիշկը կստուգի ձեր մեջքը ցավոտության համար:

Ձեզնից կարող է պահանջվել մեջքի վրա պառկել և ձեր ոտքերը շարժել տարբեր դիրքերում, որը կօգնի պարզելու ձեր ցավի պատճառը:

Ձեր բժիշկը նաև կարող է անցկացնել նյարդաբանական հետազոտություն՝ ստուգելու ձեր՝

• ռեֆլեքսները
• մկանային ուժը
• քայլելու ունակությունը
• թեթև հպումներ, ծակոցները կամ թրթռուցներ զգալու ունակությունը:

Սկավառակի ճողվածքի դեպքերի մեծ մասի ժամանակ բուժզննումը և հիվանդության պատմությունը (անամնեզ) այն ամենն է, ինչ անհրաժեշտ է ախտորոշման համար: Եթե ձեր բժիշկը կասկածում է մեկ այլ հիվանդության կամ պետք է ստուգի, թե որ նյարդերն են ախտահարված, կարող է նաև պատվիրել հետևյալ հետազոտություններից մեկը կամ մի քանիսը:

Պատկերային հետազոտություններ

• Ռենտգեն. սովորական ռենտգեն հետազոտությունը չի հայտնաբերում սկավառակների ճողվածքը, սակայն կարող է բացառել մեջքի ցավի այլ պատճառները, ինչպիսիք են վարակը, ուռուցքը, ողնաշարի համաչափության խնդիրները կամ ոսկորների կոտրվածքը:
• ԿՏ սքանավորում. համակարգչային տոմոգրաֆիկ (ԿՏ) սկքաները մի շարք ռենտգենյան ճառագայթներ է ուղղարկում տարբեր ուղղություններից, այնուհետև դրանք համատեղում է ողնաշարի և դրա շուրջ գտնվող կառուցվածքների խաչաձև պատկերներ ստեղծելու համար:
• ՄՌՏ. ռադիոալիքները և ուժեղ մագնիսական դաշտը օգտագործվում են մարմնի ներքին կառուցվածքների պատկերներ ստեղծելու համար: Այս հետազոտությունը կարող է օգտագործվել ճողվածքի սկավառակի գտնվելու վայրը հաստատելու և ախտահարված նյարդերը հայտնաբերելու համար:
• Միելոգրաֆիա. այս հետազոտությամբ ԿՏ սքանավորումից առաջ ողնուղեղային հեղուկի մեջ ներարկվում է գունանյութ (կոնտրաստ): Այս հետազոտությունը կարող է ցույց տալ ողնուղեղի կամ նյարդերի վրա ճնշումը՝ բազմաթիվ ճողվածքային սկավառակների կամ այլ խնդիրների պատճառով:

Նյարդաբանական հետազոտություններ

Էլեկտրոմիոգրաֆիան և նյարդային հաղորդականության հետազոտությունը չափում են, թե որքան լավ են էլեկտրական ազդանիշները հաղորդվում նյարդային հյուսվածքի երկայնքով: Սա կարող է օգնել հստակեցնելու նյարդերի վնասման տեղը:

• Նյարդային հաղորդականության ուսումնասիրություն. այս հետազոտությունը մաշկի վրա տեղադրված էլեկտրոդների միջոցով չափում է մկաններում և նյարդերում էլեկտրական նյարդային ազդանիշները և գործառույթը:
• Էլեկտրամիոգրաֆիա (ԷՄԳ). ԷՄԳ-ի ժամանակ բժիշկը մաշկի միջով ասեղային էլեկտրոդ է մտցնում տարբեր մկանների մեջ: Հետազոտությունը գնահատում է մկանների էլեկտրական ակտիվությունը կծկման և հանգստի ժամանակ: