Ախտանիշներ - Հիպերգլիկեմիա

Հիպերգլիկեմիան սովորաբար ախտանիշներ չի առաջացնում​, քանի դեռ արյան շաքարի (գլյուկոզ) մակարդակները բարձր չեն՝ ավելի քան 10-11,1 մմոլ/լ կամ 180-200 մգ/դլ)։

Հիպերգլիկեմիայի ախտանիշները զարգանում են դանդաղորեն՝ մի քանի օրվա կամ շաբաթվա ընթացքում: Որքան ավելի երկար ժամանակ են արյան շաքարի մակարդակները մնում բարձր թվերի վրա, այդքան ախտանիշներն ավելի են լրջանում: Այնուամենայնիվ, 2-րդ տիպի դիաբետով որոշ մարդիկ, ունենալով արյան շաքարի բարձր մակարդակներ, երկար ժամանակ կարող են որևէ ախտանիշ չնշել:

Վաղ գանգատներ և ախտանիշներ

Հիպերգլիկեմիայի վաղ ախտանիշների իմացությունը կարող է օգնել այս վիճակի հայտնաբերմանը և ճիշտ բուժմանը: Ուշադրություն դարձրեք հետևյալ նշաններին՝

• հաճախամիզություն
• բարձրացած ծարավի զգացում
• մշուշոտ տեսողություն
• թուլություն կամ անսովոր հոգնածություն:

Ավելի ուշ գանգատներ և ախտանիշներ

Եթե հիպերգլիկեմիան չի բուժվում, արյան մեջ և մեզում կարող են կուտակվել թունավոր թթուներ, որոնք կոչվում են կետոններ: Այսպիսի վիճակը կոչվում է կետոացիդոզ: Ախտանիշները ներառում են՝

• մրգահոտ շնչառություն
• բերանի չորություն
• որովայնային ցավեր
• սրտխառնոց և փսխում
• շնչարգելություն և հևոց
• շփոթվածություն կամ շշմածություն
• գիտակցության կորուստ:

Ե՞րբ դիմել բժշկին

Առանց ուշացնելու զանգեք 1-03 և կանչեք շտապբուժօգնություն կամ խնդրեք մեկնումեկին, որ ձեզ տեղափոխի մոտակա հիվանդանոց, եթե՝

• ունեք շարունակվող փորլուծություն կամ փսխումներ և չեք կարողանում որևէ բան ուտել կամ հեղուկներ խմել
• ձեր արյան գլյուկոզի մակարդակները մնում են 13,3 մմոլ/լ-ից (240 մգ/դլ) բարձր և ունեք մեզում կետոնների առկայության ախտանիշներ:

Պայմանավորվեք ձեր բժշկի մոտ արտահերթ այցի համար, եթե՝

• ունեք շարունակվող փորլուծություն կամ փսխումներ, սակայն կարող եք որոշ չափով սննդամթերքներ կամ հեղուկներ ընդունել
• ունեք ավելի քան 24 ժամ շարունակվող բարձր ջերմություն
• չնայած բուժմանը, ձեր արյան գլյուկոզի մակարդակները մնում են 13.3 մմոլ/լ-ից (240 մգ/դլ) բարձր և ունեք մեզում կետոնների առկայության ախտանիշներ
• դժվարանում եք արյան գլյուկոզը պահպանել ձեր թիրախային միջակայքում: