Հիպերգլիկեմիա. ախտորոշում

Հիպերգլիկեմիա. ախտորոշում

Բժիշկը կսահմանի ձեր արյան շաքարի անհատական ցանկալի կամ թիրախային միջակայք:

Տարբեր հեղինակավոր գիտաբժշկական ասոցիացիաներ կամ կազմակերպություններ խորհուրդ են տալիս արյան գլյուկոզի միմյանցից քիչ տարբերվող թիրախային միջակայքեր:

Օրինակ, դիաբետ ունեցող բազմաթիվ մարդկանց համար բազմաթիվ կազմակերպություններ խորհուրդ են տալիս քաղցած վիճակում (մինչև ճաշելը) հասնել արյան շաքարի հետևյալ միջակայքերին՝

  • 4,4-ից մինչև 6,7 մմոլ/լ (80-120 մգ/դլ)՝ մինչև 59 տարեկան մարդկիկ, ովքեր չունեն որևէ այլ հիվանդություն
  • 5,6-ից մինչև 7,8 մմոլ/լ (100-140 մգ/դլ)՝ 60 տարեկան կամ ավելի մեծ և այն մարդկիկ, ովքեր ունեն որևէ հիվանդություն (օրինակ՝ սրտային, թոքային կամ երիկամային) կամ նշում են ցարծր արյան գլյուկոզի (հիպոգլիկեմիա) պատմություն կամ էլ դժվարությամբ են հասկանում հիպոգլիկեմիայի ախտանիշները:

Դիաբետի ամերիկյան ասոցիացիան ընդհանուր առմամբ խորհուրդ է տալիս հետևյալ ուղենիշային միջակայքերը՝

  • 4,4-ց մինչև 7,2 մմոլ/լ (80-130 մգ/դլ)՝ մինչև ճաշելը
  • 10 մմոլ/լ-ից պակաս (մինչև 180 մգ/դլ) ՝ ճաշելուց 2 ժամ հետո:

Ձեր արյան շաքարի թիրախային միջակայքը նույնպես կարող է փոփոխվել, հատկապես, եթե հղի եք կամ ունեք դիաբետի բարդություններ: Թիրախային միջակայքը նաև կարող է փոխվել տարիքն առնելուն զուգընթաց: Երբեմն արյան շաքարի ցանկալի միջակայքին հասնելը դառնում է խիստ դժվարին և ժամանակատար գործընթաց։

Արյան շաքարի տնային վերահսկում

Գլիկոմետրով արյան շաքարի վերահսկումը բուժման պլանի արդյունավետությունը ստուգող պարզ թեստ է: Եթե ունեք դիաբետ, անպայման տանը պահեք գլիկոմետր և ձեր արյան գլյուկոզը չափեք այնքան հաճախ, որքան խորհուրդ է տվել ձեր բժիշկը:

Եթե ունեք հիպերգլիկեմիայի որևէ ախտանիշ, նույնիսկ, եթե դրանք զգալի չեն, չափե՛ք ձեր արյան գլյուկոզի մակարդակը: Եթե արյան շաքարի մակարդակը գերազանցում է 13,3 մմոլ/լ-ը (240 մգ/դլ), օգտագործեք մեզում կետոնների ստուգման տնային հավաքածու: Եթե թեստը դրական է (մեզում կան կետոնային մարմիններ), նշանակում է, օրգանիզմում սկսվել են նյութափոխանակության այնպիսի խանգարումներ, որոնք կարող են հանգեցնել դիաբետի կետոացիդոզի: Այսպիսի իրավիճակում այնպայման տեղեկացրեք ձեր բժշկին, քանի որ կետոացիդոզը պահանջում է արյան շաքարի մակարդակի անվտանգ նվազեցում:

Հեմոգլոբին A1C թեստ

Բժիշկը նաև կարող է ձեզ խորհուրդ տալ գլիկոզիլացված հեմոգլոբինի թեստ (HbA1c), որի կարճ անվանումն է՝ գլիոհեմոգլոբին: Սա արյան հետազոտություն է, որը ցույց է տալիս վերջին 2-3 ամվա արյան շաքարի միջին մակարդակը:

HbA1c-ի 7% կամ ավելի ցածր մակարդակները վկայում են, որ ձեր բուժման պլանն արդյունավետ է, և արյան շաքարը վերջին մի քանի ամսվա ընթացքում հիմնականում պահպանվել է թիրախային միջակայքում:

Սակայն, եթե HbA1c-ն 7%-ից բարձր է, նշանակում է, որ վերջին մի քանի ամսվա ընթացքում ձեր արյան շաքարը մնացել է թիրախային միջակայքից ավելի բարձր թվերի վրա: Նման դեպքերում բժիշկը կարող է առաջարկել բուժման պլանի որոշ փոփոխություններ: Այնուամենայնիվ, որոշ, հատկապես՝ մեծ տարիքով, որոշ հիվանդություններով կամ կյանքի տևողության սահմանափակմամբ մարդկանց համար HbA1c-ի մինչև 8%-ը կարող է համարվել համարժեք:

Նկատի ունեցեք, որ տարբեր լաբորատորիաներ կարող են զեկուցել HbA1c-ի տարբեր նորմալ միջակայքեր: Նույն կերպ, HbA1c-ի ցուցանիշը կախված է նաև արյան հեմոգլոբինի մակարդակից: Ուստի, ձեր լաբորատոր պատասխանները միշտ քննարկեք բժշկի հետ:

Հոդվածը վերանայվել է՝ 10-04-2021