Ախտանիշներ - Երիկամային քարեր

Երիկամային քարը սովորաբար ախտանիշներ չի առաջացնում, քանի դեռ չի շարժվում երիկամի ներսում կամ չի անցնում միզածորաններից մենումեկով:

Միզածորանները երիկամներն ու միզապարկը միացնող խողովակներն են։

Եթե ​​երիկամների քարն անշարժանում է միզածորանների լուսանցքում, կարող է արգելափակել մեզի արտահոսքը և առաջացնել երիկամի այտուց և միզածորանի կծկանք (սպազմ), ինչը կարող է խիստ ցավոտ լինել: Սա կոչվում է երիկամային խիթ կամ կոլիկա և ուղեկցվում հետևյալ ախտանիշներով՝

• ուժեղ, սուր ցավ կողքի և գոտկային հատվածում՝ կողերից ներքև
• ցավ, որը ճառագայթում է դեպի որովայնի ստորին հատված և աճուկ
• ցավ, որն ունի ալիքաձև սաստկացումներ և մեղմացումներ
• միզելիս ցավ կամ այրող զգացողություն:

Այլ գանգատներից և ախտանիշնեից են՝

• վարդագույն, կարմիր կամ շագանակագույն մեզ
• պղտորված կամ գարշահոտ մեզ
• միզելու մշտական ​​ցանկություն, սովորականից ավելի հաճախ միզում կամ փոքր քանակություններով միզարձակում
• սրտխառնոց և փսխում
• ջերմություն և դող, եթե առկա է վարակ:

Երբ քարը շարժվում է միզուղիներով, ցավը կարող է փոփոխել իր տեղակայումը, ուժգնությունը կամ բնույթը, օրինակ՝ տեղափոխվել գոտկատեղից դեպի աճուկներ կամ սաստկանալ:

Ե՞րբ դիմել բժշկին

Պայմանավորվեք արտահերթ այց ձեր բժշկի մոտ, եթե ունեք անհանգստացնող որևէ գանգատ և ախտանիշ:

Անհապաղ դիմեք բուժօգնության, եթե՝

• ցավն այնքան ուժեղ է, որ չեք կարող տեղում նստել կամ հարմար դիրք գտնել
• ցավն ուղեկցվում է սրտխառնոցով և փսխումով
• ցավն ուղեկցվում է ջերմությամբ և դողով
• ունեք արյուն մեզում (արյունամիզություն)
• ունեք միզարձակման դժվարություն: