Կարմրուկ. պատճառներ

Կարմրուկ. պատճառներ

Կարմրուկը խիստ վարակիչ հիվանդություն է, որը հարուցվում է վարակված երեխայի կամ չափահասի քթի խոռոչում և ըմպան-կոկորդում բազմացող վիրուսով:

Կարմրուկի հարուցիչը ՌՆԹ պարունակող պարամիքսովիրուս է, որը պատկանում է միքսովիրուսների ընտանիքի Morbillivirus ցեղին: Հարուցիչն արտաքին գործոնների ազդեցությամբ կորցնում է կայունությունն ու արագ ոչնչանում է (ուլտրամանուշակագույն ճառագայթներ, արևի լույս կամ չոր պայմաններ) :

Բազմանալուց հետո, երբ կարմրուկով ինչ-որ մեկը հազում, փռշտում կամ խոսում է, վարակված կաթիլները տարածվում են օդով, և նույն սենյակում գտվնող այլ մարդիկ կարող են ներշնչել դրանք: Վիրուսը նաև կարող է շենքի մուտքերով, օդափոխության համակարգերով կամ միջանցքներով:

Վարակված կաթիլները նաև կարող են հայտնվել մակերևույթների վրա, որտեղ մի քանի ժամ մնում են ակտիվ և վարակիչ: Դուք կարող եք վարակվել վիրուսով, եթե դիպչեք վարակված մակերեսին, որից հետո մատները մտցնեք բերանը, քիթը կամ տրորեք աչքերը: Այս ուղիով, չի բացառվում, օրինակ, կենցաղային իրերի կամ խաղալիքների միջոցով վիրուսի տարածումը:

Կարմրուկն այն աստիճան վարակիչ է, որ հիվանդ մարդու հետ շփվող չպատվաստված 10 անձից 9-ը վարակվում է:

Կարմրուկն անթրոպոնոզ հիվանդություն է, ինչը նշանակում է, որ հանդիպում է միայն մարդկանց շրջանում և վարակվել հնարավոր է միայն հիվանդ մարդուց: Կարմրուկին նաև բնորոշ է օջախայնությունը (վարակի բռնկում նույն սենյակում գտնվող մարդկանց շրջանում՝ մսուր-մանկապարտեզներ, խնամքի կենտրոններ, դասարաններ և այլն):

Ռիսկի գործոններ

Կարմրուկի ռիսկի գործոնները ներառում են հետևյալը:

  • Չպատվաստված լինելը. եթե չեք ստացել կարմրուկի դեմ պատվաստանյութ, ուրեմն ավելի հավանական է, որ կվարակվեք այս վիրուսով:
  • Միջազգային ճանապարհորդություններ. եթե ճանապարհորդում եք զարգացող երկրներում, որտեղ կարմրուկը տարածված է, ենթարկվում եք վարակվելու ավելի բարձր ռիսկին:
  • Վիտամին A-ի դեֆիցիտ. սննդով վիտամին A-ի բավարար քանակներ չստանալը բարձրացնում է կարմրուկի ավելի ծանր ընթացքի և բարդությունների զարգացման ռիսկը:

Հոդվածը վերանայվել է՝ 13-06-2021