Կարմրուկ. բուժում

2 րոպե

Կարմրուկի վարակի հայտնվելուց հետո որևէ հատուկ բուժում չկա:

Բուժումը ներառում է հարմարավետության միջոցների ապահովում՝ ախտանիշները թեթևացնելու համար, ինչպիսիք են հանգիստը և բարդությունների բուժումը կամ կանխարգելումը:

Այնուամենայնիվ, որոշ միջոցներ կարող են ձեռնարկվել՝ պաշտպանելու այն անհատներին, ովքեր ենթարկվել են վիրուսի ազդեցությանը և կարմրուկի նկատմամբ իմունիտետ չունեն:

• Հետազդեցության պատվաստում. կարմրուկի նկատմամբ իմունիտետ չունեցող մարդկանց, ներառյալ նորածիններին, կարմրուկի դեմ պատվաստանյութը կարող է տրվել կարմրուկի վիրուսի հետ շփումից հետո 72 ժամվա ընթացքում: Եթե կարմրուկն այնուամենայնիվ զարգանում է, այն սովորաբար ավելի մեղմ ախտանիշներ ունի և ավելի կարճ է տևում:
• Շիճուկային իմունոգլոբուլին. հղի կանայք, նորածինները և թուլացած իմունային համակարգ ունեցող մարդիկ, ովքեր ենթարկվում են վիրուսին, կարող են ստանալ իրենից հակամարմին ներկայացնող շիճուկային իմունոգլոբուլինի մեկ ներարկում: Վիրուսի հետ շփումից հետո վեց օրվա ընթացքում այս հակամարմինները կարող են կանխարգելել կարմրուկը կամ պակասեցնել ախտանշանները:

Դեղամիջոցներ

• Ջերմիջեցնողներ. կարմրուկային վարակին ուղեկցող ջերմությունը մեղմացնելու համար բժշկի խորհրդով կարող եք ստանալ կամ երեխային տալ սովորական ջերմիջեցնող դեղամիջոցներ, օրինակ՝ Ացետամինոֆեն (Թայլենոլ, Պարացետամոլ և այլն), Իբուպրոֆեն (Ադվիլ, Մանկական Մոտրին և այլն) կամ Նապրոքսեն նատրիում (Ալեվե): Կարմրուկի ախտանիշներով երեխաներին կամ անչափահասներին մի՛ տվեք Ասպիրին: Թեև Ասպիրինը հաստատված է 3 տարեկանից բարձր երեխաների շրջանում օգտագործման համար, ջրծաղիկի կամ գրիպանման նշաններով երեխաները երբեք չպետք է ստանան Ասպիրին, քանի որ վերջինս կապված է Ռեյի համախտանիշի հետ (հազվադեպ, սակայն կյանքին սպառնացող հիվանդություն):
• Հակաբիոտիկներ. եթե կարմրուկի ընթացքում զարգացել է բակտերիալ վարակ, օրինակ՝ թոքաբորբ կամ ականջի վարակ, բժիշկը կարող է նշանակել որևէ հակաբիոտիկ:
• Վիտամին A. վիտամին A-ի ցածր մակարդակով երեխաների մոտ կարմրուկը կարող է ընթանալ ավելի բուռն: Նման իրավիճակներում վիտամին A-ի նշանակմամբ հիվանդության ախտանիշները կարող են մեղմացվել: 1 տարեկանից բարձր երեխաներին վիտամին A սովորաբար նշանակվում է բարձր դեղաչափով՝ 200,000 միջազգային միավոր (ՄՄ, անգլերեն՝ IU)։

Հարթ ընթացքով կարմրուկի բուժումը կազմակերպվում է տնային պայմաններում: Հակառակ վերոնշյալներին, բարդացած կարմրուկի, հատկապես՝ մանկահասակ երեխայի բուժումը ցուցված է կազմակերպել հիվանդանոցային պայմաններում: