Ախտանիշներ - Կարմրուկ

Կարմրուկի գանգատներն ու ախտանիշները հայտնվում են վիրուսի հետ շփումից 10-14 օր հետո:

Կարմրուկի գանգատներն ու ախտանիշները սովորաբար ներառում են՝

• ջերմություն
• չոր հազ
• քթահոսություն (հարբուխ)
• կոկորդի ցավ
• բորբոքված աչքեր (կոնյուկտիվիտ)
• փոքր աղորիքների դիմաց՝ այտի ներքին լորձաթաղանթի վրա, հազվադեպ՝ նաև շրթունքներին կարմրուկին խիստ բնորոշ մանր սպիտակավուն հանգույցիկներ, որոնք սահմանագծված են կարմրավուն նուրբ պսակով և միմյանց չեն միաձուլվում (Կոպլիկի բծեր)
• հստակ փուլայնությամբ հանգուցիկաբծավոր բնույթի մաշկային ցան, որոնք հաճախ միաձուլվում են միմյանց (սովորաբար սկսվում է հիվանդության 3-5-րդ օրը):

Կարմրուկի փուլերը

Սովորաբար վարակն ընթանում է 2-ից 3 շաբաթ ձգվող 4 փուլով:

• Վարակում և ինկուբացիա (գաղտնի շրջան). վարակվելուց առաջին 10-14 օրվա ընթացքում կարմրուկի վիրուսը տարածվում է մարմնում: Այս ընթացքում կարմրուկի գանգատներ կամ ախտանիշներ չկան:
• Ոչ առանձնահատուկ գանգատներ և ախտանիշներ (նախանշանային (պրեդրոմալ) կամ կատարալ շրջան). կարմրուկը սովորաբար սկսվում է թեթև և չափավոր ջերմությամբ, հաճախ` համառ հազով, քթահոսությամբ (հարբուխ), բորբոքված աչքերով (կոնյուկտիվիտ) և կոկորդի ցավով: Այս համեմատաբար թեթև վիճակը կարող է տևել 2-3 օր:
• Սուր հիվանդություն և ցանավորում (ցանավորման շրջան). ցանը կազմված է փոքր վառ կարմիր հանգուցիկավոր բծերից, որոնցից մի քանիսը մի փոքր բարձրացած են։ Խիտ խմբավորված բծերը և միմյանց միաձուլվող հանգուցիկները մաշկին տալիս են բծավոր կարմիր տեսք: Ցանը կարող է ուղեկցվել չափավոր քորով։ Կարմրուկային ցանը բնորոշվում է փուլայնությամբ: Ցանի առաջին բռնկումը տեղի է ունենում ականջախեցու հետին հատվածի և դեմքի վրա: Հաջորդ մի քանի օրվա ընթացքում ցանը տարածվում է ձեռքերի, կրծքավանդակի և մեջքի վրա, այնուհետև իջնում ազդրեր, սրունքներ և ոտքնաթաթեր: Նույն շրջանում ջերմությունը կտրուկ բարձրանում է՝ հաճախ հասնելով 40° C-ից մինչև 41° C:
• Ապաքինում (ռեկովալեսցենցիայի կամ պիգմենտացիայի շրջան. կարմրուկի ցանը կարող է տևել մոտ յոթ օր: Ցանն աստիճանաբար մարում է, ինչպես առաջացել էր, այն է՝ վերից վար՝ նախ դեմքից, իսկ վերջում՝ ազդրերից և ոտնաթաթերից։ Քանի դեռ հիվանդության մյուս ախտանշանները անհետանում են, հազը և մաշկի մգացումը կամ մանր թեփուկավոր թեփոտմումը, որտեղ եղել էր ցանը, կարող է մնալ մոտ 10 օր:

Ե՞րբ կարող է մարդը տարածել կարմրուկի վիրուսը

Կարմրուկով հիվանդ մարդը կարող է վիրուսը տարածել ուրիշների վրա մոտ ութ օր՝ սկսած ցանի հայտնվելուց չորս օր առաջ և ավարտվում է, երբ ցանն առկա է չորս օր:

Ե՞րբ դիմել բժշկին

Զանգեք ձեր բժշկին, եթե կարծում եք, որ դուք կամ ձեր երեխան կարող եք վարակված լինել կարմրուկի կամ եթե դուք կամ ձեր երեխան կարմրուկին նմանվող ցան ունեք:

Քննարկեք բժշկի հետ ձեր ընտանիքի պատվաստման գրանցումները, հատկապես մինչև երեխայի տարրական դպրոց կամ քոլեջ հաճախելը և միջազգային ուղևորությունները։

Կարմրուկը խիստ վարակիչ է, և ինչպես դուք, այնպես էլ բուժանձնակազմը պետք է ամեն կերպ ձգտեք, որ վարակը չտարածվի և այլ մարդիկ չվարակվեն: