Կարմրուկ

Կարմրուկը խիստ վարակիչ հիվանդություն է, որը հարուցվում է օդակաթիլային ճանապարհով տարածվող վիրուսով:

Հիվանդությունը կարող է ստանալ շատ բուռն ընթացք և հաճախ բերել լուրջ բարդությունների:

Ցանկացած մարդ կարող է վարակվել կարմրուկով, եթե նախկինում չի հիվանդացել, սակայն հիվանդությունն ավելի հաճախ հանդիպում է այն անձանց մոտ, ովքեր կարմրուկի վիրուսի դեմ չեն պատվաստվել:

Կարմրուկը համարվում է պատվաստմամբ կանխարգելվող հիվանդություն, ուստի կարմրուկի դեմ պատվաստումը որպես պարտադիր բաղադրիչ ներառված է բազմաթիվ երկրների (այդ թվում՝ Հայաստանի) պատվաստումների ազգային օրացույցում:

Կարմրուկի ախտանիշները

Կարմրուկի վաղ ախտանիշներից են մարմնի ջերմության բարձրացումը, չոր հազը, ընդհանուր թուլությունը և հոգնածության զգացումը, ըմպանաբորբը, հարբուխը և քթահոսությունը, լուսավախությունը, կոպերի այտուցվածությունը և աչքերի արցունքակալումը, որոնց հիվանդության 3-4-րդ օրերին միանում է նաև հանգուցիկաբծավոր բնույթի, մաշկից քիչ վեր բարձրացող և միաձուլվող կարմրավուն մաշկային ցան:

Կարմրուկային ցանը կարմրավուն է, մաշկից քիչ վեր բարձրացած և միաձուլվող հանգուցաբծիկավոր բնույթի է: Այն կարող է կեղևակալվել, սակայն քոր չի առաջացնում:

Կարմրուկային ցանը կարմրավուն է, մաշկից քիչ վեր բարձրացած, հանգուցիկաբծավոր բնույթի և միաձուլվող: Կարող է կեղևակալվել, սակայն քոր չի առաջացնում:

Կարմրուկ ունեցող մարդը դառնում է վարակիչ՝ ցանը հայտնվելուց 24 ժամ առաջ և դրա անհետացումից հետո՝ ևս 4 օր: Հիվանդությունը սովորաբար տևում է շուրջ 10 օր:

Եթե դուք ունեք կարմրուկի ախտանիշները

Կապ հաստատեք ձեր բժշկի հետ, եթե ձեզ մոտ նկատել եք կարմրուկի նշանները: Պատմեք նրան ձեր գանգատների և մյուս երևույթների մասին, որ նա հասկանա, թե արդյոք ձեր հիվանդությունը վարակային բնույթ ունի՞ և ինչպե՞ս ճիշտ կազմակերպել ձեր հանդիպումը՝ դո՞ւք այցելեք կլինիկա, թե՞ բժիշկն այցելի ձեր տուն: Կարմրուկը խիստ վարակիչ է, և ինչպես դուք, այնպես էլ բուժանձնակազմը պետք է ամեն կերպ ձգտեք, որ վարակը չտարածվի և այլ մարդիկ չվարակվեն:

Եթե կարմրուկն ախտորոշվել է ձեր բուժհիմնարկ այցի ընթացքում, գուցե ձեզ ժամանակավորապես մեկուսացնելու կարիք առաջանա:

Կարմրուկի կասկածով ցանկացած մարդ պետք է մնա տանը: Նույն կերպ, երեխաներին պետք չէ տանել մանկապարտեզ կամ դպրոց։

Ավելի մանրամասն տեղեկատվության համար առաջարկում ենք ընթերցել նաև կարմրուկի ախտանիշների և ախտորոշման մասին մեր հոդվածները:

Կարմրուկի կանխարգելումը

Ինչպես ձեր, այնպես էլ ձեր երեխաների համար կարմրուկից խուսափելու լավագույն ուղին պատվաստվելն է:

Երեխաները սովորաբար կարմրուկի դեմ պատվաստվում են 12 ամսականը և 6 տարեկանը լրանալիս: Հայաստանում կարմրուկի պատվաստումն անվճար է:

Ավելի մանրամասն տեղեկատվության համար առաջարկում ենք ընթերցել նաև կարմրուկի բուժման և կանխարգելման մասին մեր հոդվածները:

Կարմրուկի նկատմամբ իմունիտետ (անընկալունակություն)

Կարմրուկով կարող է վարակվել ցանկացած մարդ, ով նախկինում չի հիվանդացել այս հիվանդությամբ և չի պատվաստվել: Սակայն, խիստ հազվադեպ կարող են գրանցվել կրկնակի վարակման դեպքեր (կոչվում է «ռեինֆեկցիա»):

Մինչև 3 ամսական երեխաները անընկալունակ են։