Դեղամիջոցների գերօգտագործման գլխացավ. կանխարգելում

Դեղամիջոցների գերօգտագործման գլխացավ. կանխարգելում

Կան դեղամիջոցների ընդունումից առաջացած գլխացավի կանխարգելման տարբեր պարզ միջոցներ:

Օրինակ, դուք կարող եք կանխարգելել դեղամիջոցների գերօգտագործման գլխացավերը հետևյալ քայլերով՝

  • ընդունեք ձեր գլխացավի դեղերն այնպես, ինչպես նշանակել է բժիշկը
  • եթե կարիք ունեք ընդունել գլխացավի դեղերը շաբաթական ավելի քան երկու անգամ, տեղեկացերեք այդ մասին ձեր բժշկին
  • խուսափեք այնպիսի համակցված հաբերից (պատրաստուկներ), որոնք պարունակում են Բութալբիտալ կամ օփիոիդներ (թմրամիջոցներ)
  • օգտագործեք դեղատոմս չպահանջող ցավազրկողներն ամսական ոչ ավելի, քան 15 օր
  • սահմանափակեք տրիպտանների կամ համակցված ցավազրկողների օգտագործումը մինչև ոչ ավելի, քան ամսական 9 օր:

Ձեր առողջության մասին հոգ տանելը նույնպես կարող է օգնել գլխացավերի մեծ մասի կանխարգելմանը:

  • Խուսափե՛ք գլխացավի նպաստող գործոններից. եթե համոզված չեք, թե ինչպիսի գործոններ են նպաստում ձեր գլխացավերի առաջացմանը, վարեք «գլխացավի» օրագիր, որտեղ գրանցեք ձեր յուրաքանչյուր գլխացավի դրվագի մանրամասները: Սա թույլ կտա, որ շուտով հասկանաք, թե ինչ իրավիճակներում կամ պայմաններում են սկսվում կամ սրանում ձեր գանգատները:
  • Դարձրե՛ք ձեր քունը բավարար. ամեն օր, այդ թվում՝ ոչ աշխատանքային օրերին ուշ երեկոյան անկողին մտեք և առավոտյան արթնացեք մոտավորապես նույն ժամերին: Դարձրեք ձեր քունն առողջ:
  • Բաց մի՛ թողեք ձեր ճաշերը. սկսեք օրն առողջ նախաճաշով: Ձեր ճաշերն ու ընթրիքները կազմակերպեք ամեն օր մոտավորապես նույն ժամերին:
  • Խուսափե՛ք ջրազրկումից. համոզվեք, որ ստանում եք բավարար քանակով ջուր կամ կոֆեին չպարունակող այլ հեղուկներ:
  • Զբաղվե՛ք կանոնավոր վարժանքներով. ֆիզիկական ակտիվության շնորհիվ օրգանիզմում առաջանում են նյութեր, որոնք արգելակում են դեպի գլխուղեղ հաղորդվող ցավային ազդանիշները: Համաձայնեցրեք ձեր բժշկի հետ և զբաղվեք ձեր նախընտրելի վարժանքներով՝ արագ քայլք կամ վազք, լող կամ հեծանվավարում: Ֆիզիկական վարժանքները նաև նպաստում են սթրեսի կրճատմանը:
  • Կրճատե՛ք սթրեսը. դարձեք կազմակերպված: Պարզեցրեք ձեր օրակարգը: Նախապես պլանավորեք ձեր գործերը: Փորձեք մնալ դրական մտքերով և լավատես:
  • Կարգավորե՛ք մարմնի քաշը. գիրությունը կարող է նպաստել գլխացավերի առաջացմանը, ուստի, եթե ունեք ավելցուկային կիլոգրամներ, քաշի կարգավորումը կարող է օգնել անհանգստացնող գլխացավերի կանխարգելմանը:
  • Դադարեցրե՛ք ծխելը. եթե ծխող եք, զրուցեք բժշկի հետ դրանից ձերբազատվելու մասին: Ծխախոտը կապված է դեղամիջոցների գերօգտագործման գլխացավի զարգացման ավելի բարձր ռիսկի հետ:

Հոդվածը վերանայվել է՝ 30-03-2021